Read DIOSPA QHELQACHISQ Quechua 2 SAMUEL 14 Bible Online

2 SAMUEL 14 - DIOSPA QHELQACHISQ Quechua bible

2 SAMUEL 14

¹Sarviaq churin Joabtaq Absalonmanta Davidpa llakipakushasqanta repararqan,

²hinaspan payqa kacharqan Tecoa llaqtaman huk yuyaysapa warmita maskhamunanpaq. Pusamuqtintaq warmita nirqan: — Valekuykin llakisqa wañuchikuq hina yana p'achawan churakunaykita. Amataq q'apaq hawinawan hawikuychu, aswanpas wañuqninmanta unayña llakikushaq warmi hinan rinki.

³Hinaspan reyman asuykunki, ñoqataq yachachisqayki imatachus ninaykipaq, nispa. Tukuy imatachus chay warmi rimanantaqa Joabmi yachachirqan.

⁴Hinan warmiqa reyman haykurqan, manchakuywan pampakama k'umuykukuspa nirqan: — ¡Reyníy, yanapaykuway! nispa.

⁵Reytaq tapuykurqan: — ¿Iman kashan? nispa. Paytaq kutichirqan: — Qosaymi wañukapun, viuda warmin kani.

⁶Churiykunan iskay karqan. Paykunan campopi maqanakusqaku, mana pipas amachaykuq kaqtintaq, hukkaqnin hukninta wañurqachisqa.

⁷Chaymi kunanqa llapa ayllu ñoqata huchachashawan: Wawqen wañuchiq churiykita hap'ichiwayku, wawqen wañuchisqanmanta wañuchisaqku, nispa. Herederota wañuchipuqtinqa mana piniyoqchá qhepapusaq, manataq qosaypa sutinta apaqpas kay pachapi kanqañachu, nispa.

⁸Hinan reyqa warmita nirqan: — Ripuy wasiykita, ñoqaña niwasqaykitaqa unanchasaq, nispa.

⁹Chaymi warmiqa nirqan: — Señor reyníy, ñoqa familiaypiwan kaymanta ima mana allinpas kaqtinqa huchachasqa kasaqku, ichaqa qanpas aylluykipas manan kaymantaqa huchayoqchu kankichis, nispa.

¹⁰Reytaq nirqan: — Pipas contraykipi rimaqtinqa pusachimuway, hinan manaña imanisunkipaschu, nispa.

¹¹Chaymi warmiqa nillarqantaq: — Valekuykin, reyníy, Diosniyki Señor Diosmanta mañakuy amaña aylluy vengakuspa churiyta wañuchinanpaq, mana hina kaqtinqa aswan mana allinmi kawanman, nispa. Reytaq kutichirqan: — Señor Diospa sutinpin jurani, churiykitaqa manan imananqakupaschu, nispa.

¹²Hinan warmiqa nirqan: — Huk simillatawan niykusqayki, Señor reyníy. Reytaq: — Niway, nirqan.

¹³Warmitaq nirqan: — Chay simita rimarispaqa qan kikiykin huchachakunki: Ayqepuq churiyqa manañan kutimpunqachu, nispa kamachikuspayki. ¿Imaynan chay rimaytaqa Diospa llaqtan contra yuyaykunki?

¹⁴Llapan wañuq runa kanchis, hallp'aman unu hich'asqapas manaña hoqarichikunchu chay hina. Manan pitapas Diosqa wañuchinchu, aswanpas payqa wakichinmi qarqosqaq kutimpunanpaq.

¹⁵Chaykunataqa rimapayayki reyníy, runakuna manchachiwaqtinmi, chaymi nirqani: Reyta valekusaq, payqa mañakusqayta ruwanqapaschá, nispa.

¹⁶Rey uyariykuwanqa chayqa kacharichiwanqan ñoqata churiytawan, wañuchispa Diospa hallp'anmanta ch'usaqyachiway munaq runamanta.

¹⁷Hinallataq yuyaykurqani: Señor rey rimaykuwaqtinqa, sonqochasqa kasaq, nispa. Qanqa Diospa angelnin hinan kanki, allinkaqta mana allinkaqmanta t'aqaq kaspayki. Diosniyki Señor Dios qanwan kachun, nispa.

¹⁸Hinan Davidqa warmita nirqan: — Tapusqayta ama llullakuspa cheqaq-kayman hina willaykuway, nispa. Warmitaq: — Niway, señor rey, nirqan.

¹⁹Chaymi reyqa nirqan: — ¿Manachu tukuy chaykunaqa Joabpa yuyaychasqan kashan? nispa. Paytaq kutichirqan: — Arí, señor reyníy, manan llullakuymanchu, cheqaqtan ninki, oficialniyki Joabpunin chay nisqay simikunataqa yachachiwaspa kamachiwarqan qanman ninaypaq.

²⁰(Payqa chaykunata rimarqan reypa churin karupi kashasqanmanta allichakunanta munaspan). Qanqa reyníy, Diospa angelnin hina yachayniyoqmi kanki, tukuy kay suyupi ima kasqantapas yachankitaq, nispa.

²¹Hinan reyqa Joabta waqyachirqan, hinaspa nirqan: — Allinmi yuyaykusqayki. Phaway Absalón waynata kutichimpuy, nispa.

²²Joabtaq qonqoriykukuspa pampakama k'umuykukurqan, hinaspa reyta nirqan: — Señor Dios saminchasunki, kunanmi yachani sumaqta qhawariwasqaykita, mañakusqayta usqhaylla uyariykuwasqaykipi, nispa.

²³Hinan payqa Gesur llaqtata pasarqan, Absalontataq Jerusalenman pusamurqan.

²⁴Reytaq ichaqa nirqan: — Wasinta ripuchun, manan rikuyta munanichu, nispa. Hinan Absalonqa wasinta ripurqan, manataq reyman haykurqanchu.

²⁵Absalonqa umamanta chakikama munay sikllan karqan. Israel suyupiqa manataqmi pay hina ancha sumaq rikch'ayniyoqpas reqsisqapas karqanchu.

²⁶Sapa watan chukchanta rutuchikuq sinchita llasaqtin, chay chukchan iskay kilo hina reypa pesananpi pesaq.

²⁷Absalonpaqmi nacerqan kinsa churikuna, huk sumaq rikch'ayniyoq ususinpiwan, sutintaq Tamar karqan.

²⁸Absalonqa iskay watan Jerusalenpi tiyarqan, manataq reywan tupaqchu.

²⁹Chaymantataq Absalonqa Joabta waqyachirqan reyman kachananpaq, Joabtaq mana hamuyta munarqanchu. Chaymi huktawan waqyaqta kacharqan, paytaq manapuni hamuyta munarqanchu.

³⁰Hinan Absalonqa kamachinkunata nirqan: — Joabpa cebada chakranmi ñoqaqwan kuska kashan. ¡Chayta ninawan kanaykamuychis! nispa. Paykunataq nisqanta hina ruwarqanku.

³¹Hinan Joabqa Absalonpa wasinta phawarirqan: — ¿Imanaqtinmi kamachiykikuna chakrayta ninawan kanaykun? nispa.

³²Absalontaq kutichirqan: — Hamunaykipaqmi waqyaqta kachamurqayki, hinaspa reyman kachayta munarqayki: ¿Imapaqmi Gesur llaqtamanta kutimuni? Hina haqaypi kakushayman karqan, nispa nimunaykipaq. Chay hinaqa, kunanmi reywan tupayta munani, huchay kanraq chayqa, wañuchiwachun, nispa.

³³Hinan Joabqa reypa wasinta rispa chay nisqanta willamurqan, chaymi reyqa Absalonta waqyarqan. Paytaq rispa, reypa ñawpaqenpi pampaman k'umuykukurqan. Hinan reyqa Absalonta sumaqta chaskispa much'aykurqan.