Read DIOSPA QHELQACHISQ Quechua 2 SAMUEL 6 Bible Online

2 SAMUEL 6 - DIOSPA QHELQACHISQ Quechua bible

2 SAMUEL 6

¹Davidmi Israelpi allinnin qharikunata kinsa chunka waranqata hina wakmanta huñurqan.

²Hinaspataq puririrqan llapa soldadonkunantin Baalath-Judá llaqtaman Diospa arcanta apamunankupaq. Arcaqa Tukuy-atiyniyoq Señor Diospa sutinwan sutichasqan, paymi arcapi querubinkuna chawpipi tiyashan.

³Abinadabpa moqopi wasinmantataq mosoq carretapi Diospa arcanta churaykamuspa apamurqanku. Hinan Abinadabpa churinkunaqa Uzawan Ahiopiwan Diospa arcan carretata puriysimurqanku,

⁴arcaq ñawpaqentataq Ahío rirqan.

⁵Davidtaq llapa Israel runakunapiwan Señor Diospa ñawpaqenpi tukuy kallpankuwan takispa tusurqanku, hinataq tocarqanku arpata, tawtinkuta, tinyata, chhaqllaqeta, platillotawan.

⁶Naconpa eranman chayaqtinkutaq, torokuna carretata urmachiyta munaqtin, Uzaqa arcata makinwan llamiykuspa sayaykachirqan.

⁷Hinan Señor Diosqa sinchita Uzapaq phiñakurqan, mana manchakuspa arcata hap'iykusqanmanta, chaymi Uzata muchuchirqan, kaq ratotaq Uzaqa Diospa arcan qayllapi wañusqa wikch'ukurqan.

⁸Davidtaq phiñakurqan Uzata Señor Diospa wañuchisqanmanta, hinan chay p'unchaymanta chay cheqasta “Perez-Uza”[2] nispa suticharqanku.

⁹Chay p'unchaymi Davidqa Señor Diosta manchakuspa nirqan: Chhaynaqa, ¿imaynan Señor Diospa arcanta ñoqa apayman? nispa.

¹⁰Chayraykun payqa Diospa arcanta Jerusalenman mana apayta munarqanchu, aswanpas Gat llaqtayoq Obed-edompa wasinman apachirqan.

¹¹Señor Diospa arcanqa chaypin kinsa killantin karqan, Señor Diostaq Obed-edomta lliw familiantapas samincharqan.

¹²Rey Davidmantaq willarqanku: — Señor Diosmi Obed-edomta, familianta, tukuy kaqninkunatawan saminchashan, nispa. Chaymi payqa Obed-edompa wasinta rirqan, hinaspa ancha kusisqa Señor Diospa arcanta Jerusalenman apamurqan.

¹³Diospa arcanta apaqkuna soqta thaskiyta purishaqtinkutaq, Davidqa huk torota wirayachisqa torillotawan sacrificiota haywarqan.

¹⁴Hinan Davidqa linomanta sotanawan churaykusqa Señor Diospa ñawpaqenpi tukuy kallpanwan tusurqan.

¹⁵Ahinatan ancha kusisqa qaparispanku putututa tocaspanku Diospa arcanta llapa Israel runakuna Davidpiwan aparqanku.

¹⁶Señor Diospa arcan Jerusalenman chayaqtintaq, Saulpa ususin Micalqa ventanamanta Señor Diospa ñawpaqenpi reypa kusikuymanta saltasqanta tususqanta rikuspa, sonqonpi payta pisicharqan.

¹⁷Chaymantataq Davidpa wakichisqan karpaman Señor Diospa arcanta churaykurqanku, hinan Davidqa Señor Diosman haywarqan ruphachina sacrificiokunata sumaq kawsay sacrificiokunatawan.

¹⁸Señor Diosman sacrificiokunata haywayta tukuspataq, Davidqa Tukuy-atiyniyoq Señor Diospa sutinpi llaqtata samincharqan.

¹⁹Hinaspataq llapa Israel runakunaman, warmiman, qhariman, hayk'an kaqman rakichirqan sapankaman huk t'antata, dátil ruru k'umpata, pasas k'umpatawan. Chaymantataq llapanku sapanka wasinkuman ripurqanku.

²⁰Davidpas kutipullarqantaq familianta saminchaq, hinan Micalqa chaskinanpaq lloqsimuspa nirqan: — ¡Israelpa reyninqa kusa respetasqapunin! ¡Mana p'enqakuq runa hina q'alakuspa oficialninkunaq warmi kamachinkunawan qhawachikushan! nispa.

²¹Hinan Davidqa kutichirqan: — Señor Diosta hatunchaspaymi tusuni, paymi taytaykiq lliw aylluykiq rantinpi Israel llaqtanta kamachinaypaq akllawarqan. Chaymi kunanpas astawanraq tususaq Señor Diosta hatunchanaypaq,

²²astawanraqmi huch'uyyakusaq. Qanmanqa rikch'akusunki mana p'enqakuq kasqaypaschá, ichaqa rimasqayki warmi kamachikunaq ñawpaqenpiqa respetasqan kasaq, nispa.

²³Micalqa manan wachakapurqanchu wañukapunankama.