Read DIOSPA QHELQACHISQ Quechua GÉNESIS 18 Bible Online

GÉNESIS 18 - DIOSPA QHELQACHISQ Quechua bible

GÉNESIS 18

¹Señor Diosmi Mamrepi encina sach'akuna qayllapi Abrahamman rikhurirqan, chawpi p'unchay hinata karpan punkupi tiyashaqtin.

²Hinan qhawarispa rikurqan qayllanpi kinsa qhari kashaqta, rikuspan hinataq karpan punkumanta phawarirqan paykunata chaskiq. Hinaspan pampaman k'umuykukuspa,

³nirqan: — Señorniy, khuyapayawankichus chayqa, rogakuykin ñoqa kamachiykiq qayllayta ama usqhaylla pasarqonaykipaq.

⁴Unuta aparqachimusqaykichis, chakiykichista mayllikunaykichispaq, hinaspataq sach'a k'uchupi samarikunkichis,

⁵ñoqataq t'antata aparqamusqaykichis kallpachakunaykichispaq, chaymantaña ripunkichis, ñataq kamachiykiman chayamuwankichisña chayqa, nispa. Paykunataq nirqanku: — Allinmi, nisqaykita hina ruwamuy, nispa.

⁶Hinaqtinmi Abrahamqa phawaylla rirqan Saraq kasqan karpata, hinaspan payta nirqan: — Usqhaylla hap'iy kinsa tupu ñut'u hak'uta, q'apirqospa t'antata ruwarqoy, nispa.

⁷Abrahamtaq waka t'aqaman phawarirqan, hinaspan allinnin uña torillota hap'irqamuspa kamachinman qorqan, chay kamachitaq nak'aspa usqhaylla wayk'urqan.

⁸Abrahamqa hap'illarqantaq llukllutapas, lechetapas, wayk'usqan torillotapas, hinaspan paykunaman haywarqan, paytaq sach'a k'uchupi sayasharqan paykuna mikhushanankukama.

⁹Chaymantataq nirqanku: — ¿Maypitaq kashan warmiyki Sarari? nispa. Paytaq kutichirqan: — Karpapin kashan, nispa.

¹⁰Chaymi nirqan: — Q'aya wata kunan hinan kutimusqaykichis, warmiyki Saran qhari wawayoq kanqa, nispa. Sarataq uyarisharqan paypa qhepanpi kaq karpa punkumanta.

¹¹Abrahampas Sarapas yuyaqñan karqanku, machu-payaña, Saraqpas ñan killanqa chinkapurqanña.

¹²Chaymi Saraqa sonqonpi asikurqan: — ¡Machu-paya kayniykupi wawayoq kaspaykuqa kusikuykumanchá! nispa.

¹³Hinan Señor Diosqa Abrahamta nirqan: — ¿Imanaqtintaq warmiyki Sarari asikun, wachakuymanñachu payaña kashaspay? nispa.

¹⁴¿Diospaqqa imapas sinchi sasa kanchu? Nirqaykiña hinan wataman kutimusqayki, Sarataq qhari wawayoq kanqa, nispa.

¹⁵Hinaqtinmi Saraqa mancharikurqan: — Manan asikunichu, nispataq, mananchakurqan. Señor Diostaq nirqan: — Manan hinachu, asikurqankin, nispa.

¹⁶Chay qharikunaqa chaymanta sayarispan Sodoma cheqasman rirqanku, Abrahamtaq riysirqan paykunata kacharpariq.

¹⁷Señor Diostaq yuyaykurqan: — ¿Imatachus ruwanayta Abrahammanta pakaymanchu,

¹⁸Abraham ancha hatun kallpayoq suyu kanan kashaqtin, hinaspa kay pachapi runakunapaq samincha kanan kashaqtin?

¹⁹Ñoqan payta akllakurqani, wawankunatapas qhepa miraynintapas kamachinanpaq chaninkaqta allinkaqta ruwaspa kasuwanankupaq, ahinapi Abrahamman prometesqayta hunt'anaypaq, nispa.

²⁰Chaymantataq Señor Diosqa Abrahamta nirqan: — Sodoma Gomorra contran aswan-aswanta waqyakamunku, huchankupas sinchi millaypuniñan.

²¹Kunanqa uraykusaq, hinaspa ruwasqankuta rikumusaq waqyakamusqankuman hinapunichus kashan icha manachus chayta, ahinapin yachasaq, nispa.

²²Chay iskay qharikunataq chaymanta puririspanku Sodomaman rirqanku, Abrahamtaq ichaqa Señor Diospa qayllallanpiraq kasharqan.

²³Hinan Abrahamqa asuykuspa tapuykurqan: — ¿Chanin runatapas wañuchinkichu mana chanintawan kuska?

²⁴Icha chay llaqtapi kanpaschá phisqa chunka chanin runakuna, ¿thunillawaqtaqchu llaqtata? ¿Manapunichu chay cheqasta pampachawaq, chaypi phisqa chunka chanin runakuna kashaqtin?

²⁵Ama chay hinata ruwaychu, ama chanin runataqa mana chanintawan wañuchiychu, ama chanin runaqa mana chanin hina rikusqa kachunchu. ¡Amapuni chaytaqa ruwaychu! Kay pachantin Juezqa, ¿manachu ruwawaq chaninkaqta? nispa.

²⁶Señor Diostaq kutichirqan: — Sodomapi phisqa chunka chanin runakunata tarisaq chayqa, lliw chay cheqastan paykunarayku pampachasaq, nispa.

²⁷Abrahamqa tapuykullarqantaqmi: — Señor Diosníy, uyariykuway rimapayashasqayta, ñut'u hallp'a hinalla, uspha hinalla kani chaypas.

²⁸Icha phisqa chunka chanin runamanta faltanqapaschá phisqa, ¿chay phisqaraykuchu llaqtantinta wañuchinki? nispa. Señortaq kutichirqan: — Chaypi tawa chunka phisqayoqta tarisaq chayqa, manan wañuchisaqchu, nispa.

²⁹Hinan Abrahamqa huktawan rimapayarqan: — Icha chaypi tawa chunkallapaschá kanqa, nispa. Señortaq kutichirqan: — Manan wañuchisaqchu tawa chunka kaqtinqa, nispa.

³⁰Hinan nirqan: — Kunanqa, Señor Diosníy, ama phiñarqokuychu yapa-yapa tapupayaqtiy, icha chaypi kinsa chunkallapaschá kanqa, nispa. Señortaq kutichirqan: — Manan wañuchisaqchu kinsa chunka kaqtinqa, nispa.

³¹Nillarqantaq: — Señor Diosníy, uyariykullawaytaq rimapayashasqayta, icha chaypi iskay chunkallapaschá kanqa, nispa. Señortaq kutichirqan: — Manan wañuchisaqchu iskay chunka kaqtinqa, nispa.

³²Nillarqantaq: — Kunanqa, Señor Diosníy, ama phiñakuychu, kay kutillatawanña rimapayasqayki, icha chaypi chunkallapaschá kanqa, nispa. Señortaq kutichirqan: — Manan wañuchisaqchu chunka kaqtinqa, nispa.

³³Abrahamwan rimayta tukuspa hinataq Señor Diosqa ripurqan, Abrahamtaq karpanman kutipurqan.