Read DIOSPA QHELQACHISQ Quechua 2 SAMUEL 11 Bible Online

2 SAMUEL 11 - DIOSPA QHELQACHISQ Quechua bible

2 SAMUEL 11

¹Qhepantin wata mikhuy poqoy tiempopi reykunaq maqanakuyman lloqsinan tiempopin Davidqa Joabta, oficialkunata, llapan Israel soldadokunatawan kacharparirqan Amón runakunawan maqanakuqta. Hinan paykunaqa Amón runakunata atipaspanku Rabá llaqtata muyuykurqanku. Davidtaq ichaqa Jerusalenpi qhepakurqan.

²Huk tarden Davidqa puñunapi samarisqanmantaña, kamachikunan wasi patapi puriykachashaspa, rikurqorqan huk sumaq rikch'ayniyoq warmi bañakushaqta.

³Hinaspa pichus chay warmi kasqanta tapuchimurqan, chaymi nirqanku: — Het runa Uriaspa[3] warmin Betsabé Eliampa ususinmi kasqa, nispa.

⁴Hinan Davidqa pusamuqta kacharqan. Wasinman pusaqtinkutaq, payqa chay warmiwan puñuykurqan, chaymantataq warmiqa wasinta kutipurqan. Payqa chayllaraqmi killan purisqanmanta ch'uyanchakurqan.

⁵Chaymi warmiqa wiksallikurqan, hinaspa Davidman willachimurqan: Qanpaqmi onqoq kashani, nispa.

⁶Hinan Davidqa Joabman willachirqan: Het runa Uriasta kachamuway, nispa. Joabtaq Uriasta payman kachamurqan.

⁷Chayamuqtintaq Davidqa tapuykurqan imaynachus Joabpas, soldadokunapas, maqanakuypas kashasqanta.

⁸Chaymantataq Davidqa nirqan: — Phaway wasiykita samakuq rirqoy, nispa. Reypa wasinmanta Urías lloqsisqan qhepatataq, payqa huk regalota Uriaspaq apachirqan.

⁹Uriastaq ichaqa wasinta mana ripurqanchu, aswanpas reypa kamachikunan wasi punkupin Davidpa llapa guardiankunapiwan puñurqan.

¹⁰Davidtaq chayta yachaspa Uriasta nirqan: — ¿Manachu purisqaykimanta chayamushanki? ¿Imanaqtintaq wasiykita mana rirqankichu? nispa.

¹¹Paytaq kutichirqan: — Diospa arcanpas, Judapas, Israelpas karpapi kashaqtin, wiraqochay Joabpas oficialniykikunantin campopi tiyashaqtinqa, ¿imaynan ñoqa wasiyta rispay mikhuyman, ukyayman, warmiywanpas puñuyman? ¡Manan kaytaqa ruwaymanchu, ima kaqtinpas nitaq kawsayniykiraykupas! nispa.

¹²Davidtaq nirqan: — Chhaynaqa kunan qhepakuy, paqarinña kachasqayki, nispa. Hinan Uriasqa Jerusalenpi chay p'unchay qhepakurqan.

¹³Qhepantin p'unchaytaq Davidpa invitasqan Uriasqa paywan mikhurqan ukyarqan, hinan Davidqa payta machachirqan. Uriastaq ch'isi lloqsipuspa, reypa guardiankunawan puñunanpi puñukapurqan, manataq wasintaqa rirqanpunichu.

¹⁴Qhepantin paqartaq Davidqa Joabman cartata qelqarqan, chaytan Uriasman apachirqan.

¹⁵Cartapitaq nirqan: — Uriasta sinchi maqanakushaq cheqasman churanki, hinaspa sapallanta saqerpariy wañuchinankupaq, nispa.

¹⁶Joabtaq llaqtata muyuykusharqan, hinaspa Uriasta allin qharikuna cheqasman churarqan.

¹⁷Muyuykusqa llaqta Joab contra maqanakuq lloqsimuqtintaq, Davidpa wakin oficialninkuna wañurqanku, paykunawanmi Het runa Uriaspas wañullarqantaq.

¹⁸Hinan Joabqa imaynachus maqanakuy kasqanta Davidman lliwta willananpaq kacharqan.

¹⁹Willaqtataq nirqan, lliw kaykunata willayta tukuqtiyki, reyqa phiñakuspa nisunki:

²⁰¿Imanaqtinmi sinchita llaqtaman qayllarqankichis? ¿Manachu yachankichis llaqta muyuriq perqa patamanta wach'imunankuta?

²¹¿Manachu huk warmi molino rumita perqamanta kachaykamuspa Jerobaalpa churin Abimelectapas Tebes llaqtapi wañuchirqan? ¿Imapaqmi sinchita qayllarqankichis llaqta muyuriq perqaman? nispa chayqa, ninki: Oficialniyki Het runa Uriaspas wañupunmi, nispa.

²²Hinan willaqqa chayaspa llapanta Joabpa nisqanta Davidman willarqan.

²³Nirqantaq: — Awqayku lloqsimuspan sinchita ñoqaykuwan maqanakurqanku, chaywanpas ñoqaykuqa atipaykun, llaqta punkukaman qatiykuyku.

²⁴Llaqta muyuriq perqa patamanta wach'imuqkunataq ichaqa wakin oficialniykikunata wañuchinku, hinallataq Het runa Uriastapas, nispa.

²⁵Hinan Davidqa willaqninta nirqan: — Kay simikunawan Joabta kallpachanki: Ama chaykunamanta llakikuychu, awqa-tinkuypiqa manan yachakunchu mayqen wañunanpas. Kallpachakuy llaqtata thuninaykichiskama, nispayki. Ahinatan payta kallpachanki, nispa.

²⁶Betsabetaq qosan Urías wañukapusqanta yachaspa qosanmanta llakikuspa waqarqan.

²⁷Chay llakikuynin qhepatataq Davidqa Betsabeta wasinman waqyachimurqan. Hinaspa casarakapurqan, paytaq wawata wachakurqan. Davidpa chay ruwasqanmi ichaqa Señor Diospa ñawpaqenpi mana chaninchu karqan.