Read DIOSPA QHELQACHISQ Quechua 1 REYES 13 Bible Online

1 REYES 13 - DIOSPA QHELQACHISQ Quechua bible

1 REYES 13

¹Señor Diosmi kacharqan Judamanta huk profetata Betelman, hinan Betelman chayarqan Jeroboam inciensota q'apachinanpaq altar qayllapi kashaqtin.

²Hinaspan profetaqa Señor Diospa kamachisqan kaspa chay altar contra kunkayoqta qaparispa nirqan: — ¡Altar! ¡Altar! Señor Diosmi nin: Davidpa ayllunmantan huk qhari wawa nacenqa Josías sutiyoq. Orqo patapi yupaychana wasikunaq sacerdotenkunan qan patapi inciensota q'apachinku, paykunatan Josiasqa qan patapi ruphachinqa, hinallataq qan patapi runa tulluta ruphachinqa, nispa.

³Hinaspan profetaqa chay kikin p'unchay nirqan: — Altarqa kikillanmi chhallukunqa, chay patapi kaq usphapas lliwmi wisñikunqa, chaywanmi yachankichis Señor Diospa rimachiwasqanta, nispa.

⁴Profetaq Betelpi altar contra nisqanta uyarispataq rey Jeroboamqa, altar qayllapi kashasqanmanta makinta haywarispa nirqan: — ¡Presota hap'iychis! nispa. Ichaqa profeta contra haywarisqan makinmi kaqpi haywashaqpacha k'aspi hina kapusharqan, manataq k'unkukapurqanchu.

⁵Hinan chay kikin rato altarqa ñut'u chhallukurqan, chaypi kaq usphapas lliwmi wisñikurqan Señor Diospa kamachisqan profetaq nisqanman hina.

⁶Chaymi reyqa profetaman kutirispa nirqan: — Valekuykin, Diosniyki Señor Diosmanta mañapuwanaykita, makiy qhaliyananpaq, nispa. Profetataq Señor Diosmanta mañakurqan, hinan reypa makinqa iman kaq qhaliyapurqan.

⁷Chaymi reyqa profetata nirqan: — Haku wasiyta risun imallatapas mikhuykamunaykipaq, sumaq sonqotapas qoykamusqayki, nispa.

⁸Profetataq ichaqa kutichirqan: — Wasiykiq kuskannintaña qowankiman chaypas manan qanwanqa riymanchu, manataqmi kay cheqaspiqa t'antatapas mikhusaqchu, unutapas ukyasaqchu.

⁹Señor Diosmi kamachiwarqan: Aman t'antatapas mikhunkichu, unutapas ukyankichu, amallataq risqayki ñannintapaschu kutimunki, nispa.

¹⁰Hinan profetaqa wak ñanninta kutipurqan, manataq Betelman risqan kikin ñannintachu.

¹¹Chay p'unchaykunan Betelpi huk yuyaq profeta tiyarqan, paypa churinkunan payman willarqan Judamanta hamuq profetaq Betelpi tukuy ruwasqankunata, reyta nisqan simikunatapas.

¹²Hinan taytankuqa paykunata tapuykurqan: — ¿Mayqen ñannintataq ripunri? nispa. Churinkunataq rikuchirqan mayqen ñannintachus kutipusqanta.

¹³Chaymi profetaqa churinkunata nirqan: — Asnoyta caronapuwaychis, nispa. Paykunataq asnota caronarqanku, hinan yuyaq profetaqa asnopi sillaykusqa

¹⁴Judá profetaq qhepanta rirqan. Encina sach'a chakipi tiyashaqta tarispataq tapuykurqan: — ¿Qanchu kanki Judamanta hamuq profeta? nispa. Paytaq kutichirqan: — Arí, ñoqan kani, nispa.

¹⁵Chaymi yuyaq profetaqa nirqan: — Haku wasiyta, mikhuykamusun, nispa.

¹⁶Judá profetataq ichaqa kutichirqan: — Manan qanwan kutiymanchu, manataq wasiykimanpas haykuymanchu, manallataq qanwan kay cheqaspi t'antatapas mikhuymanchu, unutapas ukyaymanchu.

¹⁷Señor Diosmi kamachiwarqan ancha sut'ita: Aman chaypi t'antatapas mikhunkichu, unutapas ukyankichu, amallataq risqayki ñannintapaschu kutimunki, nispa.

¹⁸Yuyaq profetataq llullakuspa nirqan: — Ñoqapas qan hina profetallataqmi kani. Chaymi Señor Diosqa huk angelninwan kamachiwarqan wasiyman qanta pusaspa mikhuchinaypaq ukyachinaypaq, nispa.

¹⁹Hinan Judamanta profetaqa yuyaq profetaq wasinta rispa chaypi mikhurqan ukyarqan.

²⁰Paykuna mesapi tiyashaqtinkutaq, Señor Diosqa rimaykurqan Judá profeta kutichiq yuyaq profetata.

²¹Chaymi yuyaq profetaqa kunkayoqta payta nirqan: — Diosniyki Señor Diosmi nisunki: Qanqa manan kasuwankichu manataq kamachisqaytapas hunt'ankichu,

²²aswanpas kutispaykin mikhunki ukyanki: Aman chay cheqaspi mikhunkipaschu ukyankipaschu, nispa kamachishaqtiy, chayraykun ayayki mana ñawpa taytaykikunaq p'ampananpichu p'ampasqa kanqa, nispa.

²³Judá profeta mikhuyta ukyayta tukuqtintaq, yuyaq profetaqa asnota caronapurqan,

²⁴hinan Judá profetaqa ripurqan. Ñanta rishaqtintaq ichaqa huk león paywan tupaspa wañurqachirqan, chaymi cuerponqa ñanpi wikch'urayapusharqan. Asnotaq leonpiwan ayaq qayllanpi kasharqan.

²⁵Chay raton qharikuna chayninta purishaspanku ñanpi wikch'urayashaq ayata rikurqanku, leontapas qayllanpi kashaqtaraq. Yuyaq profetaq tiyasqan llaqtaman chayaspankutaq willakurqanku imachus rikusqankuta.

²⁶Kutichiq yuyaq profetataq chayta uyarispa nirqan: — Señor Diospa kamachisqanta mana kasukuq profetan chayqa. Mana kasukusqanraykun Señor Diosqa huk leonwan wañuchirqan, paypa nisqanman hina, nispa.

²⁷Chay qhepatataq churinkunata nirqan: — Huk asnota caronapuwaychis, nispa, paykunataq asnota caronarqanku.

²⁸Hinan yuyaq profetaqa rispa ayata tarirqan ñanpi wikch'urayashaqta, aya qayllapitaq asnota leontawan. Leonqa manan ayata mikhusqachu, manataq asnotapas wañuchisqachu.

²⁹Yuyaq profetataq cuerponta hoqarispa asnonman cargaykurqan, hinan llaqtanman kutipurqan wañuqmanta waqaq, ayata p'ampapuq ima.

³⁰Pay kikinpa sepulturanman p'ampaspanmi wañuqmanta waqaspa nirqan: — ¡Ay wawqelláy-wawqe! nispa.

³¹P'ampasqanku qhepatataq churinkunata nirqan: — Ñoqa wañupusaq hinaqa chay profeta p'ampasqanchis kikin sepulturamanpunin p'ampawankichis. Ayaytaqa churaykunkichis paypa ayantawan kuskata.

³²Señor Diospa kamachisqan chay profetaq Betelpi altar contra rimasqanqa hunt'akunqapunin, hinallataq Samariaq llaqtankunapi orqo patapi yupaychana llapan wasikunamanta rimasqanpas.

³³Chaywanpas Jeroboamqa manapunin mana allin ruwayninkunata saqerqanchu, aswanpas orqo patapi yupaychana wasikunamanmi sacerdotekunata churashallarqan runakuna ukhumanta akllaspa. Jeroboamqa pitapas sacerdote kayta munaqtaqa churallarqanmi chay wasikunaman.

³⁴Chay hinapin Jeroboampa ayllunqa huchallikurqan, chay hawataq llapanku ch'usaqyachisqa karqanku.