Read DIOSPA QHELQACHISQ Quechua GÉNESIS 21 Bible Online

GÉNESIS 21 - DIOSPA QHELQACHISQ Quechua bible

GÉNESIS 21

¹Señor Diosqa nisqanman hinan Saraman watukuq hamurqan. Señor Diosqa hunt'arqanmi Saraman prometesqantaqa.

²Chaymi Saraqa wiksallikuspa qhari wawata Abrahampaq wachakurqan yuyaq kashaqtinña, payman Diospa nisqan tiempopi.

³Abrahamtaq Saraq paypaq wachakusqan churinta suticharqan Isaacta,

⁴hinaspan wawanpa qhari-kayninta señalarqan pusaq p'unchayniyoq kashaqtin, Diospa kamachisqanman hina.

⁵Abrahammi karqan pachak watayoq, churin Isaac paypaq naceshaqtin.

⁶Sarataq nirqan: — Diosmi asichiwan, pipas chayta uyariqtaq ñoqawan asikunqa.

⁷¿Pitaq Abrahamta ninman karqan wawakunata ñoqaq ñuñunayta? Chaypas huk qhari wawatan paypaq wachakuni yuyaqña kashaqtin, nispa.

⁸Wawataq wiñarqan, hinaspan ñuñumanta p'itisqa karqan. Abrahammi hatun mikhuyta wayk'uchirqan Isaacta ñuñumanta p'itisqan p'unchaypi.

⁹Saran rikurqan Isaac wawanta Egipto warmi Agarpa wawan asipayasqanta, paytan Agarqa Abrahampaq wachakurqan.

¹⁰Chayrayku Abrahamta nirqan: — Chay kamachi Agarta wawantinta qarqopuy. Chay kamachiq wawanqa manan Isaac wawaywan herenciata chaskiysikunmanchu, nispa.

¹¹Chay nisqanwanmi Abrahamqa sinchita llakikurqan Ismael churinrayku.

¹²Chaymi Diosqa Abrahamta nirqan: — Ama kaytaqa mana allinpaqchu hap'iy churiyki hawa kamachiyki hawa ima. Imatachus Sara nisunki chayta ruway, Isaacmantan mirayniykiqa paqarinqa.

¹³Churiyki kasqanraykun kamachiq wawantapas hatun suyuman tukuchisaq, nispa.

¹⁴Hinan Abrahamqa tutallamanta sayarispa t'antata hap'irqan huk qara p'uyñu unutawan, hinaspan Agarman qospa q'epiykachirqan, wawantapas qollarqantaq, chaymantataq payta kacharparipurqan. Hinaqtinmi Agarqa puriripurqan, Beerseba ch'inneqpitaq kayman-chayman purirqan.

¹⁵Qara p'uyñupi unutaq tukukapurqan, hinan wawata huk ch'aphra k'uchupi saqerparirqan.

¹⁶Warak'asqa aypayman hina rispataq chimpanpi tiyaykuspa nirqan: — Manan rikuyta munanichu wawaypa wañusqanta, nispa. Chimpanpi tiyaykuqtintaq wawaqa kunkayoqta waqarqan.

¹⁷Diostaq wawaq waqasqanta uyarirqan, chaymi Diospa angelninqa hanaq pachamanta Agarta waqyamuspa nirqan: — ¿Agar, imananmi? Ama manchakuychu. Diosmi wawaq waqasqanta uyarin maypichus kashasqanpi.

¹⁸Sayariy, wawata hoqariy, sonqochaykuy, hatun suyumanmi payta tukuchisaq, nispa.

¹⁹Chay hinapin Diosqa ñawinta kicharirqan, hinan unu pukyuta rikurqan. Rispataq qara p'uyñuman unuta hillp'urqan, hinaspataq wawaman ukyachirqan.

²⁰Diosmi wawata yanaparqan, wiñaspanmi ch'inneqpi tiyarqan, kusa wach'iqtaq karqan.

²¹Paymi Parán ch'inneqpi tiyarqan. Mamanqa Egipto suyu warmiwanmi casarachirqan.

²²Chay kikin tiempopin Abimelecqa ejercitonpa umalli Ficolpiwan Abrahamta rimapayarqanku: — Tukuy ruwasqaykipin Diosqa yanapashasunki.

²³Kunanqa Diospa sutinpi jurapuway, ama llullakuspa ñoqatapas, churiytapas, nietoytapas allinta rikuwanaykikupaq, imaynan qanta allinta rikurqayki, ahinallataq ñoqatapas tiyasqayki llaqtatapas rikunki, nispa.

²⁴Abrahamtaq kutichirqan: — Arí, juranin, nispa.

²⁵Hinan Abrahamqa Abimelecta anyaykurqan unu p'uytu hawa. Abimelecpa kamachinkunan chay p'uytuta paymanta qechusqaku.

²⁶Chaymi Abimelecqa kutichirqan: — Manan yachanichu pichus chayta ruwasqanta, manallataq qanpas willawarqankichu, manan kunankama chayta uyarillarqanipaschu, nispa.

²⁷Abrahamqa ovejakunata wakakunata t'aqaspan Abimelecman qorqan, hinaspan iskayninku rimanakurqanku.

²⁸Abrahamqa oveja t'aqamantan qanchis malta ovejata t'aqarqan.

²⁹Hinan Abimelecqa Abrahamta nirqan: — ¿Imapaqtaq chay qanchis malta ovejataqa t'aqarqanki? nispa.

³⁰Paytaq kutichirqan: — Kay qanchis malta ovejatan chaskiwanki, kay p'uytuqa ñoqaq t'oqosqay kasqanta yachanapaq, nispa.

³¹Chayraykun chay cheqasta Beersebata[13] suticharqan, iskayninku chaypi jurasqankurayku.

³²Ahinatan Beersebapi rimanakurqanku, hinaspan Abimelecqa, ejercitonpa umallin Ficolpiwan Filistea suyuman kutipurqanku.

³³Abrahamqa Beersebapin tamarisco sach'ata plantarqan, chaypin Wiñay kawsaq Señor Diosmanta mañakurqan.

³⁴Abrahamqa Filistea suyupin unayta tiyarqan.