Read DIOSPA QHELQACHISQ Quechua 1 REYES 12 Bible Online

1 REYES 12 - DIOSPA QHELQACHISQ Quechua bible

1 REYES 12

¹Llapa Israel runakunan Shehemta rirqanku Roboamta reyta churanankupaq, chaymi Roboamqa Shehemta rirqan.

²Nabatpa churin Jeroboammi chayta yacharqan, payqa rey Salomonmantan Egipto suyuman ayqekapusqa, hinaspan chaypi tiyasharqan.

³Israel runakuna waqyachiqtintaq, Jeroboamqa kutinpurqan, hinan llapan Israel runakunapiwan Roboamta rimaykuq rispa nirqanku:

⁴— Taytaykiqa sinchitan ñoqaykuta llank'achiwarqanku, chay hinaqa pisiyarichiyyá kay sasa llank'ayniykuta, sinchi sasa llank'ay churawasqankuta qechuriwayku, hinan ñoqaykuqa servisqaykiku, nispa.

⁵Roboamtaq kutichirqan: — Ripuychis, minchha p'unchayña kutimunkichis, nispa. Chaymi runakunaqa kutipurqanku.

⁶Chaykamataq rey Roboamqa taytan Salomonpa yuyaychaqnin kurak runakunata tapukurqan: — Qankuna yuyaychawaychis, ¿ima nispan kutichisaq chay runakunaman? nispa.

⁷Hinan paykunaqa nirqanku: — Kay llaqtata serviyta munanki chayqa, allinta kutichiy sumaq simikunawan, chaymi paykunaqa servishallasunkipuni, nispa.

⁸Roboamtaq ichaqa mana kasurqanchu kurak runakunaq yuyaychasqanta, aswanpas payta serviq wiñaymasin waynakunata tapukurqan:

⁹— Qankuna yuyaychawaychis, ¿ima nispan kutichisaq chay runakunaman? Paykunan mañakuwanku taytaypa sasa llank'ay churasqanta pisiyachinaypaq, nispa.

¹⁰Hinan chay waynakunaqa kutichirqanku: — Taytaykiq churasqan llank'ayta pisiyachinaykita mañakuq runakunamanqa kay hinatan kutichiwaq: ¡Maki uña dedoymi aswan rakhu taytaypa wasanmantaqa!

¹¹Payqa sasa llank'aytan kamachirqasunkichis, ñoqaqa aswan sasataraqmi llank'achisqaykichis. Payqa hasut'iwanmi soq'arqasunkichis, ñoqaqa fierro khiskayoq hasut'iwanñan soq'asqaykichis, nispa.

¹²Kinsa p'unchaymantataq reypa nisqanman hina Jeroboamqa llapan runakunapiwan Roboamman asuykurqanku.

¹³Reytaq ichaqa kurak runakunaq yuyaychasqanta mana kasukuspa, k'arak simikunawan runakunaman kutichirqan.

¹⁴Payqa waynakunaq yuyaychasqanta hap'ikuspan nirqan: — Taytaychus sinchi sasa llank'anata qorqasunkichis chayqa, ñoqaqa aswan sasataraqmi qosqaykichis, paychus hasut'iwan soq'arqasunkichis chayqa, ñoqaqa fierro khiskayoq hasut'iwanñan soq'asqaykichis, nispa.

¹⁵Señor Diosmi hunt'akunanta munarqan Silomanta profeta Ahiaswan Nabatpa churin Jeroboamman willachisqan simita, chaymi reyqa llaqtata mana uyariqpas tukurqanchu.

¹⁶Llapan Israel runakunataq reypa paykunata mana uyarisqanta reparaspa, nirqanku: — ¡Manan imapas Davidwan ruwananchischu! ¡Manan Isaipa churinwan ima herenciapas phasminakunanchis kanchu! ¡Israel runakuna, wasinchista ripusunchis! ¡Davidqa ayllullanpi kamachikuchun! nispa. Hinan Israel runakunaqa kaq rato wasinkuta ripurqanku.

¹⁷Judá suyu llaqtakunapi tiyaq runakunatan ichaqa Roboamqa kamachishallarqanpuni.

¹⁸Chaymantataq Roboamqa mit'ani runakunaq umallin Adoramta Israel runakunaman kacharqan, paykunataq ichaqa rumiwan ch'aqespa Adoramta wañuchirqanku. Chaymi rey Roboamqa usqhaylla carretanman seqarqospa Jerusalenman ayqerqan.

¹⁹Chay p'unchaymantan Israel runakunaqa Davidpa ayllunwan churanakuqku.

²⁰Jeroboampa kutipusqanta yachaspankutaq llapan Israel runakunaqa Jeroboamta waqyachirqanku llaqta huñukuyman hamunanpaq, hinaspan Israel ayllukunaq reyninta churarqanku. Chay hinaqa, llapan ayllukunamanta Judá ayllullan Davidpa ayllunwan qhepakurqan.

²¹Jerusalenman chayaspataq Roboamqa huñurqan pachak pusaq chunka waranqa akllasqa soldadokunata llapan Judá ayllumanta Benjamín ayllumantawan. Payqa Israel runakunawan maqanakuytan yuyaykurqan, ahinapi suyunta kutichikapunanpaq.

²²Diosmi ichaqa profeta Semaiasta nirqan:

²³— Nimuy Salomonpa churin Judá rey Roboamta, llapan Judá aylluta Benjamín aylluta, wakin runakunatapas:

²⁴Ñoqa Señor Diosmi nini: Ama wawqeykichis Israel runakunawan maqanakuq riychischu, wasiykichista llapaykichis kutipuychis. Suyuq t'aqanakunantaqa ñoqan unancharqani, nispa. Hinan paykunaqa Señor Diospa nisqanta uyarispa, kutipurqanku Señor Diospa kamachisqanman hina.

²⁵Jeroboammi Efraín orqo-orqopi kashaq Shehem llaqtata wakmanta sayarichirqan, hinaspan chaypi tiyarqan. Chaymantaqa Penuel llaqtatapas wakmantan sayarichillarqantaq.

²⁶Sonqonpitaq yuyaykurqan: Davidpa ayllunqa kay suyuta qechuwanmanmi,

²⁷kay runakuna rishallanqa Jerusalenta Señor Diospa wasinpi sacrificiota haywanankupaq chayqa, Judá suyu rey Roboammanmi sonqonku q'ewirinqa, ñoqatataq wañuchiwanqaku, hinaspa Judá rey Roboamman kutirikapunqaku, nispa.

²⁸Chaykuna yuyaykusqan qhepatataq Jeroboamqa iskay qori torillokunata ruwarqan, hinaspan runakunata nirqan: — Israel runakuna, askha kutiñan qankunaqa Jerusalenta rishankichis. Kayqa Egiptomanta horqomuq diosniykichiskuna, nispa.

²⁹Hinan chay torokunata churarqan hukta Betelman, huktataq Danman.

³⁰Chay hawan Israel runakunaqa Betelta Dantawan yupaychaq rispanku huchallikurqanku.

³¹Jeroboamqa sayarichillarqantaq orqo patapi yupaychana wasikunata, hinaspa mana Leví ayllu qharikunata llaqtaq sacerdotenpaq akllarqan.

³²Hinallataq huk fiestata unancharqan wataq pusaqkaq killan chunka phisqayoq p'unchaypi, Judapi hina fiestata ruwanankupaq. Paymi iskaynin ruwachisqan torillokunaman Betel altarpi sacrificiokunata haywarqan. Hinaspa orqo patapi yupaychana wasikunaq sacerdotenkunata churarqan Betelpi llank'anankupaq.

³³Chay hinaqa, wataq pusaqkaq killan chunka phisqayoq p'unchaypin Jeroboamqa Betelpi sayarichisqan altarman rirqan. Chaypin akllakusqan killapi Israel runakunapaq huk fiesta ruwayta kamachirqan, pay kikintaq altar patapi inciensota q'apachirqan.