Read DIOSPA QHELQACHISQ Quechua GÉNESIS 47 Bible Online

GÉNESIS 47 - DIOSPA QHELQACHISQ Quechua bible

GÉNESIS 47

¹Joseqa Faraonman rispanmi willamurqan: — Taytaymi wawqeykunapiwan ovejakunantin, wakakunantin, lliw imaymanantin Canaán suyumanta chayamunku, Gosén hallp'apin kunan kashanku, nispa.

²Wawqenkunamantataq phisqata akllarqan, hinaspan Faraonpa ñawpaqenman pusarqan.

³Faraontaq wawqenkunata nirqan: — ¿Ima llank'aqtaq kankichis? nispa. Paykunataq Faraonman kutichirqanku: — Kamachiykikunaqa oveja michiqkunan kayku ñawpa taytaykumantapacha,

⁴kay hallp'api tiyaqmi hamuyku, manan pasto kanchu ovejaykupaq, sinchipunin Canaán suyupi yarqay kashan. Chaymi, kunan valekuykiku Gosén hallp'api tiyanaykupaq, nispa.

⁵Hinan Faraonqa Joseta nirqan: — Taytaykiwan wawqeykikunawanmi chayamusqasunkiku.

⁶Egipto hallp'aqa munayniykipin kashan, allinnin hallp'api tiyachiy taytaykita wawqeykikunata, Gosén hallp'api tiyachunku. Kanmantaq paykunapi allin yuyayniyoq runakuna chayqa, chaykunata churay uyway michiqkunata kamachinankupaq, nispa.

⁷Joseqa taytan Jacobtapas Faraonman reqsichinanpaq pusaykullarqantaqmi. Jacobtaq Faraonta samincharqan.

⁸Faraontaq Jacobta nirqan: — ¿Hayk'a watayoqmi kanki? nispa.

⁹Jacobtaq Faraonman kutichirqan: — Purikuqlla kasqayqa pachak kinsa chunka watan, pisillan mana allintaqmi wataykunaqa, manan chayanraqchu ñawpa taytaykunaq kawsasqanman, purikuqlla kasqanku watamanpas, nispa.

¹⁰Hinaspanmi Jacobqa Faraonta samincharqan, chaymantataq Faraonpa qayllanmanta lloqsirqan.

¹¹Ahinatan Joseqa tiyachirqan taytanta wawqenkunatapas, paykunamanmi qorqan Egiptopi allinnin hallp'ata, Ramsés hallp'api, Faraonpa kamachikusqanman hina.

¹²Joseqa mikhuchispanmi uywarqan taytanta wawqenkunata, taytanpa llapa ayllunta, wawakunaq kasqanman hina.

¹³Manataq mikhuy karqanchu chay suyuntinpi sinchi yarqay kasqanrayku, chaymi yarqayta muchurqan Egipto suyupas Canaán suyupas.

¹⁴Joseqa huñurqan Egipto suyu Canaán suyu llapa qolqeta, trigota paymanta rantiqtinku, hinaspan chay qolqeta Faraonpa palacionman apaykurqan.

¹⁵Egipto suyu qolqe Canaán suyu qolqe tukukuqtintaq, Egiptontin runa Joseman rirqan: — ¡Mikhuyta qowayku! ¿Imanaqtintaq qolqeyku tukukuqtin qan kashaqtiyki wañusaqku? nispa.

¹⁶Josetaq nirqan: — Qolqetaq tukukapun chayqa, uywaykichista apamuychis, ñoqataq uywaykichismanta mikhuyta qosqaykichis, nispa.

¹⁷Chaymi paykunaqa uywankuta Joseman apamurqanku, Josetaq paykunaman mikhuyta qorqan caballokunapaq, ovejakunapaq, wakakunapaq, asnokunapaqwan. Chay watan paykunaman mikhuchirqan llapa uywankumanta.

¹⁸Chay wata tukukuqtintaq, iskaykaq watapi Joseman hamurqanku, hinaspan payta nirqanku: — Manan patronniykumanta pakaykuchu cheqaqtapuni qolqeyku tukukapusqanta, uywaykupas ñan uywaykiña, manan imapas qonaykupaq kanñachu, aswanpas cuerpollaykuñan hallp'aykupiwan kashan.

¹⁹¿Imanaqtintaq kashaqtiyki chinkarisaqku, ñoqaykupas hallp'aykupas? Mikhuywan rantiwayku ñoqaykutapas hallp'aykutapas, ñoqaykutaq hallp'aykupiwan Faraonpa kaqninkuna kapusaqku. Muhutataq qowayku kawsanaykupaq, amataq wañusaqkuchu, amallataq hallp'apas purunyachunchu, nispa.

²⁰Chaymi Joseqa Faraonpaq rantirqan Egiptontin llapa hallp'ata, Egipto runakunaqa sapankan hallp'ankuta venderqanku, sinchitapuni yarqayta muchusqankurayku. Hinan hallp'aqa Faraonpa kapurqan,

²¹runakunatataq kamachiman tukuchipurqan Egipto suyuntinpi.

²²Sacerdotekunaq hallp'allantan mana rantirqanchu, sacerdotekuna Faraonmanta mikhunankupaq chaskisqankurayku, chaytan paykunaqa mikhurqanku, chaymi hallp'ankuta mana venderqankuchu.

²³Joseqa runakunatan nirqan: — Kunanqa Faraonpaq rantisqañan kankichis, qankunapas hallp'aykichispas. Kayqa muhu tarpunaykichispaq,

²⁴cosechata hoqarispan phisqa costalmanta hukninta Faraonman qopunkichis, tawantin costaltaq qankunapaq kanqa, chakrakunata tarpunaykichispaq, qankunapas, wawaykichispas, wasiykichispi kaqkunapas mikhunaykichispaqwan, nispa.

²⁵Paykunataq kutichirqanku: — Kawsachiwarqankikun, allin rikch'akusunki chayqa, Faraonpa kamachinmi kapusaqku, nispa.

²⁶Hinaqtinmi Joseqa Egipto suyupi kamachikuyta churarqan, phisqa costalmanta hukninta Faraonpaq t'aqanapaq, chaymi kunankama kashanraq. Sacerdotekunallan mana imatapas qonankuchu, hallp'ankuqa manan hayk'aqpas Faraonpachu kapurqan.

²⁷Israel runakunan Egipto suyupi tiyarqan, Gosén hallp'api. Chaypin tiyaykurqanku, anchatapunitaq askhayarqankupas.

²⁸Jacobmi Egipto suyupi tiyarqan chunka qanchisniyoq watata, pachak tawa chunka qanchisniyoq watata kawsanankama.

²⁹Israelmi wañukapunanta reparakuspa, churin Joseta waqyachimuspa nirqan: — Sumaqta qhawariwanki chayqa, valekuykin, makiykita phakay ukhuman churaykuy, hinaspa prometeway hunt'anaykipaq. Valekuykin ama kay Egiptopi p'ampawanaykipaq.

³⁰Ñawpa taytaykunawan ch'illmiykapuqtiyqa Egiptomanta apapuwanki, hinaspa p'ampawanki paykunaq aya p'ampananpi, nispa. Josetaq kutichirqan: — Nisqaykita hinan ruwasaq, nispa.

³¹Chaymi Israelqa nirqan: — Jurapuway, nispa. Josetaq paypaq jurarqan. Hinan Israelqa k'umuykukurqan puñuna sawna patapi.