Read DIOSPA QHELQACHISQ Quechua 2 SAMUEL 5 Bible Online

2 SAMUEL 5 - DIOSPA QHELQACHISQ Quechua bible

2 SAMUEL 5

¹Chaymantataq llapa Israelpa ayllunkuna Davidman Hebrón llaqtata hamurqanku, hinaspa nirqanku: — Ñoqaykuqa yawarniykin cuerpoykin kayku.

²Saúl kamachikushaqtinraqmi qanqa maqanakuypi Israelpa soldadonkunaq umallin karqanki. Señor Diospas nirqasunkin, qanmi Israel llaqtayta michinkipas kamachinkipas, nispa.

³Ahinatan Israelpi llapa kurak runakuna Hebronta rey Davidman hamurqanku. Chaypin reyqa paykunawan Señor Diospa ñawpaqenpi rimanakurqan. Hinan Israelpi rey kananpaq aceitewan hawirqanku.

⁴Kamachikuyta qallarishaspataq Davidqa kinsa chunka watayoq karqan, tawa chunka watataq kamachikurqan.

⁵Ñawpaqta Judá aylluta Hebrón llaqtamanta qanchis wata soqta killanta kamachirqan, chaymantataq Israelta Judatawan Jerusalenmanta kinsa chunka kinsayoq watata kamachirqan.

⁶Chay qhepatataq reyqa soldadonkunapiwan Jerusalenman rirqanku, chaypi tiyaq Jebus runakunawan maqanakuq. Paykunataq Davidta nirqan: — Manan haykumuyta atiwaqchu, wist'ukuna ñawsakunallaraqmi atipasunkiman, nispa. Chaytaqa nirqanku, manapuni Davidqa haykunanta yuyaspan.

⁷Chaywanpas, Davidqa Sión pukaratan atipaspa hap'ikapurqan, kaymi “Davidpa Llaqtan” nisqa.

⁸Chay p'unchaymi Davidqa nirqan: — Mayqenpas Jebus runakunata atipay munaqqa, unu purina t'oqonta seqamuchun chay ñawsakunata wist'ukunata atipachun, paykunataqa cheqnikunin, nispa. Chayraykun rimaypas nin: “Dios yupaychana wasimanqa manan ñawsapas wist'upas haykunqachu”, nispa.

⁹Chay pukarapin Davidqa tiyapurqan, suticharqantaq “Davidpa Llaqtan” nispa. Pukaraq muyuriqninpitaq payqa llaqtata sayarichirqan, p'ukru hunt'achisqa cheqasmanta qallarispa ukhu ladoman llank'aspanku.

¹⁰Tukuy-atiyniyoq Señor Dios paywan kasqanraykun, Davidqa astawanpuni kallpachakusharqan.

¹¹Chaymantataq Tiro llaqta rey Hiramqa Davidman willaqkunata kacharqan, hinallataq k'ullu llaqllaqkunata, rumi thupaqkunatapas. Paykunan cedro kurkukunata aparqanku Davidpaq wasita sayarichinankupaq.

¹²Hinan Davidqa yacharqan Israel suyupi kamachikuyninta Señor Diospa takyachisqanta, llaqtanta munakuspa suyuntapas hatunyachisqantawan.

¹³Hebrón llaqtamanta hamusqanmantañataq Davidqa Jerusalenpi askha warmikunawan casarakurqan. Kallarqantaq askha tiyaqmasin warmikunapas, hinan askha churinkunapas ususinkunapas nacerqan,

¹⁴sutinkun kaykuna karqan: Samúa, Sobab, Natán, Salomón,

¹⁵Ibhar, Elishúa, Nefeg, Jafía,

¹⁶Elisama, Eliada, Elifeletpiwan.

¹⁷Filistea soldadokunataq Israel suyupi Davidta reypaq aceitewan hawisqankuta yachaspa, llapanku Davidta hap'inankupaq wicharirqanku. Chayta yacharqospataq Davidqa pukaraman haykurqan.

¹⁸Filistea soldadokunataq rispanku, Refaim wayq'oman ch'eqeykurqanku,

¹⁹chaymi Davidqa Señor Diosta tapurqan: — ¿Filistea soldadokunawan maqanakuq riymanchu? ¿Atipachiwankimanchu paykunata? nispa. Hinan Señor Diosqa nirqan: — Arí, riy, ñoqan atipachisqayki, nispa.

²⁰Chaymi Davidqa Baal-perazimman rirqan, hinaspa paykunata atipaspa nirqan: — Señor Diosmi awqaykunata ñawpaqeypi mayu llimp'ay hinaraq qhochurparin, nispa. Chaymi chay cheqasta “Baal-perazim”[1] nispa suticharqan.

²¹Idolonkutapas chaymanmi Filistea soldadokunaqa wikch'upurqanku, Davidtaq soldadonkunapiwan chaykunata aparqanku.

²²Wakmanta wichaspankutaq Filistea soldadokunaqa Refaim wayq'oman ch'eqeykullarqankutaq.

²³Chaymi Davidqa Señor Diosta tapullarqantaq, hinan kutichirqan: — Ama paykunawan maqanakuq cheqanta riychu, aswanpas qhepankuta muyuykarqamuy, hinaspa bálsamo sach'a-sach'api paykunawan tinkunki.

²⁴Bálsamo sach'akuna patapi chhaqchaqeqta uyarispaykitaq usqhaylla maqanakuq phawarinki, ñoqan chay rato ñawpaqeykita lloqsisaq Filistea soldadokunata atipanaypaq, nispa.

²⁵Davidtaq Señor Diospa nisqanta hina ruwarqan, chaymi Filistea soldadokunata Geba llaqtamanta Gezer llaqtakama qatispa wañuchirqan.