Read DIOSPA QHELQACHISQ Quechua GÉNESIS 2 Bible Online

GÉNESIS 2 - DIOSPA QHELQACHISQ Quechua bible

GÉNESIS 2

¹Hanaq pachapas kay pachapas tukusqataq karqan, lliw ima hayk'a kaqkunapas.

²Diosmi qanchiskaq p'unchaypi ruwasqanta tukurqan, hinaspan qanchiskaq p'unchaypi samakurqan lliw ruwasqanmanta.

³Chaymi Diosqa qanchiskaq p'unchayta samincharqan sapaqcharqantaq, chay p'unchaypin Diosqa lliw kamasqanmanta samakurqan.

⁴Kay hina kamasqan karqan hanaq pachapas kay pachapas. Señor Dios kay pachata hanaq pachata kamashaqtinqa,

⁵manan kay pachapi ima ch'aphrapas karqanraqchu, manallataq ima q'omer qorapas phutumurqanraqchu. Señor Diosqa manan kay pachaman parachimurqanraqchu, manan runapas hallp'ata llank'ananpaq karqanraqchu.

⁶Aswanpas pukyun pampamanta phullpumuspa kay pachantinta qarparqan.

⁷Hinamantataq ñut'u hallp'amanta Señor Diosqa runata[2] ruwarqan, hinaspa kawsay samayta senqanman samaykurqan, chaymi runaqa kawsashaq kapurqan.

⁸Señor Diosmi Edenpi huertata plantarqan, inti lloqsimuy ladopi, hinaspan ruwasqan runata chayman churarqan.

⁹Señor Diosmi hallp'amanta phutuchimurqan lliw munayllaña sach'akunata, mikhunapaqpas sumaqta. Churallarqantaq huerta chawpipi kawsachiq sach'atapas, allinkaqta mana allinkaqta reqsichiq sach'atapas.

¹⁰Edenmantan huk mayu lloqsimurqan huertata qarpananpaq, chaymantataq tawaman p'alqarirqan.

¹¹Ñawpaqkaqpa sutinmi Pisón karqan, chaymi Havila nisqa lliw hallp'anta purin, chaypin kan qori.

¹²Chay hallp'a qoriqa ch'uyan, chaypin kallantaq sumaq q'apaq gomapas, yanayoq yuraq umiñapas.

¹³Iskaykaq mayuq sutintaq Gihón karqan, Cus nisqa lliw hallp'antataq purin.

¹⁴Kinsakaq mayuq sutintaq Tigris karqan, chaymi Asiriaq inti lloqsimuy ladonta purin. Tawakaq mayutaq Eufrates karqan.

¹⁵Señor Diosmi runata Edén huertaman churarqan llank'ananpaq cuidananpaqwan.

¹⁶Hinaspan Señor Diosqa runata kamachirqan: — Atinkin huertapi llapa sach'a ruru mikhuyta,

¹⁷allinkaqta mana allinkaqta reqsichiq sach'a rurutan ichaqa ama mikhunkichu, chayta mikhunki chayqa, wañunkipunin, nispa.

¹⁸Señor Diosmi nirqan: — Manan allinchu qhariq sapallan kanan, paypaq hinapuni yanapaqninta ruwapusaq, nispa.

¹⁹Hinan Señor Diosqa hallp'amanta ruwarqan lliw salqa uywakunata, llapa phalaq animalkunatapas, hinaspan runaman chaykunata asuykachirqan sutichananpaq. Hinaqtinmi Adanqa llapa kawsaq animalkunata suticharqan, chaytaqmi sutin kapurqan.

²⁰Adanmi suticharqan llapa uywakunatapas, phalaq animalkunatapas, llapa salqa uywakunatapas. Runapaqmi ichaqa paypaq hinapuni yanapaqnin mana karqanchu.

²¹Chaymi Señor Diosqa runata misk'ita puñurqochirqan, puñushaqtintaq huknin waqtanninta horqorqan, hinaspataq aychanta wisq'aykapurqan.

²²Señor Diosqa qharimanta horqosqan waqtanninmantan warmita ruwarqan, hinaspan qhariman pusamurqan.

²³Chaymi qhariqa kusikurqan: — ¡Kaymá! Tulluy tulluyoqqa, aychay aychayoqqa, kaymi “Warmi” sutiyoq kanqa qharimanta horqosqa kasqanrayku, nispa.

²⁴Chayrayku, runaqa taytantapas mamantapas saqepunqa, hinaspan warminman hukllachaykakapunqa, huk aychallataq kapunqaku.

²⁵Iskayninkutaq q'alalla kasharqanku, qharipas warmipas, manataq p'enqanakurqankuchu.