Read DIOSPA QHELQACHISQ Quechua GÉNESIS 45 Bible Online

GÉNESIS 45 - DIOSPA QHELQACHISQ Quechua bible

GÉNESIS 45

¹Manañan Joseqa waqaynin mukikuyta atirqanñachu lliwpa qayllanpi kaqkunaq ñawpaqenpi, chaymi kunkayoqta nirqan: — ¡Qayllaymanta lliwta lloqsichiychis! nispa. Hinan mana pipas paywan qheparqanchu wawqenkunawan José reqsichikushaqtin.

²Hinaspanmi qaparispa waqaykurqan, chaymi Egipto runakunapas uyarirqanku, Faraonpa wasinpi kaqkunapas uyarillarqankutaq.

³Josetaq wawqenkunata nirqan: — Ñoqan José kashani, ¿kawsashanraqchu taytay? nispa. Wawqenkunataq mana payman ima niytapas atirqankuchu, mancharisqa qayllanpi kashasqankurayku.

⁴Chaymi Joseqa paykunata nirqan: — Qayllaykamuwaychis, nispa. Paykunataq qayllaykurqanku. Paytaq nirqan: — José wawqeykichismi kani, Egiptoman vendewasqaykichis.

⁵Kunanqa ama llakikuychischu, amallataq kayman vendemuwasqaykichismanta ñakapakuychischu, Diosmi runata kawsachinanpaq ñawpaqeykichista kachamuwarqan.

⁶Ñan iskay wata yarqayña suyupi pasan, phisqa wataraqmi kashan, chaykunapin mana yapunqakuchu manallataq cosechanqakupaschu.

⁷Diosmi ñawpaqeykichista kachamuwarqan, qhepa mirayniykichista kay pachapi waqaychanapaq, may utirayanatapuni kawsachinasuykichispaq.

⁸Chay hinaqa, manan qankunachu kachamuwarqankichis, aswanpas Diosmi, paymi churawarqan Faraonpa yuyaychaqnin kanaypaq, lliw wasinpipas Egipto suyuntinpipas kamachikuq kanaypaqwan.

⁹Usqhaylla taytayman riychis, hinaspa nimuychis: José churiykin kay hinata nin: “Diosmi Egiptontinpi kamachikuqta churawan, hampuy, ama qhepamuychu.

¹⁰Gosén hallp'apin tiyanki, qayllaypin kanki, qanpas wawaykikunapas, nietoykikunapas, uywaykikunapas, lliw ima hayk'a kaqniykipas.

¹¹Chaypin mikhuchisqayki, ama wakchayayta muchunaykipaq qanpas aylluykipas, lliw ima hayk'a kaqniykipas, phisqa wata yarqayraqmi kashan, nispaykichis”, nispa.

¹²Kayqa qhawashawankichismi, qan wawqéy Benjaminpas qhawashawankin Josepuni rimasqayta.

¹³Taytayman willamuychis Egiptopi lliw qhapaq-atiyniyta, hinallataq lliw rikusqaykichistapas. Usqhaylla taytayta pusamuychis, nispa.

¹⁴Hinaspanmi wawqen Benjaminta oqllaykukuspa waqarqan, Benjaminpas waqallarqantaq oqllayninpi.

¹⁵Hinaspataq llapa wawqenkunata much'aykurqan, paykunata oqllaykuspataq waqarqan. Chay qhepatataq wawqenkunaqa paywan rimarqanku.

¹⁶Faronpa wasinpi kaqkunataq uyarirqanku: Josepa wawqenkunan hamusqa, nispa nisqata. Chaywanmi kusikurqan Faraonpas oficialninkunapas.

¹⁷Chaymi Faraonqa Joseta nirqan: — Wawqeykikunata niy: Cargaychis uywaykichisman, hinaspa riychis, Canaán suyuman kutiychis.

¹⁸Hinaspataq taytaykichiswan aylluykichiskunawan kayman hampuychis. Ñoqan qosqaykichis Egiptopi allinnin hallp'ata, suyupi allinkaqtataq mikhunkichispas, nispa.

¹⁹Kamachillaytaq: Kay Egipto suyumanta apaychis carretakunata wawaykichispaq warmiykichispaq, hinaspa pusamuychis taytaykichista, hampuychistaq.

²⁰Ama kaqniykichismantaqa llakikuychischu, Egipto suyu qhapaq kayqa qankunaqmi kanqa, nispa.

²¹Israelpa churinkunataq chay hinata ruwarqanku, Josetaq paykunaman carretakunata qorqan Faraonpa kamachikusqanman hina, ñanninkupaqpas mikhunata qorqan.

²²Sapankamantaq mosoq p'achata qorqan, Benjaminmanqa kinsa pachak qolqeta, phisqa sayay p'achatawan qorqan.

²³Taytanmantaq apachirqan Egiptopi allinnin kaqkunata chunka asnopi cargarisqata, chunka china asnopitaq trigota, t'antata, mikhunatawan. Mikhuna kaqtaqa taytanpa ñanpi qoqawanpaq.

²⁴Hinaspan wawqenkunata kacharparispa nirqan: — Aman ñanpi phiñanakunkichischu, nispa. Paykunataq ripurqanku.

²⁵Egiptomanta ripuspankun, Canaán suyuman chayarqanku, taytanku Jacobman.

²⁶Hinaspan payman willarqanku: — Kawsashasqan Joseqa, paymi Egipto suyuntinpi kamachikuq kasqa, nispa. Chaymi Jacobqa musphaspa utirqanraq, manataq paykunata creerqanchu.

²⁷Josepa lliw rimasqanta payman willaqtinku, payta apanapaq carretakunata apachimusqanta rikuqtinmi Jacobpa sonqonqa kawsarirqan.

²⁸Chaymi nirqan: — ¡May allinmi! ¡Churiy Joseqa kawsashasqaraqmá! Risaq, hinaspa payta rikumusaq manaraq wañukapushaspay, nispa.