Read DIOSPA QHELQACHISQ Quechua GÉNESIS 33 Bible Online

GÉNESIS 33 - DIOSPA QHELQACHISQ Quechua bible

GÉNESIS 33

¹Qhawarispanmi Jacobqa rikurqan Esauta tawa pachak runakunapiwan hamushaqta, hinan payqa wawakunata rakirqan Leaman Raquelmanwan iskaynin kamachi warmimanwan.

²Hinaspanmi ñawpaqenpi sayaykachirqan kamachi warmikunata wawakunantinta, hinamantataq Leata wawakunantinta, qhepanpitaq Raquelta Josetawan.

³Paytaq ichaqa ñawpaqenkuman pasaspa qanchis kutita pampaman k'umuykukurqan wawqenman taripanankama.

⁴Esautaq ichaqa aypaqnin phawarimurqan, oqllaykuspa much'aykurqan, hinaspan waqapunakurqanku.

⁵Qhawarispataq rikurqan warmikunata wawakunatawan, chaymi nirqan: — ¿Pikunataq kaykunari? nispa. Jacobtaq kutichirqan: — Kamachiykiman Diospa qosqan wawakunan, nispa.

⁶Hinamantataq kamachi warmikuna wawantinkama hamurqanku, hinaspa k'umuykukurqanku.

⁷Hamullarqantaq Leapas wawakunantin, hinaspan k'umuykukurqanku. Chay qhepatataq Josewan Raquelwan qayllaykurqanku, hinaspataq k'umuykukurqanku.

⁸Chaymi Esauqa nirqan: — ¿Imatataq yuyaykunki kay llapan tarisqay t'aqa-t'aqawan? nispa. Jacobtaq kutichirqan: — Qan wiraqochay sumaqta qhawariwanaykipaqmi, nispa.

⁹Esautaq nirqan: — Wawqelláy, ñoqaqqa hunt'asqan kapuwan, qanpaq kachun kaqniykiqa, nispa.

¹⁰Jacobtaq nirqan: — Amayá, ñoqan valekuyki, kunan sumaqta qhawariwanki chayqa chaskiykuway kay sumaq sonqoyta, uyaykitan rikuni Diospa uyantapas rikushayman hinataraq, may sumaqtan chaskiykuwanki.

¹¹Valekuykin, chaskiykuway qanpaq apamusqay sumaq sonqoyta, Diosmi lliw kaykunataqa qowarqan, kaypi hayk'an kaqpas ñoqaqmi, nispa. Ahinatan payman munachirqan, Esautaq chayta chaskirqan.

¹²Hinaspan Esauqa nirqan: — Haku purisunchis, ñoqataq ñawpaqeykita risaq, nispa.

¹³Jacobtaq payta nirqan: — Wiraqocháy, yachankin wawakunaqa pisi kallpallaraq kasqanta, hinallataq ovejaykunapas wakaykunapas qholla uñayoqkama kasqanta, huk p'unchaylla sayk'uchisaqku chayqa, llapallan ovejan wañuranqa.

¹⁴Ahinaqa, kamachiykimanta ñawpariy, ñoqataq allillamanta purimusaq qatisqay uywaq purisqanman hina, wawakunaqpas purisqanman hina, Seirpi tiyasqaykiman chayamunaykama, nispa.

¹⁵Esautaq nirqan: — Pusamusqay wakin runakunata saqesqayki, nispa. Jacobtaq nirqan: — ¿Imapaq? Sumaq qhawariwasqaykitan rikuniña, nispa.

¹⁶Ahinapin Esauqa chay p'unchay ñanninta kutipurqan Seirman.

¹⁷Jacobtaq ichaqa Sucotman ripurqan, chaypin wasita paypaq sayarichikurqan, uywanpaqtaq ch'ukllakunata sayarichirqan. Chaymi chay cheqasta suticharqan Sucot-ta.[39]

¹⁸Chaymantataq Jacobqa allillan chayarqan Canaán suyupi kaq Shehem llaqtaman, Padan-arammanta hampuspa, hinaspan llaqta chimpapi tiyarqan.

¹⁹Karpakunata sayarichisqan wakin hallp'atataq pachak qolqewan rantikurqan Shehempa taytan Hamorpa wawankunamanta.

²⁰Hinaspan chaypi altarta perqarqan, suticharqantaq “El-Elohei-Israel”, Israelpa Diosnin, nispa.