Read DIOSPA QHELQACHISQ Quechua 1 REYES 1 Bible Online

1 REYES 1 - DIOSPA QHELQACHISQ Quechua bible

1 REYES 1

¹Rey Davidqa yuyaqñan kapurqan, askha watayoq runaña. Kamachinkunaña p'achakunawan allinta p'isturqanku qatarqanku chaypas, manan q'oñirirqanchu.

²Chaymi paykunaqa reyta nirqanku: — Señor reyniyku, maskhampusqaykiku huk doncella sipasta servinasuykipaq qhawanasuykipaqwan. Paymi qanwan puñunqa q'oñichinasuykipaq, nispa.

³Hinaspan maskharqanku Israel suyuntinpi huk sumaq rikch'ayniyoq sipasta, tarirqankutaq Sunem llaqtayoq Abisag sutiyoq sipasta, paytan reyman pusarqanku.

⁴Abisagqa ancha sumaq rikch'ayniyoq sipasmi karqan. Paymi reyta makilla qhawarqanpas servirqanpas, ichaqa manan hayk'aqpas reyqa sipasta llamiykurqanchu.

⁵Chaykamataq Davidpa warmin Haguitpa churin Adoniasqa hatunchakuspa nirqan: — Ñoqan suyupi rey kasaq, nispa. Chaymi payqa wakichikurqan carretakunata, caballopi maqanakuq soldadokunata, carretanpa ñawpaqenta phawaq phisqa chunka soldadokunatawan.

⁶Adoniasqa sumaq rikch'ayniyoqmi karqan, Absalonpa qhepan naceqmi karqan. Taytanqa manan hayk'aqpas payta anyaykusqachu, manallataq hayk'aqpas tapuykusqachu: ¿Imapaqmi kaytapas chaytapas ruwashanki? nispaqa.

⁷Paymi Sarviaq churin Joabwan sacerdote Abiatarwan rimanakurqan. Chaymi paykunaqa yanaparqanku.

⁸Ichaqa sacerdote Sadocpas, Joiadaq churin Benaiapas, profeta Natanpas, Simeipas, Reipas, Davidta waqaychaq allin qhari soldadokunapas manan paywan huñukurqankuchu.

⁹Chaymantataq Adoniasqa Rogel pukyu qayllapi kashaq Zohelet Qaqa sispapi ovejakunata, torokunata, allin wirayachisqa torillokunatawan nak'aspa sacrificiota haywarqan. Waqyachirqantaq reypa churin llapan wawqenkunata, Judapi kashaq reypa llapan oficialninkunatawan,

¹⁰ichaqa profeta Natantapas, Benaiatapas, Davidta waqaychaq allin qhari soldadokunatapas, wawqen Salomontapas manan waqyachirqanchu.

¹¹Hinan profeta Natanqa Salomonpa maman Betsabeman rispa nirqan: — ¿Manachu yachanki Haguitpa churin Adonías rey kapusqanta? ¡Chaytaqa manan yachanchu wiraqochanchis Davidpas!

¹²Chhaynaqa, kayta yuyaychasqayki kawsayniykita churiyki Salomonpa kawsaynintapas qespichinaykipaq.

¹³Rey Davidman haykuy, hinaspa ninki: Señor reyníy, juramentowanmi qanqa niwarqanki: Ñoqaq qhepaytaqa Salomón churiykin rey kanqa, kamachikuy tiyanaypin tiyanqa, nispa. Chay hinaqa, ¿imanaqtintaq Adoniasri kamachikapushanña? nispa.

¹⁴Ñoqataq reywan rimashallaqtiykiraq haykumusaq, hinaspan rimasqaykita “cheqaqpunin”, nispa, nisaq.

¹⁵Hinan Betsabeqa reypa puñunan wasita haykurqan. Reyqa sinchi yuyaqñan karqan, Sunem llaqtayoq Abisagtaq payta servisharqan.

¹⁶Betsabetaq haykuspa reypa ñawpaqenpi pampakama k'umuykukurqan, hinan reyqa tapuykurqan: — ¿Iman karqon? nispa.

¹⁷Betsabetaq nirqan: — Reyníy, Diosniyki Señor Diospa sutinpin qanqa jurawarqanki: Ñoqaq qhepaytaqa Salomón churiykin rey kanqa, kamachikuy tiyanaypin tiyanqa, nispa.

¹⁸Kunantaq: Adoniasmi kamachikapushanña niwanku, chaytaqa manan yachankiraqchu, reyníy.

¹⁹Torokunata, wirayachisqa torillokunata, askha ovejakunatawan nak'aspanmi sacrificiota haywan. Waqyachirqantaq churiykikunata, sacerdote Abiatarta, ejercitoyki umalli Joabtapas, Salomón kamachiykitan ichaqa mana waqyachirqanchu.

²⁰Chhaynaqa, señor reyníy, llapa Israelmi suyakushanku pichus qhepaykita kamachikunanta willanaykita.

²¹Mana willanki chayqa, wañupuqtiykin Salomón churiykipiwan ñoqapiwan wañuchinapaq huchachasqa kasaqku, nispa.

²²Reywan pay rimashallaqtinraqmi profeta Natanqa chayman chayarqan,

²³hinan reyman chayasqanta willamurqanku. Profeta Natantaq haykuspa reypa ñawpaqenpi pampakama k'umuykukuspa nirqan:

²⁴— Señor reyníy, ¿qanchu kamachirqanki Adoniasta rey kananpaq, kamachikuy tiyanaykipi tiyananpaq?

²⁵Kunan p'unchaymi payqa rispa torokunata, wirayachisqa torillokunata, askha ovejakunatawan nak'aspa sacrificiota haywamun. Waqyachirqantaq churiykikunata, ejército umallikunata, sacerdote Abiatartawan. Kunanmi Adoniaswan mikhushanku ukyashanku, qaparishankutaq: ¡Kawsachun rey Adonías! nispa.

²⁶Ichaqa manan waqyachiwarqankuchu ñoqata, sacerdote Sadocta, Joiadaq churin Benaiata, Salomón kamachiykitapas.

²⁷Señor reyníy, ¿qanchu chayta kamachikurqanki ñoqayku kamachiykikunaman pichus qhepaykita kamachikunanta mana willawaspaykiku? nispa.

²⁸Chaymi rey Davidqa Betsabeta waqyachimurqan. Betsabetaq reypa qayllanman haykuspa paypa ñawpaqenpi sayaykurqan.

²⁹Hinan reyqa kay hinata jurarqan: — Tukuy llakikuyniymanta qespichiwaqniy Señor Diospa sutinpin jurani.

³⁰Israelpa Diosnin Señorpa sutinpin jurarqayki, chaytaqa kunanpachan hunt'asaq: Churiyki Salomonmi rantiypi kamachikuy tiyanaypi tiyanqa, qhepaytan rey kanqa, nispa.

³¹Hinan Betsabeqa reypa ñawpaqenpi pampakama k'umuykukuspa nirqan: — ¡Wiñaypaq kawsachun señorniy rey Davidqa! nispa.

³²Hinallataq rey Davidqa kamachirqan sacerdote Sadocta, profeta Natanta, Joiadaq churin Benaiatawan waqyamunankupaq. Reypa qayllanman paykuna haykuqtinkutaq,

³³reyqa nirqan: — Salomón churiyta mulaypi sillaykuchiychis, oficialniykunawantaq puriysiychis, hinaspa Gihón pukyuman pusaychis.

³⁴Chaypin payta sacerdote Sadocqa profeta Natanpiwan aceitewan hawimunqaku Israelpi rey kananpaq. Putututa tocaspataq qaparinkichis: ¡Rey Salomón kawsachun! nispa.

³⁵Chaymantataq qankunaq ñawpaqeykichista kutimuspa kamachikuy tiyanaypi tiyaykunqa, paymi rantiypi rey kanqa, ñoqan payta churani Israelpipas Judapipas kamachikuq kananpaq, nispa.

³⁶Joiadaq churin Benaiataq reyman kutichirqan: — Ahina kachun. Señor reyniypa Diosnin ahina kananta unanchachun.

³⁷Imaynan qan reyniywan Señor Diosqa kasharqan, ahinallataq Salomonwanpas kachun, kamachisqan suyupas aswanraq hatunyachun qan reyniypa kamachikusqaykimantaqa, nispa.

³⁸Hinan sacerdote Sadoc, profeta Natán, Joiadaq churin Benaía, reypa guardian Ceret runakuna Pelet runakunapiwan rirqanku, rey Davidpa mulanpi Salomonta sillaykuchispataq Gihón pukyuman pusarqanku.

³⁹Chaypin sacerdote Sadocqa Dios yupaychana wasimanta aceiteyoq waqrata hap'ispa, Salomonta hawirqan rey kananpaq. Chaymantataq putututa tocarqanku, hinan llapan runakunaqa qaparirqanku: ¡Rey Salomón kawsachun! nispa.

⁴⁰Llapankutaq qenata tocaspa Salomonpa qhepanta ancha kusisqa kutimurqanku, chaymi pampapas kuyuriq hinaraq karqan kusikuymanta kunkayoqta qapariqtinku.

⁴¹Adoniastaq llapan waqyachikusqankunapiwan mikhuyta tukuspaña waraqeqta uyarirqanku, Joabtaq pututu tocaqta uyarispa nirqan: — ¿Imanaqtintaq llaqtapiri sinchita waraqeshanku? nispa.

⁴²Hinan pay rimashallaqtinraq sacerdote Abiatarpa churin Jonatanqa chayarqamurqan. Adoniastaq nirqan: — Pasaykamuy, qanqa allin qharin kanki, allin willakuytachá apamushanki, nispa.

⁴³Jonatantaq Adoniasman kutichirqan: — Manan. Señor reyninchis Davidmi Salomonta rey kananpaq churan,

⁴⁴kamachintaq sacerdote Sadocta, profeta Natanta, Joiadaq churin Benaiata, Ceret runakunata, Pelet runakunatawan puriysinankupaq, paykunataq reypa mulanpi Salomonta sillaykuchinku.

⁴⁵Chaymantapas sacerdote Sadoc, profeta Natanpiwan Gihón pukyupi Salomonta aceitewan hawimunku rey kananpaq, chaymantan ancha kusisqa kutimunku. Chayraykun runakunaqa llaqtapi waraqeshanku, chay waraqeytan qankunaqa uyarishankichis.

⁴⁶Chay hinaqa, kamachikuy tiyanapiñan Salomonqa tiyashan,

⁴⁷señor reyninchis Davidpa oficialninkunapas rinkuñan Davidta saminchaq: Qanmanta aswan mentasqa kananpaq Salomonta Diosqa sumaqta qhawarichun, kamachisqan suyupas aswanraq hatunyachun qanpamantaqa, nispa. Hinallataq kikin rey Davidpas puñunanpi k'umuykukuspa Diosta yupaychan:

⁴⁸Israelpa Diosnin Señorqa saminchasqa kachun, paymi munan ñoqaq mirayniy kunan kamachikuy tiyanaypi tiyaykunanta, chaytan ñoqa rikuniraq, nispa.

⁴⁹Hinan Adoniaspa waqyachikusqan runakunaqa manchakuymanta khatatatarqanku, chaymi llapanku sayarispa sapankanku ñanninkutakama ripurqanku.

⁵⁰Adoniastaq Salomonta manchakusqanrayku sayarispa Dios yupaychana karpata rirqan, chaypitaq altar waqrakunaman hap'ipaykukurqan.

⁵¹Hinan Salomonman willarqanku: — Adoniasmi qanta manchakuspa, altar waqrakunaman hap'ipasqa kashan: Kunanpacha rey Salomón jurawachun, ama wañuchiwananpaq, nispa.

⁵²Salomontaq kutichirqan: — Allin qhari hinataq purinqa chayqa, manan pipas imananqapaschu, ichaqa ima mana allintapas ruwanqa chayqa, wañunqapunin, nispa.

⁵³Hinaspan Salomonqa altarmanta hatarichipunankupaq kamachirqan. Chaymantataq Adoniasqa rey Salomonman rirqan, hinaspa ñawpaqenpi k'umuykukurqan. Rey Salomontaq nirqan: — Ripuy wasiykita, nispa.