Read DIOSPA QHELQACHISQ Quechua 2 SAMUEL 10 Bible Online

2 SAMUEL 10 - DIOSPA QHELQACHISQ Quechua bible

2 SAMUEL 10

¹Amón runakunaq reynin Nahas wañupuqtinmi, churin Hanunqa paypa rantinpi kamachikurqan.

²Hinan Davidqa nirqan: — Taytanpas khuyapayawaqmi, ñoqapas churin Hanunman oficialniykunata kachasaq taytanmanta llakikuyninpi sonqochaykuqta, nispa. Davidpa oficialninkuna Amón suyuman chayaqtintaq,

³chay suyupi umalli qharikuna wiraqochanku Hanunta nirqanku: — ¿Taytaykita munakuspa Davidqa sonqochaqta kachamusqasuykitachu yuyanki? Aswanpas, ¿manachu llaqtanchista reqsinanpaq, qhamiyananpaq, chay qhepatataq atipawananchispaq kachamunman? nispa.

⁴Hinan Hanunqa Davidpa oficialninkunata hap'ispa kuskan sunkhanta k'isurqachirqan, p'achantapas kuskanta sikipatankama wit'urqachirqan, hinaspa kacharparipurqan.

⁵Paykunataq sinchi p'enqasqa karqanku, hinan Davidqa chayta yacharqospa willaqta kacharqan: Jericó llaqtapi qhepakuychis sunkhaykichis wiñanankama, chaymantaña kutimpunkichis, nispa nimunankupaq.

⁶Amón runakunataq Davidwan cheqnichikusqankuta reparakuspa mink'akurqan Bet-rehot llaqtamanta Soba llaqtamantawan iskay chunka waranqa Aram suyu soldadokunata, Maaca llaqta reytataq waranqa soldadontinta, Tob llaqtamantataq chunka iskayniyoq waranqa soldadokunata.

⁷Davidpas chayta yachaspa, ejército umalli Joabta kachallarqantaq llapan soldadonkunatawan.

⁸Amón runakunataq lloqsimuspa llaqta punku haykunapi maqanakuypaq wakichikurqanku. Sobamanta Bet-rehobmanta Aram soldadokuna Maacamanta Tobmantawan soldadokunataq llapanku sapaq campopi kasharqanku.

⁹Joabtaq ñawpaqpi qhepapi awqankuna kasqanta rikuspa, aswan qharinkunata soldadonkunamanta akllarqospa wakichirqan Aram soldadokunawan maqanakunanpaq.

¹⁰Wakin soldadokunatataq wawqen Abisaiman hap'iykachispa Amón runakunawan maqanakunanpaq wakichirqan.

¹¹Nirqantaq: — Aram soldadokuna atipawaqtinqa qan yanapawanki, Amón runakuna atipasuqtiykitaq ñoqa yanapasqayki.

¹²¡Kallpachakusun! ¡Allin qhari kasun llaqtanchisrayku, Diosninchispa llaqtankunarayku! ¡Señor Diospuni munasqanman hina ruwachun! nispa.

¹³Joabmi soldadonkunapiwan maqanakuq lloqsirqan, hinan Aram soldadokunaqa qayllankumanta ayqekurqanku.

¹⁴Amón runakunapas Aram soldadokunaq ayqepusqanta rikuspa, Abisaipa ñawpaqenmanta kutiripullarqankutaq, llaqtaman haykuspataq chaypi pakakurqanku. Chaymantataq Joabqa Amón runakunawan maqanakusqanmanta Jerusalenman kutimpurqan.

¹⁵Aram soldadokunan ichaqa Israel soldadokunaq atipasqan kasqankuta reparaspa, wakmanta huñukurqanku.

¹⁶Hadad-ezermi willaqta kacharqan Aram soldadokuna Eufrates mayu chimpamanta hamunankupaq. Hinan Helam llaqtaman hamurqanku, Hadad-ezerpa ejerciton umalli Sobacpa kamachisqan.

¹⁷Davidtaq chayta yacharqospa, llapa Israel soldadokunata huñurqorqan, hinan Jordán mayuta chimparqospa Helam-man chayarqanku. Chaypitaq Aram soldadokunaqa wakichikurqanku Davidwan tinkunankupaq, maqanakuspankutaq ichaqa

¹⁸Israel soldadokunamanta ayqekurqanku. Hinan Davidqa wañuchirqan qanchis pachak carretapi qharikunata, tawa chunka waranqa caballopi qharikunatawan, ejército umalli Sobactapas chay kikinpi wañuchillarqantaq.

¹⁹Llapan Hadad-ezerpa kamachisqan reykunataq Israel soldadokunaq atipasqan kaspanku, paykunawan allipunayta munarqanku. Hinan Israel runakunaq kamachisqan kapurqanku. Aram runakunataq chaymantapacha manaña Amón runakunata yanapaqñachu.