Read DIOSPA QHELQACHISQ Quechua GÉNESIS 15 Bible Online

GÉNESIS 15 - DIOSPA QHELQACHISQ Quechua bible

GÉNESIS 15

¹Chaykuna qhepatataq Señor Diosqa rikhuriypi Abramta nirqan: — Abram, ama manchakuychu, ñoqan waqaychaqniyki kani, ancha hatun premiotan qosqayki, nispa.

²Hinaqtinmi Abramqa kutichirqan: — Apu Señor Diosnilláy, ¿ima allinniypaqtaq kanman prometewasqaykiqa, mana wawayoq kashaqtiyri? Herenciay chaskiqqa chay Damasco llaqtayoq Eliezerllan kanqa.

³Manataq wawata qowankichu chayqa, wasiypi naceq kamachiymi lliw kaqniytaqa chaskinqa, nispa.

⁴Chaymi Señor Diosqa payta nirqan: — Manan kamachiykichu herenciataqa chaskisunki, aswanpas wawaykipunin herenciataqa chaskisunki, nispa.

⁵Abramta hawaman pusaspataq nirqan: — Qhawariy hanaq pachata, hinaspa ch'askakunata yupay, ¿atiwaqchu chaykunata yupayta? Chay hinan mirayniykiqa kanqa, nispa.

⁶Hinan Abramqa Señor Diospi iñirqan, chaymi Señor Diosqa payta chaninpaq hap'irqan.

⁷Hinaspan nirqan: — Ñoqan Señor Diosqa kani, Caldea suyu Ur llaqtamantan pusamurqayki kay hallp'ata herenciata qonaypaq, nispa.

⁸Abramtaq tapuykurqan: — Apu Señor Diosnilláy, ¿imaynapitaq yachasaq kay hallp'ata herenciata chaskinayta? nispa.

⁹Chaymi Señor Diosqa nirqan: — Apamuway kinsa watayoq malta wakata, kinsa watayoq cabrata, kinsa watayoq borregota, hinallataq huk kullkutapas huk malqo urpitawan, nispa.

¹⁰Hinan Abramqa lliw chaykunata aparqan, hinaspan chaykunata nak'aspa kuskanmanta phasmispa, sapanka phasmita chimpa purantinta churarqan, kullkuta malqo urpitan ichaqa mana phasmirqanchu.

¹¹Nak'asqa aychaman suweq'arakuna uraykamuqtintaq, Abramqa chaykunata manchachirqan.

¹²Inti haykunanpaq kashaqtintaq Abramta sinchi misk'i puñuy aysarqan, hinaspan manchay laqhayaq payta mancharichirqan.

¹³Señor Diosmi Abramta nirqan: — Yachay, mirayniykiqa karu llaqta suyupin kamachi kanqa, chaypin kamachi kaspa ñak'arichisqa kanqaku tawa pachak watantin.

¹⁴Servisqanku suyutataq ichaqa ñoqa muchuchisaq, chay qhepatataq askha qhapaq kaynintin lloqsimpunqaku.

¹⁵Qantaq sumaq kawsaypi sinchi yuyaqllaña wañukapunki, hinaspan p'ampasqa kapunki.

¹⁶Tawakaq miraypiñan mirayniykikunaqa kayman kutimpunqaku. Manaraqmi Amor runakunata kaymanta wikch'usaqchu, mana chanin-kayninku manaraq sinchipunichu kasqanrayku, nispa.

¹⁷Inti haykupuqtintaq, tutayaqtinña rikhurirqan huk q'osñishaq sansa churana, rawrashaq ninapiwan, phasmisqa animalkunaq chawpintataq pasasharqan.

¹⁸Chay p'unchaypin Señor Diosqa Abramwan rimanakurqan: — Mirayniykimanmi kay hallp'ata qosaq Egipto mayumantapacha hatun Eufrates mayukama.

¹⁹Cen runakunaq, Cenez runakunaq, Cadmon runakunaq,

²⁰Het runakunaq, Ferez runakunaq, Refain runakunaq,

²¹Amor runakunaq, Canaán runakunaq, Gerges runakunaq, Jebus runakunaq hallp'ankuta, nispa.