Read DIOSPA QHELQACHISQ Quechua 1 REYES 14 Bible Online

1 REYES 14 - DIOSPA QHELQACHISQ Quechua bible

1 REYES 14

¹Chay p'unchaykunan Jeroboampa churin Abiasqa onqoykurqan.

²Hinan Jeroboamqa warminta nirqan: — Profeta Ahiasmi Silopi tiyan, paymi niwarqan kay suyupi rey kanaypaq. Chhaynaqa, huk-hina p'achawan churarqokuy warmiy kasqaykita ama reqsinasuykipaq, hinaspa Silota phaway.

³Chunka t'antakunata, tortakunata, huk p'uyñu miel misk'itawan aparikuspa Ahiasman riy. Paymi nisunki imaynachus kay churinchis kananta.

⁴Hinan warmiqa qosanpa nisqanta hina ruwaspa Silota rirqan, Ahiaspa wasinmantaq chayarqan. Ahiasqa manan rikurqanñachu, yuyaqña kaqtinmi ñawinkunaqa ayphayapusharqan,

⁵ichaqa Señor Diosmi payta nirqan: — Jeroboampa warminmi onqosqa churinmanta tapukuq hamushasunki pantachikuspa, qantaq ichaqa chayamuqtin, ahinata kay hinata ninki, nispa.

⁶Punkuta warmi haykuykushaqtintaq Ahiasqa purisqanta uyarispa nirqan: — Haykumuy, Jeroboampa warmin. ¿Imanaqtinmi pantachikuspa hamushanki? K'arak willakuytan ñoqa chaskini qanman willanaypaq.

⁷Chay hinaqa kutiy, hinaspa Jeroboamman willamuy, Israelpa Diosnin Señormi nin: Ñoqan runakunamanta akllarqayki, hinaspa Israel llaqtayta kamachinaykipaq churarqayki.

⁸Ñoqaqa Davidpa ayllunmantan kamachisqan suyuta qechurqani qanman qonaypaq. Qantaq ichaqa mana kamachiy David hinachu karqanki, payqa kamachikuyniykunatan hunt'arqan, tukuy sonqotaq qatikuwarqan, ñawpaqeypipas chaninta ruwarqan.

⁹Qanmanta ñawpaqkaq reykunamantapas aswan mana chanintan ruwarqanki, qanqa wak dioskunata unuyachispa rikch'aykunata ruwarqanki, ahinapin ñoqata phiñachiwaspayki wasancharpariwarqanki.

¹⁰Chaymi kunan aylluykita mana allinkunawan muchuchisaq, hinan Israelpi llapan qhari mirayniykikuna wañunqa. Mirayniykitaqa llapantan tukusaq, q'opata hinaraqmi pichasaq.

¹¹Llaqtapi wañuq aylluykikunaq ayankunatapas alqokunan mikhunqa, campopi wañuqkunatataq phalaq animalkuna mikhunqa, ahinatan ñoqa Señor Diosqa unanchani, nispa.

¹²Chay hinaqa, Jeroboampa warmin, phaway wasiykita kutipuy. Llaqtaman haykuykuqtiyki hinan churiykiqa wañupunqa.

¹³Hinan churiykimanta llapa Israel runakuna waqaspa p'ampanqaku. Jeroboampa ayllunmantaqa pay sapallanmi Señor Diospa qayllanpi allinpaq qhawarisqa karqan, chaymi pay sapallan p'ampasqa kanqa.

¹⁴Kunan p'unchaymantapachan Señor Diosqa wak reyta Israelman churanqa, paymi kamachikuspa Jeroboampa ayllunta lliwta tukunqa.

¹⁵Señor Diosqa Israelta chhaphchinqa imaynan mayu phoqchiy t'otorata chhaphchin hinata. Ñawpa taytankuman qosqan kay sumaq hallp'amantan Israelta horqonqa, hinaspan wikch'unqa Eufrates mayu inti lloqsimuy lado chimpamanraq, Asera diosaq rikch'ayninkunata ruwakuspanku Señor Diosta phiñachisqankumanta.

¹⁶Jeroboammi huchallikurqan, hinallataq Israel runakunatapas huchallichirqan, chaymi Señor Diosqa Israelta ch'eqechinqa, nispa.

¹⁷Hinan Jeroboampa warminqa sayarispa kutipurqan, Tirsa llaqtamantaq chayarqan, wasi punkuta haykuykushaqtintaq churinqa wañurqapurqan.

¹⁸Chaymi llapa Israel runakuna paymanta waqaspa p'ampapurqanku, profeta Ahiaswan Señor Diospa willachisqanman hina.

¹⁹Jeroboampa wakin ruwasqankunapas maqanakusqankunapas, imayna kamachikusqanpas Israel Reykunaq Willakuynin Qelqapi qelqasqan kashan.

²⁰Jeroboamqa iskay chunka iskayniyoq watan Israelpi kamachikurqan. Wañukapusqan qhepatataq churin Nadab rantinpi kamachikurqan.

²¹Tawa chunka hukniyoq watayoq kashaspan, Salomonpa churin Roboamqa Judá suyuta kamachiyta qallarirqan, Jerusalenmantataq chunka qanchisniyoq watata kamachikurqan, chay llaqtatan Señor Diosqa akllakusqa, Israelpa ayllunkunaq llapan llaqtankunamanta chaypi pay yupaychasqa kananpaq. Roboampa mamanqa Amón suyu warmin karqan, Naama sutiyoq.

²²Judá runakunaqa Señor Diospa ñawpaqenpi manan chanintachu ruwarqanku, chaymi Señor Diosta sinchita phiñachirqanku, taytankuq huchallikusqanmantapas astawanraqmi huchallikurqanku.

²³Llapan orqo patapi llapa k'allmasapa sach'a chakipin paykunaqa sayarichirqanku yupaychana wasikunata, yupaychana saywa rumikunata, Asera diosakunata ima.

²⁴Hinallataq yupaychana wasikunapi karqan qharikuna yupaychaq hamuqkunawan t'inkikuspa huchallikunankupaq. Ahinapi Señor Diospa wikch'usqan suyukunaq millakuy ruwasqankuta hina ruwarqanku.

²⁵Phisqakaq watapi Roboam kamachikushaqtinmi, Egipto suyu rey Sisacqa Jerusalenta phawaykurqan.

²⁶Hinaspa Señor Diospa wasinpi qhapaq kaykunatapas, reypa wasinpi qhapaq kaykunatapas aparqan, hinallataq Salomonpa ruwasqan qori escudokunatapas llapanta aparqan.

²⁷Hinan rey Roboamqa chaykunaq rantinpi broncemanta escudokunata ruwachirqan, hinaspan chaykunata qorqan reypa guardian oficialkunaman waqaychanankupaq, paykunan reypa wasi punkunta qhawarqanku.

²⁸Chaymi guardiakunaqa sapa kuti Señor Diospa wasinta Roboam riqtin escudokunata chayman aparqanku, chaymantataq kaqllata churaykapurqanku guardiakunaq wasinman.

²⁹Roboammanta wakin willakuykunapas tukuy ruwasqankunapas Judá Reykunaq Willakuynin Qelqapi qelqasqan kashan.

³⁰Roboamwan Jeroboamwanqa tukuy tiempon maqanakuyllapi karqanku.

³¹Roboam wañukapuqtintaq ñawpa taytankunaq p'ampananman Davidpa Llaqtan nisqapi p'ampapurqanku. Mamanqa Amón suyu warmin karqan, Naama sutiyoq. Wañukapusqan qhepatataq churin Abiam rantinpi kamachikurqan.