Read DIOSPA QHELQACHISQ Quechua GÉNESIS 28 Bible Online

GÉNESIS 28 - DIOSPA QHELQACHISQ Quechua bible

GÉNESIS 28

¹Chaymi Isaacqa Jacobta waqyaspa samincharqan, hinaspan kamachirqan: — Aman Canaán warmiwanqa casarakunkichu.

²Padan-aramta riy, mamaykiq taytan Betuelpa wasinta, hinaspa chaypi casarakamuy mamaykiq turan Labanpa huknin ususinwan.

³Tukuy-atiyniyoq Diostaq qanta saminchasunki, anchata askhayachisunki ancha askha suyukunaman tukunaykikama.

⁴Abrahampa saminchantaq qanman qosqa kachun, hinallataq mirayniykimanpas, tiyasqayki hallp'ata herenciapi chaskinaykipaq, chaytan Diosqa Abrahamman qorqan, nispa.

⁵Ahinatan Isaacqa Jacobta kacharqan, chaymi payqa Padam-aramta rirqan, Aram runa Betuelpa churin Labanpata, Jacobpa Esaupa maman Rebecaq turanpata.

⁶Esautaq rikurqan taytan imaynatachus Jacobta saminchasqanta, hinaspa Padan-aramta kachasqanta chay llaqta warmiwan casarakamunanpaq, hinallataq payta saminchashaspa khaynata kamachisqantapas: Canaán warmiwanqa aman casarakunkichu, nispa.

⁷Esauqa rikullarqantaqmi Jacobqa taytanta mamanta kasusqanta, hinaspa Padan-aramta ripusqanta.

⁸Kaqllataq Esauqa repararqan Canaán warmikunaqa taytan Isaacpaq mana allin kasqanta.

⁹Hinaspan Esauqa Ismaelpata rispa casarakamurqan Abrahampa churin Ismaelpa ususin Mahalatwan, Nebaiotpa pananwan, huk warminkunapas kashaqtin.

¹⁰Jacobqa Beersebamanta lloqsispan Haranman rirqan.

¹¹Huk cheqasman chayaspataq inti haykuqtin chaypi puñurqan. Chayneqpi kashaq rumita hoqarispanmi sawnaykukurqan, hinaspan chaypi siriykurqan.

¹²Hinan mosqokuspa huk escalerata rikurqan pampapi sayashaqta, umantaq hanaq pachaman aypashaqta, Diospa angelninkunatapas chayninta wichashaqta uraykamushaqta.

¹³Hinallataq rikurqan Señor Diosta qayllanpi sayashaqta, paymi nirqan: — Ñoqan Señor Diosqa kani, abueloyki Abrahampa Diosnin. Kay puñusqayki hallp'atan qanman qosqayki, hinallataq mirayniykimanpas.

¹⁴Mirayniykin kanqa ñut'u hallp'a hina mana yupay atiy, hinan teqsimuyuntinman ch'eqeykunqaku, lliw kay pacha ayllukunapaqmi qanpas mirayniykipas samincha kankichis.

¹⁵Ñoqaqa qanwanmi kashani, mayta riqtiykipas waqaychasqaykin, hinaspan kay hallp'aman pusampusqayki, manan saqerparisqaykichu qanman nisqayta hunt'anaykama, nispa.

¹⁶Hinan Jacobqa puñusqanmanta rikch'arispa nirqan: Kaypipunin Señor Diosqa kashan, ñoqataq chayta mana yacharqanichu, nispa.

¹⁷Chaymi mancharikuspa nirqan: ¡Sinchi manchanan kay cheqasqa! ¡Diospa wasinmi, hanaq pacha punkutaqmi! nispa.

¹⁸Chaymi Jacobqa tutamanta hatarispa sawnakusqan rumita hoqarispa saywata sayachirqan, chay patamantaq aceitewan hich'aykurqan.

¹⁹Hinaspanmi chay cheqasta suticharqan Betelta,[20] ñawpaqqa chay llaqtaq sutinqa Luz[21] nisqan karqan.

²⁰Hinan Jacobqa prometekurqan: Ñoqawanchus Dios kanqa, kay risqaypipas waqaychawanqa, t'antatapas mikhunaypaq qowanqa, p'achatapas p'achakunaypaq,

²¹taytaypa wasintapas allillan kutipusaq chayqa, Señor Diosmi Diosniy kanqa.

²²Kay saywa rumi churasqaypitaq Diosta yupaychanqaku, lliw imapas qowasqaykimantataq diezmoyta qosqayki, nispa.