Read DIOSPA QHELQACHISQ Quechua GÉNESIS 37 Bible Online

GÉNESIS 37 - DIOSPA QHELQACHISQ Quechua bible

GÉNESIS 37

¹Jacobmi tiyarqan taytanpa tiyasqan hallp'api, Canaán suyupi.

²Kaymi Jacobpa ayllunmanta willakuy. Joseqa chunka qanchisniyoq watayoq kashaspan, taytanpa warmin Bilhaq churinkunawan Zilpaq churinkunapiwan uywata michiqku. Joseqa taytanmanmi willaq wawqenkunaq millay kawsasqankuta.

³Israeltaq Joseta munakurqan llapa churinkunamantapas aswantaraq, yuyaq kayninpiña churiyasqanrayku, hinaspan ancha munay qoysu p'achata ruwapurqan.

⁴Hinan wawqenkunaqa paykunamantapas aswantaraq taytanpa munakusqanta rikuspa payta cheqnikurqanku, manataq paytaqa sumaqtachu rimaykuqku.

⁵Huk kutinmi Joseqa mosqokusqanta wawqenkunaman willarqan, hinan paykunaqa astawanraq payta cheqnikurqanku.

⁶Paykunamanmi nirqan: — Uyariwaychis kay mosqokusqayta:

⁷Chakra chawpipin watashasqanchis marq'ay-marq'ay trigota, ñoqaq marq'ayniytaq sayarispa allinta sayashasqa, marq'ayniykichistaq muyuriykuspa ñoqaqman k'umuykamushasqaku, nispa.

⁸Wawqenkunataq payta nirqanku: — ¿Qanqa kamachiwankikuchu? Icha, ¿munaychakuwankikuchu? nispa. Chaymi paytaqa astawanraq cheqnikurqanku mosqokusqanrayku, willakusqanrayku ima.

⁹Huktawanmi mosqokullarqantaq, hinaspa wawqenkunaman chayta willarqan: — Kunanmi mosqokullanitaq huktawan: intin, killan, chunka hukniyoq ch'askakunapiwan ñoqaman k'umuykamushasqaku, nispa.

¹⁰Taytanmanpas wawqenkunamanpas chayta willallarqantaq, hinan taytanqa payta phiñarispa nirqan: — ¿Imataq kay mosqokusqaykiri? ¿Ñoqapas mamaykipas, wawqeykikunapas qanman pampakama k'umuykukuspachu hamusqaykiku? nispa.

¹¹Wawqenkunan payta envidiakurqanku, taytantaq ichaqa chaykunapi yuyaymanarqan.

¹²Chaymantataq wawqenkunaqa taytankuq uywanta michimuq Shehemta ripurqanku.

¹³Israeltaq Joseta nirqan: — Wawqeykikunan Shehempi uywata michishanku. Hamuy, paykunaman kachasqayki, nispa. Paytaq, risaqmi, nirqan.

¹⁴Hinan Israelqa payta nirqan: — Chhaynaqa, phaway, qhawarqamuy imaynachus wawqeykikunaq kashasqanta, imaynataqchus uywakunapas kashasqantawan, hinaspa willawanki, nispa. Ahinatan Hebrón wayq'omanta kacharqan, hinan Joseqa Shehemman chayarqan.

¹⁵Huk runan paywan tuparqan campopi chinkasqa purishaqtin, hinan chay runaqa payta tapuykurqan: — ¿Imatan maskhashanki? nispa.

¹⁶Josetaq kutichirqan: — Wawqeykunatan maskhashani, ama hinachu kay, willaykuway maypichus michishasqankuta, nispa.

¹⁷Chay runataq nirqan: — Ñan kaymanta ripunkuña, ñoqan paykunata uyarirqani: Haku Dotanta, niqta, nispa. Chaymi Joseqa wawqenkuna maskhaq rirqan, hinaspan Dotanpi paykunata tarimurqan.

¹⁸Paykunataq karumanta Joseta rikuspa, manaraq qayllankumanpas chayashaqtin, payta wañuchinankupaq rimanakurqanku:

¹⁹— Kayqa, mosqokuq hamushan.

²⁰Kunanqa wañurqachisun, hinaspa ch'aki p'uytuman winaykusun. Nisunchistaq: Ima phiña animalchá mikhurqon, nispa. Hinaspan yachasun imachus mosqokusqankuna kasqanta, nispa.

²¹Rubentaq chayta uyarispa paykunamanta kacharichiyta munaspa nirqan: — Ama wañuchisunchu.

²²Ama yawarta hich'aychischu, aswanpas kay ch'inneqpi kaq p'uytuman winaykuychis, amataq payta imanaychispaschu, nispa. Chaytan nirqan paykunamanta kacharichispa taytanman kutichipunanpaq.

²³Wawqenkunaman José chayaqtintaq, paykunaqa Josepa p'achanta ch'utirqorqanku, chay ancha munay qoysu p'achawan p'achakusqanta.

²⁴Hinaspan payta hap'ispa ch'usaq ch'aki p'uytuman winaykurqanku.

²⁵Hinaspataq mikhuq tiyaykurqanku, qhawarispataq rikurqanku huk t'aqa Ismael runakuna Galaadmanta hamushaqta. Chaykunan camellonkupi Egiptoman cargasharqanku q'apaq hampikunata, balsamota, mirratawan.

²⁶Hinan Judaqa wawqenkunata nirqan: — ¿Ima allintaq kanman wawqenchista wañuchispanchis, wañusqantapas pakaykusqanchis?

²⁷Aswanpas Ismael runakunaman venderqosun, ama paytaqa wañuchisunchu, payqa wawqenchismi, aychanchismi, nispa. Chaymi wawqenkunaqa: — Allinmi, nirqanku.

²⁸Negociaq Madián runakuna pasashaqtinkutaq, paykunaqa Joseta p'uytumanta horqospanku, Ismael runakunaman iskay chunka qolqeman venderqanku. Chay runakunataq Joseta Egiptoman aparqanku.

²⁹Chaymantañan Rubenqa p'uytuman kutirqan, manataq chay ukhupi Joseta tarirqanchu, hinan payqa p'achanta llakikuymanta llik'ikurqan.

³⁰Wawqenkunaman kutimuspataq nirqan: — ¡Manan wayna kapunchu! ¿Imanaykusaqtaq? nispa.

³¹Chaymi paykunaqa huk cabrachata nak'aspa Josepa p'achanta yawarcharqanku.

³²Hinaspataq chay qoysu p'achata taytankuman apachispa nirqanku: — Kaytan tarimuyku, churiykiq p'achanchu icha manachu chayta qhawaykuy, nispa.

³³Chaymi payqa chayta qhawaykuspa nirqan: — ¡Wawaypa p'achantaq! Ima phiña animalchá Josetaqa llik'irqarispa mikhurqon, nispa.

³⁴Hinaspanmi Jacobqa p'achanta llakikuymanta llik'ikurqan, luto p'achawan churaykukuspataq unayta churinmanta lutokurqan.

³⁵Hinaqtinmi llapa churinkuna llapa ususinkuna sonqochayta munarqanku, paytaq ichaqa mana sonqochasqa kayta munarqanchu, aswanpas nirqanmi: — Wawaypa kasqan Wañuy-pachakaman llakisqa uraykusaq, nispa. Hinaspanmi taytanqa Josemanta waqaykurqan.

³⁶Madián runakunataq Egiptopi Josetaqa Potifarman venderqanku, Potifarqa rey Faraonpa oficialnin guardia umallin karqan.