Read DIOSPA QHELQACHISQ Quechua GÉNESIS 5 Bible Online

GÉNESIS 5 - DIOSPA QHELQACHISQ Quechua bible

GÉNESIS 5

¹Kaymi Adanpa miraynin qelqa. Diosqa runata kamaspan Diosman rikch'akuqta ruwarqan.

²Qharita warmitawanmi kamarqan, hinaspan paykunata samincharqan. Kamasqa kasqanku p'unchaytaq paykunata “Runa” nispa suticharqan.

³Adanqa pachak kinsa chunka watayoq kashaspanmi, churiyarqan huk qhari wawata payman rikch'akuq rikch'ayniyoqta, suticharqantaq Set-ta.

⁴Set-ta churiyasqan qhepatan Adanqa kawsarqan pusaq pachak watatawanraq. Churiyallarqantaqmi qhari wawakunatapas warmi wawakunatapas.

⁵Adanmi kawsarqan isqon pachak kinsa chunka watakama, hinaspan wañukapurqan.

⁶Setmi pachak phisqayoq watayoq kashaspa churiyarqan Enosta.

⁷Enosta churiyasqan qhepatataq Setqa kawsarqan pusaq pachak qanchisniyoq watatawanraq. Churiyallarqantaqmi qhari wawakunatapas warmi wawakunatapas.

⁸Setmi kawsarqan isqon pachak chunka iskayniyoq watakama, hinaspan wañukapurqan.

⁹Enosmi isqon chunka watayoq kashaspa churiyarqan Cainanta.

¹⁰Cainanta churiyasqan qhepatataq Enosqa kawsarqan pusaq pachak chunka phisqayoq watatawanraq. Churiyallarqantaqmi qhari wawakunatapas warmi wawakunatapas.

¹¹Enosmi kawsarqan isqon pachak phisqayoq watakama, hinaspan wañukapurqan.

¹²Cainanmi qanchis chunka watayoq kashaspa churiyarqan Mahalaleelta.

¹³Mahalaleelta churiyasqan qhepatataq Cainanqa kawsarqan pusaq pachak tawa chunka watatawanraq. Churiyallarqantaqmi qhari wawakunatapas warmi wawakunatapas.

¹⁴Cainanmi kawsarqan isqon pachak chunkayoq watakama, hinaspan wañukapurqan.

¹⁵Mahalaleelmi soqta chunka phisqayoq watayoq kashaspa churiyarqan Jaredta.

¹⁶Jaredta churiyasqan qhepatataq Mahalaleelqa kawsarqan pusaq pachak kinsa chunka watatawanraq. Churiyallarqantaqmi qhari wawakunatapas warmi wawakunatapas.

¹⁷Mahalaleelmi kawsarqan pusaq pachak isqon chunka phisqayoq watakama, hinaspan wañukapurqan.

¹⁸Jaredmi pachak soqta chunka iskayniyoq watayoq kashaspa churiyarqan Enocta.

¹⁹Enocta churiyasqan qhepatataq Jaredqa kawsarqan pusaq pachak watatawanraq. Churiyallarqantaqmi qhari wawakunatapas warmi wawakunatapas.

²⁰Jaredmi kawsarqan isqon pachak soqta chunka iskayniyoq watakama, hinaspan wañukapurqan.

²¹Enocmi soqta chunka phisqayoq watayoq kashaspa churiyarqan Matusalenta.

²²Matusalenta churiyasqan qhepatataq Enocqa kinsa pachak watatawanraq kawsarqan, Diospa munayninta ruwaspallapuni. Churiyallarqantaqmi qhari wawakunatapas warmi wawakunatapas.

²³Enocmi kawsarqan kinsa pachak soqta chunka phisqayoq watakama.

²⁴Paymi Diospa munayninta ruwaspallapuni purirqan, hinaspan mana kapurqanchu, Dios payta pusakapusqanrayku.

²⁵Matusalenmi pachak pusaq chunka qanchisniyoq watayoq kashaspa churiyarqan Lamecta.

²⁶Lamecta churiyasqan qhepatataq Matusalenqa kawsarqan qanchis pachak pusaq chunka iskayniyoq watatawanraq. Churiyallarqantaqmi qhari wawakunatapas warmi wawakunatapas.

²⁷Matusalenmi kawsarqan isqon pachak soqta chunka isqonniyoq watakama, hinaspan wañukapurqan.

²⁸Lamecmi pachak pusaq chunka iskayniyoq watayoq kashaspa qhari wawata churiyarqan,

²⁹suticharqantaq Noeta: — Kaymi ruwayninchismanta samarichiwasun, kay pachata Señor Diospa ñakasqanraykun sinchita llank'ashanchis, nispa.

³⁰Noeta churiyasqan qhepatataq Lamecqa kawsarqan phisqa pachak isqon chunka phisqayoq watatawanraq. Churiyallarqantaqmi qhari wawakunatapas warmi wawakunatapas.

³¹Lamecmi kawsarqan qanchis pachak qanchis chunka qanchisniyoq watakama, hinaspan wañukapurqan.

³²Noetaq phisqa pachak watayoq kashaspa churiyarqan Semta, Camta, Jafet-tawan.