Read DIOSPA QHELQACHISQ Quechua 1 REYES 17 Bible Online

1 REYES 17 - DIOSPA QHELQACHISQ Quechua bible

1 REYES 17

¹Galaad hap'iymanta Tisbe llaqtayoq profeta Eliasmi[3] Ahabta nirqan: — Israelpa Diosnin Señorpa kamachinmi kani, paypa sutinpin jurani, manan kay qhepa watakunapi paranqachu, manallataqmi pacha sullapas kanqachu ñoqaq ninaykama, nispa.

²Hinan Señor Diosqa Eliasta nirqan:

³— Ripuy kaymanta inti lloqsimuy ladoman, hinaspa Querit mayupi pakakamuy, chaymi kashan Jordán mayu inti lloqsimuy ladopi.

⁴Chaypin mayumanta unuta ukyanki, kamachiniñan alqamarikunata mikhunata apamunasuykipaq, nispa.

⁵Hinan Eliasqa Señor Diospa kamachisqanta kasukuspa, Jordán mayu inti lloqsimuy ladota ripurqan, hinaspa Querit mayu qayllapi tiyarqan.

⁶Alqamarikunan sapa paqar ch'isintawan aychata t'antatawan aparqanku. Unutataq mayumanta ukyarqan.

⁷Pisi p'unchaykunamantataq chay mayuqa ch'akirqapurqan mana para chayasqanrayku.

⁸Chaymantataq Señor Diosqa Eliasta nirqan:

⁹— Rillayña Sidonpi kashaq Sarepta llaqtaman, hinaspa chaypi tiyamunki. Kamachiniñan chaypi tiyaq huk viuda warmita mikhunata qonasuykipaq, nispa.

¹⁰Hinan Eliasqa Sarepta llaqtaman ripurqan. Llaqta punkuman chayaspataq, huk viuda warmita llant'a pallashaqta rikurqan, hinaspan waqyarispa nirqan: — Ama hinachu kay, vasopi huk chhikan unuta aparimuway ukyaykunaypaq, nispa.

¹¹Warmi unu apaq rishaqtinñataq, Eliasqa wakmanta waqyarispa nirqan: — Ama hinachu kay, huk chhikan t'antatawan aparimuwanki, nispa.

¹²Warmitaq kutichirqan: — Diosniyki Señor Diospa sutinpin jurani, manan ch'ulla t'antaypas kanchu. Huk hach'iy hak'ullayñan rakipi kashan, p'uyñupitaq huk chhikan aceitellayña. Chaymi kunan huk chhikan llant'ata pallakushani kutipuspay churiypaq ñoqapaqwan wayk'unaypaq, hinaspa chayta mikhunaykupaq. Chaymantaqa yarqaymantan wañupusaqku, nispa.

¹³Eliastaq kutichirqan: — Ama manchakuychu, phaway nisqaykita hina wayk'urqamuy. Ichaqa ñoqapaqraq ñawpaqta chay hak'uykimanta huk tinku t'antata ruwarqamuy, hinaspa apamuwanki, chaymantataq churiykipaqpas qanpaqpas ruwallankitaq.

¹⁴Israelpa Diosnin Señormi nin: Manan tukukunqachu rakipi kashaq hak'upas, p'uyñupi kashaq aceitepas, ñoqa hallp'a pataman parachinay p'unchaykama, nispa.

¹⁵Hinan viudaqa rispa, Eliaspa kamachisqanta ruwarqan. Chaymi viudapas wasipi kaqkunapas Eliaspiwan unay p'unchaykuna mikhurqanku.

¹⁶Manan tukukurqanchu rakipi hak'upas p'uyñupi aceitepas Señor Diospa Eliaswan willachisqan simiman hina.

¹⁷Chaykuna qhepatataq viuda warmiq churin onqoykurqan, aswan-aswantataq sinchisharqan, chaymi wañurqapurqan.

¹⁸Hinan viudaqa Eliasta nirqan: — Dios sonqo runa, ¿imapitaq phiñachirqayki? ¿Huchaykuna sut'inchaqchu hamuwarqanki, hinaspa churiy wañunanpaq? nispa.

¹⁹Eliastaq kutichirqan: — Apamuy churiykita, nispa. Hinataq viudaq marq'ayninmanta chaskispa qorpachakusqan wasiman seqarqan, chaypitaq puñunan pataman siriykachirqan.

²⁰Hinaspa Señor Diosmanta kunkayoqta mañakurqan: — Diosníy, Señor Dios, ¿kay qorpachaykuwaqniy viudata llakichillankitaqchu, churinta wañuchispayki? nispa.

²¹Chaymantataq kinsa kutita waynacha pataman thallaykurqan, hinaspa kunkayoqta Señor Diosmanta mañakurqan: — Diosníy, Señor Dios, valekuykin kay waynata kawsarichinaykipaq, nispa.

²²Señor Diostaq Eliaspa mañakusqanta uyarirqan, hinaspan waynachata kawsarichirqan.

²³Eliastaq usqhaylla waynachata marq'arikuspa altosmanta uraykuchirqan pampakaq wasiman, hinaspa mamanman qospa nirqan: — Kayqa wawayki, kawsashanmi, nispa.

²⁴Hinan warmiqa nirqan: — Kunanqa cheqaqtapunin yachani Dios sonqo runa kasqaykita, Señor Diospa simin rimasqaykipas cheqaqpuni kasqanta, nispa.