Read DIOSPA QHELQACHISQ Quechua GÉNESIS 14 Bible Online

GÉNESIS 14 - DIOSPA QHELQACHISQ Quechua bible

GÉNESIS 14

¹Chay tiempopin karqanku: Amrafel Sinarpi rey, Arioc Elasarpi rey, Quedorlaomer Elampi rey, Tidaltaq Goimpi rey.

²Paykunan maqanakurqan Sodoma rey Bera contra, Gomorra rey Birsa contra, Adma rey Sinab contra, Zeboim rey Zemeber contra, Bela rey contrapiwan. (Bela llaqtan Zoar nisqallataq).

³Chay phisqantinmi Sidim wayq'opi huñukurqanku. (Chaypin Kachi Qocha kashan).

⁴Chaykunan chunka iskayniyoq wataña Quedorlaomerta servisqaku, chunka kinsayoq watapitaq ichaqa pay contra hatarisqaku.

⁵Chaymi chunka tawayoq watapi Quedorlaomerqa hamurqan, hinallataq paywan kashaq reykunapas. Hinaspan Astarot Karnaimpi atiparqanku Refaim runakunata, Ham llaqtapitaq Zuz runakunata, Save-quiriataimpitaq Em runakunata,

⁶Seir orqopitaq Hor runakunata, paykunatan ch'inneq qaylla El-Parán llaqtakama qatirqanku.

⁷Kutimpuspataq hamurqanku En-mispat llaqtaman (chaymi Cades nisqallataq), hinaspan Amalec runakunaq lliw suyunta atiparqanku, hinallataq Hazezon-tamarpi tiyaq Amor runakunatapas.

⁸Chaymi lloqsimurqanku Sodoma rey, Gomorra rey, Adma rey, Zeboim rey, Bela reypiwan, hinaspan Sidim wayq'opi maqanakurqanku,

⁹Elam rey Quedorlaomer contra, Goim rey Tidal contra, Sinar rey Amrafel contra, Elasar rey Arioc contrapiwan. Phisqa rey tawa rey contra.

¹⁰Sidim wayq'otaq kasharqan brea p'uytu-p'uytullaña, chaymi Sodoma Gomorra reykunaqa ayqespanku chaykunaman urmaykurqanku, kinsataq orqokunaman ayqerqanku.

¹¹Hinan atipaqkunaqa Sodomapi Gomorrapi tukuy kaqta tukuy mikhunatapas aparikuspa ripurqanku.

¹²Abrampa sobrinon Sodomapi tiyaq Lot-tapas apallarqankutaq tukuy kaqnintinta.

¹³Huk runataq ichaqa ayqemuspa Hebreo runa Abramman willarqan. Abramqa tiyarqan Amor runa Mamreq encina sach'ankuna qayllapin, chay Mamren wawqen Escolwan Anerpiwan Abramwan hukllachasqa kasqaku.

¹⁴Abramtaq sobrinon preso apasqa kasqanta uyarispa, wasinpi naceq confianza kamachinkunata wakichirqan, kinsa pachak chunka pusaqniyoqta, hinaspan chay tawa reykunata Dankama qatirqan.

¹⁵Abrammi kamachinkunantin tuta rakinakurqanku, hinaspan tawantin reykunata atiparqanku, Damasco llaqtaq wichayninpi kaq Hobakamataq chay reykunata qatirqanku.

¹⁶Hinaspan imaymana kaqkunata qechukampurqan, hinallataq sobrinon Lot-tapas kaqnintinta, warmikunatapas runakunatapas kutichimpurqan.

¹⁷Sodoma reymi Abramta chaskiq lloqsirqan “Rey Wayq'o” nisqa Save wayq'oman, Quedorlaomerta paywan kaq reykunatawan atipamusqanmanta kutimpushaqtin.

¹⁸Ancha hatun Diospa sacerdoten Salem rey Melquesedectaq t'antata vinotawan Abramman haywarqan.

¹⁹Hinaspan payta samincharqan: — Hanaq pachata kay pachatawan kamaq Ancha hatun Diosmi saminchasunki,

²⁰awqaykikunata hap'iykachiqniyki Ancha hatun Diosqa yupaychasqa kachun, nispa. Abramtaq tukuymanta diezmota payman qorqan.

²¹Sodoma reytaq Abramta nirqan: — Runakunata qoway, qhapaq kaykunataqa qan hap'ikapuy, nispa.

²²Abramtaq ichaqa Sodoma reyta nirqan: — Hanaq pachata kay pachatawan kamaq Ancha hatun Señor Diosmanmi rimarirqani,

²³huk q'aytutapas usut'a watutapas, imaykitapas mana chaskikunaypaq, paqtan niwaq: Ñoqan Abramtaqa qhapaqyachini, nispa.

²⁴Manan imatapas munanichu, aswanpas kay waynakunaq mikhusqallantan. Ñoqawan riq Aner, Escol, Mamre qharikuna ichaqa tupaqninkuta chaskikuchunku, nispa.