Read DIOSPA QHELQACHISQ Quechua 2 SAMUEL 2 Bible Online

2 SAMUEL 2 - DIOSPA QHELQACHISQ Quechua bible

2 SAMUEL 2

¹Chaymantataq Davidqa Señor Diosta tapurqan: — ¿Wichaymanchu Judapi huknin llaqtaman? nispa. Señor Diostaq: — Wichallay, nirqan. Chaymi Davidqa nillarqantaq: — ¿Mayqen llaqtamantaq risaq? nispa. Señor Diostaq kutichirqan: — Hebronman, nispa.

²Hinan Davidqa Jezreel llaqtayoq Ahinoam, Carmel llaqtayoq Nabalpa viudan Abigail, chay iskaynin warminkunawan rirqanku.

³Hinallataq paywan kashaq qharikunatapas sapankata familiantintakama pusarqan, hinan paykunapas Hebrón qaylla llaqtakunapi tiyarqanku.

⁴Chaymantataq Judamanta qharikuna hamurqanku, hinaspa Davidta Judá ayllupi rey kananpaq aceitewan hawirqanku. Davidmantaq willarqanku: — Galaad hap'iy Jabes llaqtapi tiyaq runakunan Saulta p'ampapunku, nispa.

⁵Chaymi Davidqa paykunaman willaqkunata kacharqan: — Señor Diosmi saminchasunkichis khuyapayakuywan wiraqochaykichis Saulta p'ampasqaykichismanta.

⁶Tukuy tiempon Señor Diosqa anchata khuyapayasunkichis. Ñoqapas qankunawan allintan ruwasaq chay ruwasqaykichismanta.

⁷Chhaynaqa, kallpachakuychis, qhari kaychis. Judá ayllu runakunan reyninku kanaypaq aceitewan hawiwanku, Saulña wañukapun chaypas, nispa.

⁸Saulpa ejerciton umalli Nerpa churin Abnermi Saulpa churin Isboset-ta Mahanaim llaqtaman pusarqospa,

⁹reyta churarqan Galaad hap'iypaq, Aser ayllupaq, Jezreel qheswa wayq'opaq, Benjamín ayllupaq, llapan Israelpaqwan.

¹⁰Isbosetqa Israelpi kamachikuyta qallarishaspan tawa chunka watayoq karqan, iskay watataq kamachikurqan. Judá ayllu runakunan ichaqa Davidta qatikurqanku.

¹¹Davidñataq Hebrón llaqtamanta Judá ayllupi kamachikurqan qanchis wata soqta killanta.

¹²Nerpa churin Abnertaq Mahanaim llaqtamanta Isbosetpa soldadonkunapiwan Gabaón llaqtaman lloqsimurqan.

¹³Sarviaq churin Joabpas lloqsimullarqantaq Davidpa soldadonkunapiwan. Hinan chimpa-chimpapura huñuykusqa Gabaonpi estanqueq qayllanpi tinkurqanku.

¹⁴Hinan Abnerqa Joabta nirqan: — Waynakuna lloqsimuspa ñawpaqenchispi maqanakuchun, nispa. Chaymi Joabqa: — Allinmi, nirqan.

¹⁵Hinan Benjamín ayllumanta chunka iskayniyoq waynakuna Isbosetpaq lloqsimurqan, Davidpa waynankunataq chunka iskayniyoq lloqsimullarqantaq, hinan chimpa-chimpapura sayaykurqanku.

¹⁶Hinaspan sapanka awqankuwan umankumanta hap'irqonakuspa, waqtanninkupi espadawan sat'irqonakurqanku, kaq ratotaq llapanku wañurqanku. Chaymi Gabaonpi chay cheqasqa “Espada Pampa” sutichasqa kapurqan.

¹⁷Chay p'unchaytaq maqanakuyqa sinchipuni karqan. Davidpa soldadonkunan Abnerta Israelpa soldadonkunatawan atiparqanku.

¹⁸Chaypin kasharqanku Sarviaq kinsantin churinkunapas: Joab, Abisai, Asael. Asaelqa taruka hina phawaqmi karqan.

¹⁹Chaymi payqa Abnerta qatirqan cheqanllata mana mayman kutirispa.

²⁰Abnertaq qhepanta qhawarikuspa rikurqorqan, tapuykurqantaq: — Qanqa Asaelmi kashanki riki, nispa. Paytaq: — Arí, ñoqan kani, nirqan.

²¹Hinan Abnerqa nirqan: — Chaykamalla, ama anchata qatiwaychu, aswanpas mayqen waynatapas hap'ispayki llat'anay, nispa. Asaeltaq ichaqa qatishallarqanpuni,

²²chaymi Abnerqa wakmanta Asaelta nirqan: — Niykiñan “ama qatiwaychu”, paqtataq wañurqachiykiman, hinaspa ¿imaynatan wawqeyki Joabwan allipunayman? nispa.

²³Manapuni Asael t'aqakuqtintaq, Abnerqa lanzanwan wiksanmanta sat'irqospa wasantaraq lloqsichirqan, hinan kaq rato chaypi wañurqapurqan. Llapa chayman chayaqkunataq Asaelpa wañusqanta rikuspa mana qatirqankuñachu.

²⁴Joabwan Abisaiwanmi ichaqa Abnerta qatillarqankupuni. Inti chinkaykushaqtintaq Gabaón ch'inneqman puriq ñan qayllapi Giaq ñawpaqenpi kashaq Amma nisqa moqoman chayarqanku.

²⁵Benjamín ayllu runakunataq Abnerwan huk-nisqalla huñukurqanku Amma nisqa moqo patapi tinkunankupaq.

²⁶Abnertaq Joabta waqyakuspa nirqan: — ¿Hayk'aqkamataq maqanakushallasun? ¿Hayk'aqtaq llaqtata ninki: Amaña wawqeykichiswan maqanakuychischu, nispa? ¿Manachu yuyaykunki kayqa hatun llakipi tukukunanta? nispa.

²⁷Joabtaq kutichirqan: — Manachus rimariwaq karqan chayqa, ñoqaykuqa pacha illariykaman wawqeykuta qatiykuman karqan, Diosmi chayta yachan, nispa.

²⁸Chaymi Joabqa putututa tocarqan, hinan sayarqan llapan soldado, manañataq Israel wawqenkuta qatirqankuñachu, maqanakuypas tukukapurqantaq.

²⁹Hinan Abnerqa runakunapiwan tutantin Jordán qheswa wayq'onta purirqanku, Jordán mayuta chimparqospataq, Mahanaim llaqtaman chayarqanku.

³⁰Joabpas Abnerta qatisqanmanta kutimpullarqantaq, hinaspan soldadonkunata huñuspa watukurqan, Asaelqa chunka isqonniyoq soldadokunapiwanmi mana kapusqachu.

³¹Abnerpa umallisqan Benjamín ayllu runakunamantataq kinsa pachak soqta chunka soldadokunata, Davidpa soldadonkuna wañuchirqan.

³²Joabtaq soldadonkunapiwan Asaelta apampuspa Belén llaqtapi taytanpa aya p'ampananpi p'ampaykapurqanku, hinaspan tutantin purispa Hebrón llaqtapi paqarirqanku.