Read DIOSPA QHELQACHISQ Quechua GÉNESIS 3 Bible Online

GÉNESIS 3 - DIOSPA QHELQACHISQ Quechua bible

GÉNESIS 3

¹Mach'aqwayqa Señor Diospa ruwasqan llapan salqa animalkunamantapas aswan yuyaysapan karqan. Hinan warmita nirqan: — ¡Ahá! ¿Dioschu nirqasunkichis: Aman mikhunkichischu huertapi llapa sach'a ruruta, nispa? nispa.

²Warmitaq mach'aqwayman kutichirqan: — Huertapi sach'akunaq ruruntaqa atiykun mikhuyta,

³huerta chawpipi kaq sach'a rurullatan manaqa, Diosmi niwarqanku: Aman chaytaqa mikhunkichischu, amallataq llamiykunkichispaschu, mana chayqa wañunkichismi, nispa.

⁴Hinaqtinmi mach'aqwayqa warmita nirqan: — Manapunin wañunkichischu.

⁵Diosqa yachanmi chayta mikhuqtiykichis hina ñawiykichis kicharikunanta, hinaspa Dios hina allinkaqta mana allinkaqta reqsiq kanaykichista, nispa.

⁶Hinan warmiqa qhawarirqan sach'a ruruqa mikhunapaq sumaqllaña, munayllaña kasqanta, yachayniyoq kanapaq munapayana kasqantapas. P'itispataq mikhuykurqan, hinaspa qosanman haywarirqan, hinan paypas mikhuykullarqantaq.

⁷Hinaqtinmi iskayninkuq ñawinkuqa kicharikurqan, hinaspan reparanakurqanku q'alalla kashasqankuta. Hinan higos raphita siraspanku p'istunakunata ruwakurqanku.

⁸Hinaspanmi tarde kinray wayrarimuyta Señor Diospa huertapi purishasqanta uyarirqanku, hinan Señor Diospa qayllanmanta warmi-qhari huerta sach'a-sach'api pakakurqanku.

⁹Señor Diostaq qharita waqyaspa nirqan: — ¿Maypin kashanki? nispa.

¹⁰Paytaq kutichirqan: — Huertapi purishaqtiykin kunkaykita uyarispa manchakurqani q'alalla kashasqayrayku, chaymi pakakurqani, nispa.

¹¹Diostaq tapurqan: — ¿Pitaq willarqasunki q'alalla kashasqaykita? ¿Hark'arqayki chay sach'a rurutachu mikhurqanki? nispa.

¹²Qharitaq kutichirqan: — Kawsaysiwananpaq qowasqayki warmin sach'a ruruta qowarqan, hinan mikhurqani, nispa.

¹³Hinaqtinmi Señor Diosqa warmita nirqan: — ¿Imatan ruwarqanki? nispa. Warmitaq nirqan: — Mach'aqwaymi q'otuwarqan, hinan mikhurqani, nispa.

¹⁴Chaymi Señor Diosqa mach'aqwayta nirqan: — Kayta ruwasqaykiraykun uywakuna ukhupi, lliw salqa animalkuna ukhupipas ñakasqa kanki. Lliw kawsasqayki p'unchaypin suchuspa purinki, ñut'u hallp'atan hak'unki.

¹⁵Qantawan warmitawanmi cheqninachisqaykichis, mirayniykitawanpas paypa miraynintawanpas, mirayninmi umaykipi t'ustusunki, qantaq talonninpi kaninki, nispa.

¹⁶Warmitataq nirqan: — Wiksallikuspaykin sinchita ñak'arinki, nanaywanmi wawakunata wachakunki. Munasqaykitaq qosaykiman apasunki, paytaq kamachisunki, nispa.

¹⁷Qharitataq nirqan: — Warmiykita kasusqaykiraykun, hark'arqayki chay sach'a ruruta mikhusqaykiraykun, qan hawa hallp'aqa ñakasqa kanqa, sayk'uywanmi hallp'ata ruruchinki, chaytan tukuy kawsasqayki p'unchaykuna mikhunki.

¹⁸Khiskakunan kisakunan wiñapusunki, k'ita q'omerkunatataq mikhunki.

¹⁹Hump'iykita hich'arispan mikhunata tarinki ruwasqa kasqayki hallp'aman tukunaykikama, ñut'u hallp'an kanki, ñut'u hallp'amantaqmi tukupunki, nispa.

²⁰Qhariqa warmintan suticharqan Evata,[3] payqa llapa kawsaqkunaq maman kasqanrayku.

²¹Señor Diostaq qharipaq warmipaqwan qaramanta p'achata ruwapurqan, hinaspan paykunata p'achaykachirqan.

²²Hinaspan nirqan: — Kayqa, qhariqa hukninchis hinan kapun allinkaqta mana allinkaqta yachaspa. Kunanqa, paqtan makinta haywarispa kawsay sach'aq rurunta p'itinman, mikhuspataq wiñaypaq kawsanman, nispa.

²³Chaymi Señor Diosqa Edén huertamanta payta wikch'umpurqan hallp'ata llank'ananpaq. Payqa chay hallp'amanta ruwasqan karqan.

²⁴Qharita qarqomuspataq, Edén huertaq inti lloqsimuy ladonpi churarqan querubinkunata, tukuyneqman wach'iq nina espadatapas, kawsay sach'aman ñanta hark'ananpaq.