Read DIOSPA QHELQACHISQ Quechua GÉNESIS 19 Bible Online

GÉNESIS 19 - DIOSPA QHELQACHISQ Quechua bible

GÉNESIS 19

¹Chay iskay angelkunan Sodoma llaqtaman chayarqanku rasphiyaykuyta, Lot-taq Sodoma llaqta punkupi tiyasharqan. Chaymi paykunata rikurqospa sayarirqan chaskinanpaq, hinaspan pampaman k'umuykukuspa

²nirqan: — Kunanqa, wiraqochaykuna, valekuykichismi kamachiykichispa wasinman haykuykunaykichispaq, hinaspa qorpachakunaykichispaq, chakiykichistapas mayllikunaykichispaq. Tutamantañataq hatarinkichis, hinaspa ripunkichis, nispa. Paykunataq ichaqa nirqanku: — Manan, plazallapin puñusaqku, nispa.

³Lot-taq ichaqa sinchita paykunata valekurqan, chaymi wasinman haykurqanku. Lotqa paykunapaq sumaq mikhunatan wayk'uchirqan, mana qonchuyoq t'antata masachirqan, chaytan mikhurqanku.

⁴Manaraq puñuykushaqtinkutaq Sodoma llaqta qharikunaqa llaqtallantin wasita muyuykurqanku, waynakunapas machu runakunapas llapallanku,

⁵Lot-ta waqyaspataq nirqanku: — ¿Maymi kunan tuta wasiykiman chayamuq qharikuna? Horqomuwayku t'inkikunaykupaq, nispa.

⁶Hinaqtinmi Lotqa paykunaman lloqsimurqan, punkuta wisq'arparispataq

⁷nirqan: — Valekuykichismi, wawqeykuna, imaynan chay hina mana allinta ruwawaqchis.

⁸Kashanmi iskay ususiykuna, doncellakuna, paykunata horqomusqaykichis, ima munasqaykichista ruwaychis, kay qharikunallata ama imanaychispaschu, paykunaqa qorpachasqaykunan, nispa.

⁹Hinan paykunaqa nirqanku: — ¡Anchhuriy! ¡Karu llaqtayoqmi qanqa kanki! ¿Juezñachu kayta munanki? Kunanqa qorpachasqayki runakunamantapas aswan mana allintaraqmi ruwasqaykiku, nispa. Chaymi Lotman phawaykurqanku, hinaspa punkuta p'akiyta munarqanku.

¹⁰Chay iskay qharikunataq ichaqa Lot-ta hap'ispa wasiman aysaykurqanku, punkutataq wisq'arparirqanku.

¹¹Wasi punkupi kashaq runakunatataq waynakunamanta machu runakunakama ñawsayachirqanku, chaymi paykunaqa punkuta yanqa maskhapakurqanku.

¹²Chaymantataq qorpachakuq qharikunaqa Lot-ta nirqanku: — ¿Familiaykikuna kaypi kanraqchu? Qatayniykikunata, churiykikunata, ususiykikunata llaqtapi hayk'an kaqniykitapas kaymanta horqollayña.

¹³Kay llaqtataqa thunisaqkun. Señor Diosmi anchataña kay llaqta contra uyarin, chaymi Señor Diosqa kachamuwanku thuninaykupaq, nispa.

¹⁴Hinaqtinmi Lotqa lloqsispa ususinkunawan casarakunankupaq kaqkunata rimapayarqan: — Hatariychis, kaymanta lloqsiychis, Señor Diosmi kay llaqtata thuninqa, nispa. Paykunataq ichaqa yanqa rimasqanpaq yuyarqanku.

¹⁵Pacha illarimuytataq angelkunaqa Lot-ta usqhachirqanku: — Sayariy, warmiykitapas iskaynin ususiykitapas kaymanta pusay, paqtan kay llaqtaq muchuyninpi wañuwaq, nispa.

¹⁶Pay mana usqhaqtintaq Señor Diospa khuyapayasqanman hina chay qharikunaqa paytapas, warmintapas, iskaynin ususinkunatapas makinkumanta hap'iykuspa, paykunata llaqta hawaman saqemurqanku.

¹⁷Hinaspataq huknin angelqa nirqan: — ¡Ayqekuy! Aman qhepaykita qhawarikamunkichu, amataq mayneqpipas kay cheqaspi sayaykunkichu. Orqo-orqoman ayqey, paqtan wañuwaq, nispa.

¹⁸Hinan Lotqa paykunata nirqan: — Manan, valekuykichismi wiraqochakuna,

¹⁹anchata khuyapayawaspaykin kamachiykita kawsachiwarqanki, manan orqoman ayqeymanchu, paqtan ñanpi muchuchiy taripawaqtin wañuyman.

²⁰Qhawariy haqay llaqtata qayllallaypin kashan, chayman ayqesaq, chayqa huch'uyllan. Haqayman ayqechiwaychis kawsanaypaq. Chay llaqtachaqa huch'uyllan, nispa.

²¹Hinan payman kutichirqan: — Kay mañakusqaykitapas uyarinin, chay nisqayki llaqtataqa manan thunisaqchu.

²²¡Usqhay! ¡Haqayman ayqey! Manan imatapas ruwasaqchu haqayman chayanaykikama, nispa. Chaymi chay llaqtaqa Zoar[12] nisqa sutiyoq.

²³Zoarman Lot chayaqtinñan intiqa lloqsimurqan.

²⁴Hinaqtintaq Señor Diosqa Sodomaman Gomorramanwan hanaq pachamanta parachimurqan azufreta ninatawan.

²⁵Hinaspan thunirqan chay llaqtakunata llapa tiyaqkunantinta, lliw chay wayq'otapas chakrakunantinta.

²⁶Lotpa warmintaq ichaqa qhepanta qhawarikurqan, hinaspan kachi qaqaman tukurqapurqan.

²⁷Qhepantin p'unchaytaq Abrahamqa tutallamanta rirqan Señor Dioswan tupasqan cheqasta,

²⁸hinaspan qhawaykurqan Sodomata Gomorrata lliw chay wayq'otapas, hinan rikurqan horno q'osñi hina wayq'omanta wicharishaq q'osñita.

²⁹Ahinatan Diosqa thunirqan Lotpa tiyasqan wayq'o llaqtakunata. Abrahammanta yuyarikuspataq Diosqa manchay ñak'ariymanta Lot-ta qespichirqan.

³⁰Zoarpi qhepakuyta manchakuspanmi, Lotqa iskay ususinkunantin Zoarmanta lloqsispa orqo-orqopi tiyarqan, kinsantinkun qaqa wasipi tiyarqanku.

³¹Hinan kurakkaqqa sullk'akaqta nirqan: — Taytanchisqa machuñan, manan kay hap'iypi qhari kapunchu ñoqanchiswan casarakunanpaq kay pachantinpi ruwayman hinaqa.

³²Haku taytanchisman vinota ukyachimusun, hinaspa paywan puñusunchis, chay hinapi taytanchispaq wachakusunchis, nispa.

³³Chay tutan taytankuman vinota ukyachirqanku, hinaspan kurakkaqqa suchuykuspa taytanwan puñurqan. Taytantaq ichaqa mana reparakurqanchu ususinpa suchuykusqantapas hatarisqantapas.

³⁴Qhepantin p'unchaytaq kurakkaqqa sullk'akaqta nirqan: — Ch'isi tutan taytaywan puñukurqani, kunan tutapas vinota ukyachillasuntaq, hinaspa qanñataq payman suchuykuspa puñukunki, chay hinapi iskayninchis taytanchispaq wachakusunchis, nispa.

³⁵Hinan chay tutapas taytankuman vinota ukyachirqanku, hinaspataq sullk'akaqqa suchuykuspa taytanwan puñukurqan. Taytanqa manallataqmi reparakurqanchu ususinpa suchuykusqantapas hatarisqantapas.

³⁶Chay hinatan Lotpa iskaynin ususinkunaqa taytankupaq wiksallikurqanku.

³⁷Hinaspan kurakkaqqa huk qhari wawata wachakurqan, suticharqantaq Moabta, paymi kunan Moab runakunaq taytan.

³⁸Sullk'akaqpas wachakullarqantaq huk qhari wawata, suticharqantaq Ben-ammita, paymi kunan Amón runakunaq taytan.