Read DIOSPA QHELQACHISQ Quechua GÉNESIS 48 Bible Online

GÉNESIS 48 - DIOSPA QHELQACHISQ Quechua bible

GÉNESIS 48

¹Chaykuna qhepatataq Joseman willarqanku: — Taytaykin onqoshan, nispa. Hinan payqa iskaynin churinkunata pusarikurqan, Manasestawan Efraintawan.

²Jacobmantaq willarqanku: — José churiykin hamushasunki, nispa. Hinan Israelqa kallpachakuspa puñuna patapi tiyarirqan,

³hinaspan Joseta nirqan: — Tukuy-atiyniyoq Diosmi Luz nisqa llaqtapi rikhuriwarqan Canaán suyupi, hinaspa saminchawarqan:

⁴Ñoqan anchata askhayachisqayki, askha llaqtakunatan qanmanta paqarichisaq, qhepa mirayniykimantaq kay hallp'ata wiñay herenciapaq qosaq, nispa.

⁵Kunan iskaynin churiyki Efrainwan Manaseswan, manaraq qanman hamushaqtiy Egipto suyupi nacepurqasunki, chaykunaqa ñoqaqmi. Imaynan Rubenpas Simeonpas, ahinan ñoqaq kanku.

⁶Paykuna qhepata churiyasqaykin ichaqa qanpa kanqa, wawqenkunawanñan chaykunaqa herenciayoq kanqaku.

⁷Padan-arammanta hamushaqtiymi mamayki Raquel wañuykuwarqan Canaán suyupi, Efrataman chayanapaq kuskan legua hinaraq kashaqtin, chay Efrata ñanpin p'amparqani, nispa. (Chaymi Belén llaqta).

⁸Chayllamanmi Israelqa Josepa wawankunata rikurqan, hinaspan nirqan: — ¿Pikunataq kaykunari? nispa.

⁹Josetaq taytanman kutichirqan: — Kayqa Diospa qowasqan churiykunan, nispa. Paytaq nirqan: — Asuykachimuway paykunata saminchanaypaq, nispa.

¹⁰Israelpa ñawinqa yuyaq-kayninwan sinchi ayphañan kapurqan, manan rikuyta atirqanñachu. Taytanmanmi paykunata asuykachimurqan, chaymi paykunata much'aykurqan, hinaspan oqllaykurqan.

¹¹Chaymantataq Israelqa Joseta nirqan: — Manan ñoqaqa yuyarqaniñachu uyaykita rikuyta, kayqa Diosmi rikuchillawantaq wawaykikunatapas, nispa.

¹²Josetaq paykunata horqorqan taytanpa moqon chawpimanta, hinaspataq pampaman k'umuykurqan.

¹³Chaymantataq Joseqa iskayninkuta hap'irqan, Efrainta pañanpi Manasestataq lloq'enpi, hinaspan paykunata Israelman asuykachirqan, chaymi Efrainqa Israelpa lloq'enpi karqan Manasestaq pañanpi.

¹⁴Israeltaq makinta haywarispa cruzapunachirqan, hinaspan paña makinta sullk'a Efrainpa uman pataman churaykurqan, lloq'e makintataq phiwi Manasespa uman pataman.

¹⁵Hinaspan Joseta samincharqan: — Taytay Abrahamwan Isaacwan purisqanku qayllapi kaq Dios, kasqaymantapacha kay p'unchaykama uywaqniy Dios,

¹⁶lliw mana allinmanta qespichiwaqniy Ángel, kay waynakunata saminchachun. Paykuna hawa yuyariwachunku, paykuna hawa Abrahamtapas Isaactapas yuyarichunku, kay pachapitaq anchata askhayachunku, nispa.

¹⁷Josetaq ichaqa taytanpa paña makinta Efrainpa uman pataman churaykuqta rikuspa, mana chaywan kusisqachu karqan, chaymi taytanpa makinta hap'iykurqan Efrainpa umanmanta Manasespa umanman cambiananpaq.

¹⁸Nirqantaq: — Ama taytáy chhaynatachu ruway, kaykaqmi phiwiyqa, umanman paña makiykita churaykuy, nispa.

¹⁹Taytantaq mana munarqanchu, nirqanmi: — Chaytaqa yachanin, churíy, chaytaqa yachanin. Manasespas llaqtan kanqa, hatunyachisqataq kanqa, sullk'a wawqenmi ichaqa paymantapas aswanraq kanqa, mirayninpas askha llaqtamanmi tukunqa, nispa.

²⁰Chay p'unchaypin paykunata samincharqan: — Sutiykichispin Israel runakunaqa saminchanqaku “Efrainta hina Manasesta hina Diosqa saminchasunki”, nispa. Ahinatan Efrainta ñawpaqman churarqan Manasestataq qhepaman.

²¹Hinaspanmi Israelqa Joseta nirqan: — Ñoqaqa wañukapusaqñan, Diosmi ichaqa qankunawan kashanqa, ñawpa taytaykichiskunaq hallp'anmantaq kutichipusunkichis.

²²Ñoqan qanman Shehemta qoyki wawqeykikunaqmanta astawanraq, chaytan ñoqaqa Amor runakunamanta qechurqani, espadaywan wach'inaywan maqanakuspa, nispa.