Read DIOSPA QHELQACHISQ Quechua GÉNESIS 20 Bible Online

GÉNESIS 20 - DIOSPA QHELQACHISQ Quechua bible

GÉNESIS 20

¹Tiyasqanmantan Abrahamqa Neguev ladoman puririrqan, hinaspan tiyarqan Cadeswan Shurwan tupaypi. Gerarpi pisi p'unchaykunallata tiyashaspataq,

²Abrahamqa warmin Saramanta nirqan: — Panaymi, nispa. Chaymi Gerar rey Abimelecqa Sarata pusachimurqan.

³Diosmi ichaqa tuta mosqoypi Abimelecman rikhurispa nirqan: — Kunanqa wañunkin chay warmita pusachimusqaykirayku, chay warmiqa qosayoqmi, nispa.

⁴Abimelectaq ichaqa Sarata mana tupaykurqanraqchu, chaymi nirqan: — Señor Dios, ¿mana huchayoq runata wañuchiwaqchu?

⁵Abrahampunin niwarqan: “Panaymi”, nispa. Warminpas nillarqantaq: “Turaymi”, nispa. Ch'uya sonqoywanmi allin yuyaywanmi kaytaqa ruwani, nispa.

⁶Diostaq mosqoypi payta nirqan: — Ñoqapas yachallanitaqmi ch'uya sonqoykiwan chay ruwasqaykita, ñoqapas hark'allarqaykitaqmi ñoqa contra huchallikunaykita, chaymi mana payta tupaykachirqaykichu.

⁷Kunanqa warmita qosanman kutichipuy, Abrahamqa profetan, qanpaqmi mañapusunki, chaymi kawsanki. Manataq payta kutichipunkichu chayqa, yachay allinta, qanpas lliw qanwan kaq runakunapas wañunkichispunin, nispa.

⁸Hinaqtinmi Abimelecqa tutallamanta hatarimuspa llapa kamachinkunata waqyaspa tukuy chaykunata paykunaman willarqan, hinan chay runakunaqa sinchita mancharikurqanku.

⁹Chaymantataq Abimelecqa Abrahamta waqyaspa nirqan: — ¿Imatataq ruwaykuwanki? ¿Imapitaq huchallikurqani, ñoqamanpas suyuymanpas manchay huchata apaykamuwanaykipaq? Mana ruwanatan kaytaqa ruwaykuwanki.

¹⁰¿Ima yuyaywantaq kaytari ruwarqanki? nispa.

¹¹Abrahamtaq kutichirqan: — Nirqanin: “Kaypiqa manan Dios manchakuy kanchu, warmiyraykuchá wañuchiwanqaku”, nispa.

¹²Panaypunitaqmi kanpas, taytaypa ususin, ichaqa manan mamaypa ususinchu, paywanmi casarakurqani.

¹³Chaymi taytaypa wasinmanta purikuqlla kanaypaq Dios pusamuwaqtin, payta valekurqani: Maymanña chayasun chaypas ñoqamantaqa: Turaymi, ninkin, nispa.

¹⁴Hinaqtinmi Abimelecqa t'aqarqan ovejakunata, wakakunata, qhari kamachikunata, warmi kamachikunata, hinaspan Abrahamman qorqan, warmin Saratapas payman kutichipurqan.

¹⁵Hinaspataq payta nirqan: — Qhawariy hallp'ayqa hallp'aykin, may munasqaykipi tiyakuy, nispa.

¹⁶Saratapas nirqan: — Waranqa qolqetan turaykiman qoni, kay lliw puriq-masiykikunapaq ch'uya kasqayki yachakunanpaq, chay hinapin mana pipas huchachasunkichu, nispa.

¹⁷Hinan Abrahamqa Diosmanta mañapurqan, Diostaq qhaliyachirqan Abimelectapas, warmintapas, warmi kamachinkunatapas, chay hinapi wawayoq kapunankupaq.

¹⁸Abrahampa warmin Sara hawan Señor Diosqa Abimelecpa wasinpi warmikunata manapuni wiksallikunankuta munaqchu.