Read DIOSPA QHELQACHISQ Quechua GÉNESIS 8 Bible Online

GÉNESIS 8 - DIOSPA QHELQACHISQ Quechua bible

GÉNESIS 8

¹Diostaq Noemanta yuyarikurqan, hinallataq arcapi paywan kaq lliw animalkunamantapas, lliw uywakunamantapas. Diosmi kay pachaman wayrachimurqan, hinan unuqa pisiyayta qallarirqan.

²Chinkay-chinkay unu pukyukunataq wisq'akapurqan, hinallataq hanaq pacha phawchikunapas, manañan parampurqanchu.

³Hinaqtinmi unuqa kay pachapi ch'akiykapusharqan kayman chayman aytikuspa. Pachak phisqa chunka p'unchay qhepatan unuqa pisiyaykapurqan,

⁴hinan arcaqa tiyaykurqan Ararat orqo-orqopi, qanchiskaq killaq chunka qanchisniyoq p'unchayninpi.

⁵Unun pisiyasharqan chunkakaq killakama, chunkakaq killa qallariypitaq orqokunaq uman rikhurirqan.

⁶Tawa chunka p'unchay qhepatataq, Noeqa arcapi ventana ruwasqanta kicharirqan,

⁷hinaspan alqamarita kacharqan, chaytaq lloqsispa muyurqan unu kay pachapi ch'akipunankama.

⁸Hinallataq palomatapas kacharqan kay pachapi unu ch'akipusqañachus chayta yachananpaq,

⁹palomataq mana tarirqanchu maypi tiyaykunanta kay pachantinpi unu kashasqanrayku. Chaymi arcaman kutimpurqan, hinaqtinmi Noeqa hap'ispa kasqan arcaman apaykurqan.

¹⁰Ahinapin qanchis p'unchaytawanraq suyarqan, yapamantataq arcamanta palomata kacharqan.

¹¹Hinan palomaqa payman kutipurqan llanllashaq olivo raphita chhurunanpi achuykusqa. Chaymi Noeqa yacharqan kay pachapi unu ch'akipusqanta.

¹²Hinan huk qanchis p'unchaytawanraq suyarqan, hinaspan palomata kachallarqantaq, manañataq astawan palomaqa payman kutimpurqanchu.

¹³Soqta pachak hukniyoq watayoq Noé kashaqtintaq, ñawpaqkaq killa qallariy p'unchayta, unuqa kay pachapi ch'akipurqan. Hinan Noeqa arcaq qatanta kicharispa qhawarirqan, hinaspan rikurqan kay pachaqa ch'akipusqanta.

¹⁴Iskaykaq killaq iskay chunka qanchisniyoq p'unchayninpitaq kay pachaqa ch'akiña kapurqan.

¹⁵Diostaq Noeta nirqan:

¹⁶— Arcamanta warmiykipiwan lloqsiy, hinallataq churiykikunapas warmintinkama.

¹⁷Horqopuy llapa t'aqa animalkunata, phalaq animalkunata, uywakunata, pampanta llapa suchuqkunata. Ripuchunku kay pachantinman, mirachunku askhayachunkutaq, nispa.

¹⁸Chaymi Noeqa warmintin lloqsirqan, hinallataq churinkunapas warmintinkama.

¹⁹Kaqllataq arcamanta lloqsirqan llapa animalkuna, llapa phalaq animalkunapas, pampanta llapa suchuqkunapas t'aqankuman hina.

²⁰Noetaq Señor Diospaq huk altarta perqaspaña, hap'irqan llapa sacrificana animalmanta, llapa sacrificana phalaq animalmanta, hinaspanmi altarpi ruphachispa sacrificiokunata haywarqan.

²¹Señor Diostaq sumaq q'apayta chaskispa sonqonpi nirqan: — Manañan runa hawa kay pachata ñakasaqchu, wayna kasqanmantapachan runaq sonqonqa mana allin yuyaykuq, manañan astawan lliw kawsaqta ch'usaqyachisaqchu kunan ruwasqayta hinaqa.

²²Chaywanpas kay pacha kanankamaqa kanqaraqmi tarpuypas, cosechapas, chiripas, q'oñipas, poqoypas, chirawpas, p'unchaypas, tutapas, nispa.