Read DIOSPA QHELQACHISQ Quechua GÉNESIS 6 Bible Online

GÉNESIS 6 - DIOSPA QHELQACHISQ Quechua bible

GÉNESIS 6

¹Kay pachapin runakuna mirayta qallarirqan, chaymi paykunaq warmi wawankuna nacerqan.

²Hinan Diospa wawankunaqa runakunaq ususinkunata sumaq rikch'ayniyoq kasqanta qhawarispa, lliwmanta akllarikuspa pi munasqankuwan casarakurqanku.

³Señor Diostaq nirqan: — Espirituyqa manan wiñaypaqchu runapi kashanqa, payqa wañuq runallan, cheqaqtapunin runaqa aychalla. P'unchayninkunapas pachak iskay chunka watalla kachun, nispa.

⁴Diospa wawankunan runakunaq ususinkunawan tiyaspanku, qhari wawakunata churiyarqanku. Hinan chay tiempopipas qhepamanpas kay pachapi hatuchachaq runakuna karqan. Chaykunan ñawpaqmantapacha kallpasapa mentasqa qharikuna karqanku.

⁵Señor Diosmi rikurqan kay pachapi runakunaq sinchi mana allin kasqanta, sonqonkuq lliw yuyaykusqanpas mana allinllapuni kasqantawan.

⁶Hinan Señor Diosqa khuyayta llakikurqan kay pachapi runata ruwasqanmanta, sonqontapas mayta nanachikurqan.

⁷Chaymi Señor Diosqa nirqan: — Kay pachapi runa kamasqayta ch'usaqyachisaq, runatapas uywatapas suchuq animaltapas phalaq animalkunatapas, chaykunata ruwasqaymantan khuyayta llakikuni, nispa.

⁸Noetaq ichaqa Señor Diospa khuyapayasqan karqan.

⁹Kaymi Noemanta willakuykuna: Noeqa karqan chanin qharin, wiñaymasinkuna ukhupi allin kawsaq, payqa Diospa munayninta ruwaspallapunin kawsarqan.

¹⁰Noepa churinkunan kinsa karqan: Sem, Cam, Jafetpiwan.

¹¹Runakunaqa Diospa qayllanpin waqllipurqanku, kay pachantinpitaq lliw mana chanin-kaypas q'oñirirqan.

¹²Diosmi kay pachata qhawarimurqan, hinan waqllisqa kasharqan, lliw runan kay pachapi puriyninpi waqllipurqan.

¹³Chaymi Noeta nirqan: — Llapan kawsaqtan p'uchukachipusaq, paykuna hawa kay pacha mana chanin-kaywan hunt'a kashasqanrayku, kunanqa kay pachatawan kuskata paykunata p'uchukachipusaq.

¹⁴Ciprés sach'a kurkumanta arcata ruway, chaypitaq wasikunata ruway, ukhuntawan hawantawantaq breawan llut'anki.

¹⁵Kay hinatan chayta ruwanki: wask'anta pachak kinsa chunka phisqayoq metrota, anchonta iskay chunka iskayniyoq metro kuskanta, sayaynintataq chunka kinsayoq metro kuskanta.

¹⁶Arcatan ruwanki kinsa pata altosniyoqta, chaytan tukunki qempunpi huk kuskan metro sayay ventanayoqta, hinaspa chayta qatanki, punkuntataq ladonpi churanki.

¹⁷Ñoqan kay pachata para unuwan millp'uchisaq, kay pachapi hayk'an kawsaqta p'uchukachinaypaq, hayk'an kay pachapi kaqmi llapan wañunqa.

¹⁸Ñoqataq qanwan rimanakusaq, qanmi arcaman haykunki warmiykiwan, hinallataq churiykikunapas warmintinkama qanwan kuska haykunqa.

¹⁹Hayk'an kawsaqmantataq sapanka t'aqamanta chinantin orqontintakama chayman haykuchinki, qanwan kawsanankupaq.

²⁰Phalaq animalkunamanta t'aqanman hina, puriq animalkunamanta t'aqanman hina, pampanta lliw suchuqkunamanta t'aqanman hina, sapanka t'aqamanta iskaykama qanwan haykunqaku kawsanankupaq.

²¹Hinallataq imaymana niraq mikhunatapas huñuy, hinaspa apaykuy qanpas animalkunapas chayta mikhunaykichispaq, nispa.

²²Noetaq Diospa tukuy kamachisqanman hina ruwarqan.