Read DIOSPA QHELQACHISQ Quechua GÉNESIS 42 Bible Online

GÉNESIS 42 - DIOSPA QHELQACHISQ Quechua bible

GÉNESIS 42

¹Jacobmi Egiptopi mikhuna kasqanta yachaspa, churinkunata nirqan: — ¿Imanaqtintaq qhawanakushankichis?

²Ñoqan uyarini Egipto suyupi trigo kasqanta, riychis haqayta, hinaspa rantimuychis, ahinapi ama yarqaymanta wañunanchispaq, nispa.

³Chaymi Josepa chunkantin wawqenkunaqa Egiptota rirqanku trigo rantikuq,

⁴ichaqa manan Jacobqa Josepa wawqen Benjaminta wawqenkunatawan kacharqanchu, payqa nirqanmi: Paqtan imapas payta sucedenman, nispa.

⁵Israelpa churinkunataq riqkunawan kuska rantikuq rirqanku, Canaán suyupi yarqay kasqanrayku.

⁶Joseqa chay suyupin kamachikuq karqan, paymi chay suyu llapa runakunaman venderqan. Hinan Josepa wawqenkunaqa chayarqanku, hinaspanmi payman pampakama k'umuykukurqanku.

⁷Josetaq wawqenkunata rikuspa reqsirqorqan, ichaqa mana reqsiq tukuspanmi paykunata k'arak simiwan rimapayarqan: — ¿Maymantataq hamunkichis? nispa. Paykunataq kutichirqanku: — Canaanmantan hamuyku mikhuyta rantikuq, nispa.

⁸Joseqa reqsirqanmi wawqenkunata, paykunataq ichaqa mana payta reqsirqankuchu.

⁹Chaymi Joseqa yuyarirqan paykunamanta mosqokusqankunata, hinaspan paykunata nirqan: — Qhamiyaqmi kankichis, suyupi mana hark'asqa cheqasta qhawaraqmi hamunkichis, nispa.

¹⁰Paykunataq kutichirqanku: — Manan, wiraqochayku, aswanpas kamachiykikunaqa mikhuyta rantikuqmi hamuyku.

¹¹Llapallaykun ch'ulla qhariq churinkuna kayku, honrado runakunan kayku, manan qhamiyaq runakunachu kayku, nispa

¹²Josetaq ichaqa paykunata nirqan: — Manan, suyupi mana hark'asqa cheqasta qhawaraqmi hamunkichis, nispa.

¹³Paykunataq kutichirqanku: — Kamachiykikunaqa chunka iskayniyoq wawqekunan kayku, Canaán suyupi tiyaq qhariq churinkuna, sullk'akaq wawqeykuqa taytaykuwanmi kunan kashan, hukkaqtaqmi ichaqa mana kapunchu, nispa.

¹⁴Josetaq paykunata nirqan: — Ñoqaqa niykichismi qhamiyaqkunapunin kankichis,

¹⁵ichaqa kaypin reqsichikunkichis: Faraonpa sutinpin jurani, manan kaymanta lloqsinkichischu sullk'a wawqeykichis hamunankama.

¹⁶Hukniykichista kachaychis wawqeykichista pusamunanpaq, qankunataq preso qhepaychis. Hinan yachakunqa rimasqaykichisqa cheqaqpuni kasqan, mana chayqa, Faraonpa sutinpin jurani, qhamiyaqpuni kasqaykichista, nispa.

¹⁷Hinaspan llapankuta huñullata carcelman wisq'achirqan kinsa p'unchaypaq.

¹⁸Kinsakaq p'unchaypitaq Joseqa paykunata nirqan: — Ñoqaqa Diostan manchakuni. Kayta ruwaychis, chaymi kawsankichis:

¹⁹— Honrado runakuna kankichis chayqa, huknin wawqeykichis carcelpi preso qhepachun, qankunataq riychis, trigota apaychis wasiykichispi kaqkuna mikhunanpaq.

²⁰Ichaqa pusamuwankichismi sullk'a wawqeykichista, chaypin rimasqaykichis cheqaqpuni kasqanta yachasun, manataq wañunkichischu, nispa. Paykunataq ahinata ruwarqanku.

²¹Hinaspan ninakurqanku: — Cheqaqtapunin wawqenchis contra huchallikurqanchis, rikurqanchismi sonqonpa sinchi llakikusqanta, pituchakushawaqtinchispas manan payta kasurparirqanchischu, chaymi kay sinchi llakikuyqa qatishawanchis, nispa.

²²Chaymi Rubenqa paykunata nirqan: — ¿Manachu qankunata rimapayarqaykichis: Ama wayna contra huchallikuychischu, nispa? Manataq kasukurqankichischu. Kunanqa wañusqanmantan llakipi rikukushanchis, nispa.

²³Paykunaqa manan yacharqankuchu Josepa paykunata entiendeshasqanta, wawqenkunawan rimashaqtin simi t'ikraq kasqanrayku.

²⁴Josetaq paykunamanta anchhurirqan, hinaspan waqarqan. Chaymantataq paykunaman kutimuspa rimapayarqan, hinan paykuna ukhumanta Simeonta hap'ispa rikushaqtinku presota watachirqan.

²⁵Hinaspataq kamachikurqan costalninkuman trigota hunt'achinankupaq, hinaspa sapankaman qolqenkuta kutichipunankupaq costalninkuman churaykuspa, ñanpaqpas mikhunata qonankupaq. Ahinatan paykunapaq ruwarqanku.

²⁶Chaymantataq paykunaqa trigonkuta asnonkuman cargaykuspa chaymanta ripurqanku.

²⁷Hukninkutaq qorpachakusqankupi asnonman qarananpaq costalninta kicharispa, costalnin simipi qolqenta tarirqan.

²⁸Hinaspan wawqenkunata nirqan: — ¡Qolqeytan kutichimpuwasqa! ¡Kayqa costalniypin kashan! nispa. Hinaqtinmi mancharikurqanku, khatatataspataq ninakurqanku: — ¿Imatataq Diosqa kayta ruwawanchis? nispa.

²⁹Canaán suyuman chayaspataq tukuy imaymana paykunata sucedesqanta taytanku Jacobman willarqanku:

³⁰— Chay suyu kamachikuqmi k'arak simiwan rimapayawarqanku, suyu qhamiyaqta hinan hap'iwarqanku.

³¹Ñoqaykutaq payta nirqayku: Honrado runakunan kayku, manan qhamiyaqkunachu.

³²Chunka iskayniyoq wawqen kayku, huk taytallayoq, hukkaq wawqeykutaq mana kapunchu, sullk'akaqtaq taytaykuwan Canaán suyupi kunan kashan, nispa.

³³Hinan chay kamachikuqqa niwarqanku: Kaypin yachasaq honrado runakuna kasqaykichista, saqewaychis huknin wawqeykichista, wasiykichispi kaqkunaq mikhunanpaqtaq trigota apaychis.

³⁴Hinaspa sullk'a wawqeykichista pusamuwaychis mana qhamiyaqkunachu, aswanpas honrado runakuna kasqaykichista yachanaypaq. Ahinapin wawqeykichista kacharipusqaykichis, kay suyupitaq may munasqaykichista purikullankichis, nispa.

³⁵Costalninkuta paykuna tallishaqtinkutaq sapankaq costalninpi rikhurirqan qolqe khipunku, hinan paykunapas taytankupas qolqe khiputa rikuspa mancharikurqanku.

³⁶Hinan taytanku Jacobqa paykunata nirqan: — Wawaykunatan qechupushawankichis, José mana rikhurimpunchu, manallataq Simeonpas, Benjamintapas qechurqapullawankichistaqchu, ¡lliw kaykunaqa contraypin! nispa.

³⁷Chaymi Rubenqa taytanta nirqan: — Mana Benjaminta kutichimpuqtiyqa iskaynin churiyta wañuchinki. Pusallasaq, ñoqan kutichimpusqayki, nispa.

³⁸Paytaq nirqan: — Manan churiyqa qankunawan rinmanchu, wawqenpas wañupunñan, pay sapallanñan qhepan. Purisqaykichis ñanpi imaynapas pay kaqtinqa, sinchi llakikuymi yuyaq kayniypi wañuchiwanqa, nispa.