Read DIOSPA QHELQACHISQ Quechua GÉNESIS 1 Bible Online

GÉNESIS 1 - DIOSPA QHELQACHISQ Quechua bible

GÉNESIS 1

¹Qallariypin Diosqa hanaq pachata kay pachatawan kamarqan.[1]

²Kay pachaqa rawisqa ch'usaqmi kasharqan, laqhayaqtaq chinkay-chinkay ukhu unuta pakasharqan. Diospa Espiritunmi unu patapi muyusharqan.

³Diosmi nirqan: — K'anchay kachun, nispa. Chaymi k'anchay karqan.

⁴Diosmi rikurqan k'anchayqa allin kasqanta, k'anchaytataq laqhayaqmanta t'aqarqan.

⁵Hinaspan Diosqa k'anchayta “P'unchay” nisqata suticharqan, laqhayaqtataq “Tuta” nisqata suticharqan. Hinan ch'isiyaykurqanpas illarimurqanpas. Kaymi ñawpaqkaq p'unchay karqan.

⁶Diosmi nirqan: — Unu chawpipi t'aqaq ch'usaq kachun, hinaspa unumanta unuta t'aqachun, nispa.

⁷Diosmi ruwarqan t'aqaqpaq ch'usaqta, hinan ch'usaq urapi kaq unu t'aqakurqan ch'usaq patapi kaq unumanta. Ahinataq karqan.

⁸Diosqa t'aqaq ch'usaqtan suticharqan “Hanaq Pacha” nisqata. Hinan ch'isiyaykurqanpas illarimurqanpas. Kaymi iskaykaq p'unchay karqan.

⁹Diosmi nirqan: — Hanaq pacha urapi kaq unu hukllaman huñukuchun, hinaspa ch'aki rikhurichun, nispa. Ahinataq karqan.

¹⁰Hinaspan Diosqa ch'aki kaqta suticharqan “Hallp'a” nisqata, huñusqa unutataq suticharqan “Lamar-qocha” nisqata. Diosmi rikurqan allin kasqanta.

¹¹Hinaspan Diosqa nirqan: — Hallp'a phutuchichun llapa q'omerta, muhuyoq qorakunata, rurunpi muhuyoq sach'akunata, nispa. Ahinataq karqan.

¹²Hinaqtinmi hallp'aqa phutuchimurqan llapa q'omerta, muhuyoq qorakunata, rurunpi muhuyoq sach'akunata. Diosmi rikurqan allin kasqanta.

¹³Hinan ch'isiyaykurqanpas illarimurqanpas. Kaymi kinsakaq p'unchay karqan.

¹⁴Diosmi nirqan: — Hanaq pachapi k'anchaqkuna kachun p'unchaytawan tutatawan t'aqananpaq, hinallataq mita-mitata, p'unchay-p'unchayta, wata-watatapas señalaqpaq.

¹⁵Kallachuntaq hanaq pacha ch'usaqpi kay pachata k'anchamunanpaq, nispa. Ahinataq karqan.

¹⁶Diosmi iskay hatun k'anchaqkunata ruwarqan, hatunkaq k'anchaqta p'unchay k'anchananpaq, huch'uykaq k'anchaqtataq tuta k'anchananpaq. Ruwallarqantaq ch'askakunatapas.

¹⁷Hinaspan Diosqa hanaq pachapi k'anchaqkunata churarqan, kay pachata k'anchamunankupaq,

¹⁸p'unchaypas tutapas k'anchanankupaq, k'anchaytawan laqhayaqtawan t'aqanankupaqwan. Diosmi rikurqan allin kasqanta.

¹⁹Hinan ch'isiyaykurqanpas illarimurqanpas. Kaymi tawakaq p'unchay karqan.

²⁰Diosmi nirqan: — Unu wakwachimuchun kawsashaq animalkunata, hallp'a altopitaq phalaq animalkuna phalachun, nispa.

²¹Hinaspan Diosqa kamarqan hatuchachaq qocha animalkunata, unupi llapa kawsaqkunata, llapa phalaq animalkunatapas. Diosmi rikurqan allin kasqanta.

²²Hinaspanmi Diosqa chaykunata samincharqan: — Askhata miraychis, lamar-qochaman hunt'aykuychis, phalaq animalkunapas kay pachapi askhayaychis, nispa.

²³Hinan ch'isiyaykurqanpas illarimurqanpas. Kaymi phisqakaq p'unchay karqan.

²⁴Diosmi nirqan: — Hallp'a rikhurichichun tukuy rikch'aq kawsashaq animalkunata: uywakunatapas, suchuq animalkunatapas, salqa uywakunatapas, nispa. Ahinataq karqan.

²⁵Hinaspan Diosqa ruwarqan tukuy rikch'aq uywakunata, suchuq animalkunata, salqa uywakunatapas. Diosmi rikurqan allin kasqanta.

²⁶Hinaspanmi Diosqa nirqan: — Runata ruwasunchis ñoqanchisman rikch'akuqta, rikch'ayninchisman hina. Kamachichuntaq challwakunata, phalaq animalkunata, uywakunata, suchuq animalkunatapas, kay pachantinpi, nispa.

²⁷Hinaspan Diosqa runata kamarqan, Diosman rikch'akuqtan paytaqa kamarqan, qharita warmitawanmi kamarqan.

²⁸Diosqa paykunata saminchaspan nirqan: — Askhata miraychis, kay pachamanpas hunt'aykuychis, chaypi munayniyoq kaychis, kamachiychistaq challwakunata, phalaq animalkunata, kay pachapi puriq, suchuq llapa animalkunatapas, nispa.

²⁹Diosmi nirqan: — Kayqa mikhunaykichispaqmi qoykichis kay pachantinpi llapa muhuq qorata, llapa rurunpi muhuyoq sach'akunatapas.

³⁰Qollanitaqmi lliw kay pacha uywakunamanpas, lliw phalaq animalkunamanpas, lliw suchuq animalkunamanpas, tukuy kawsaqkunamanpas llapa q'omer qorata mikhunankupaq, nispa. Ahinataq karqan.

³¹Diosmi rikurqan llapa ruwasqankunata ancha allin kasqanta. Hinan ch'isiyaykurqanpas illarimurqanpas. Kaymi soqtakaq p'unchay karqan.