Read DIOSPA QHELQACHISQ Quechua GÉNESIS 26 Bible Online

GÉNESIS 26 - DIOSPA QHELQACHISQ Quechua bible

GÉNESIS 26

¹Chay hallp'apin yarqay karqan, Abrahampa tiemponpi kasqanmantaña, chaymi Isaacqa rirqan Filistea runakunaq reynin Gerar llaqtapi kaq Abimelecman.

²Chaypin Señor Diosqa Isaacman rikhurispa nirqan: — Ama Egiptoman uraykuychu, qanta nisqayki chay hallp'api tiyakuy.

³Kay hallp'apiqa tiyakullay, qanwanmi kashani, saminchasqaykin, qanmanmi mirayniykimanwan kay llapan hallp'ata qosqayki. Abraham taytaykiman prometesqaytaqa hunt'asaqmi.

⁴Hanaq pacha ch'askakunata hinan mirayniykita askhayachisaq, hinaspan kay llapan hallp'ata paykunaman qosaq. Lliw kay pachapi suyukunataq mirayniykiwan saminchasqa kanqaku,

⁵simiyta Abrahampa kasukusqanrayku, simiyta llapa kamachikusqaykunatawan hunt'asqanraykupiwan, nispa.

⁶Gerar llaqtapin Isaacqa tiyarqan.

⁷Chaypi tiyaq runakunan payta tapurqanku warminmanta, hinan payqa kutichirqan: — Panaymi, nispa. Manchakurqanmi “warmiymi” niyta. Sonqonpin yuyaykurqan: Paqtan chaypi tiyaq runakuna Rebecarayku wañuchiwankuman, nispa. Rebecaqa sumaq rikch'ayniyoqmi karqan.

⁸Unayña pay chaypi kashaqtintaq, Filistea runakunaq reynin Abimelecqa ventanamanta qhawaspa Isaacta rikurqorqan warmin Rebecata munakushaqta.

⁹Hinaspanmi Abimelecqa Isaacta waqyaspa, nirqan: — ¡Yaw, payqa warmiykimá kasqa! ¿Imanaqtintaq nirqanki: Panaymi, nispa? Hinan Isaacqa kutichirqan: — Chaytaqa nirqani: Paqtan payrayku wañuchiwankuman, nispan.

¹⁰Chaymi Abimelecqa nirqan: — ¿Imaraykun chayta ruwawankiku? Hinachu mayqen runapas warmiykiwan puñunman karqan, ahinapi huchallichiwankikuman karqan, nispa.

¹¹Hinan Abimelecqa llapa runakunata kamachirqan: — Pipas chay qharita otaq warmintapas tupaykunqa chayqa, wañunqapunin, nispa.

¹²Chay hallp'apin Isaacqa tarpurqan, hinan chay wata askhallataña cosecharqan, Señor Dios payta saminchasqanrayku.

¹³Qhapaqyasharqanmi allinyasharqanmi ancha atiyniyoq kapunankama.

¹⁴Karqanmi oveja t'aqanpas, waka t'aqanpas, hinallataq askha llank'aqninkunapas, chaymi Filistea runakunaqa payta envidiakurqanku.

¹⁵Taytan Abrahampa tiemponpin taytanpa kamachinkunaqa p'uytukunata t'oqosqaku, chaykunatan Filistea runakuna wisq'arqapusqaku, hallp'awan hunt'arqachispanku.

¹⁶Hinan Abimelecqa Isaacta nirqan: — Ripuy kaymanta, ñoqaykumanta aswan atiyniyoqmi kashanki, nispa.

¹⁷Chaymi Isaacqa chaymanta ripurqan, hinaspan Gerar wayq'opi karpakuspa chaypi tiyarqan.

¹⁸Hinaspanmi Isaacqa wakmanta hasp'irqan taytan Abrahampa tiemponpi hasp'ichisqan chay unu p'uytukunata, chaykunatan Abrahampa wañukapusqan qhepata Filistea runakuna wisq'apusqaku. Hinan Isaacqa chay p'uytukunata suticharqan taytanpa sutichasqan sutiwan.

¹⁹Isaacpa kamachinkunan wayq'opi p'uytuta t'oqorqanku, phullpuq unuta chaypi tariqtinkutaq,

²⁰Gerarpi michiqkunaqa ch'aqwarqanku Isaacpa michiqninkunawan: Ñoqaykuqmi kay unuqa, nispa. Chaymi Isaacqa p'uytuta suticharqan “Ch'aqway” sutiwan, paywan huchatarisqankurayku.

²¹Hinan huk p'uytuta t'oqorqanku, chay hawapas ch'aqwallarqankutaq, chaymi suticharqan “Cheqninakuy” sutiwan.

²²Hinaqtinmi chaymanta t'aqakurqanku, hinaspa wak p'uytuta t'oqorqanku, manataq chay p'uytu hawaqa ch'aqwarqankuchu, hinan suticharqan “Kachariy” sutiwan. Hinaspan nirqan: — Kunanqa Señor Diosmi kacharichiwanchis, kaypi allin kananchispaq, nispa.

²³Chaymantataq Beersebaman wicharqan.

²⁴Chay tutapin Señor Diosqa payman rikhurispa nirqan: — Ñoqan kani Abraham taytaykiq Diosnin, ama manchakuychu, ñoqan qanwan kashani, saminchasqaykin, mirayniykitan askhayachisaq kamachiy Abrahamta munakusqayrayku, nispa.

²⁵Hinan Isaacqa chaypi huk altarta perqaspa Señor Diosmanta mañakurqan, karpantapas chaypi sayarichirqan. Paypa kamachinkunataq chaypi huk p'uytuta t'oqorqanku.

²⁶Huk p'unchaymi Abimelecqa Gerar llaqtamanta payman hamurqan, yuyaychaqnin Ahuzatpiwan, ejercitonpa umallin Ficolpiwan.

²⁷Hinan Isaacqa paykunata nirqan: — ¿Imamanmi hamuwankichis? Cheqnikuwarqankichismi, qankuna ukhumantapas wikch'umuwarqankichismi, nispa.

²⁸Paykunataq kutichirqanku: — Rikuykun qanwan Señor Dios kashasqanta, hinaspan yuyaykuyku qanwan rimanakuyta. Chay rimanakuytaq kay hina kanqa:

²⁹Aman ima mana allintapas ruwawankikuchu, ñoqaykupas manan imanarqaykikupaschu, aswanpas allillantapunin ruwapurqaykiku, hinaspan allinpi kachampurqaykiku, kunanqa Señor Diosmi saminchashasunki, nispa.

³⁰Hinan Isaacqa paykunapaq hatun mikhunata wayk'uchirqan, hinaspan mikhurqanku ukyarqanku.

³¹Pacha illarimuytataq hatarispanku jurachinakurqanku, hinaspanmi Isaacqa paykunata kacharparipurqan, paykunapas allinpi ripurqanku.

³²Chay kikin p'unchaymi Isaacpa kamachinkunaqa hamurqanku, hinaspan t'oqosqanku p'uytumanta payman willarqanku: — Unutan tarimuyku, nispa.

³³Chaymi chay p'uytuta “Juramentota” suticharqan, chayraykun chay llaqtaq sutinqa chaymantapacha Beerseba nisqa kapurqan.

³⁴Esauqa tawa chunka watayoqña kashaspan casarakurqan Het runa Beeriq ususin Juditwan, Het runa Elonpa ususin Basematwan ima.

³⁵Chaymi Isaacpaqpas Rebecapaqpas chay warmikuna uma nanay karqanku.