Read DIOSPA QHELQACHISQ Quechua 1 REYES 2 Bible Online

1 REYES 2 - DIOSPA QHELQACHISQ Quechua bible

1 REYES 2

¹Davidpa wañukapunan p'unchaymi qayllamusharqanña, chaymi churin Salomonta kamachirqan:

²— Lliw kay pacha runakuna hinan ñoqapas wañukapusaq. Kallpachakuy, qhari hina allinta puriy.

³Diosniyki Señor Diospa kamachikusqankunata hunt'ay munayninta ruwaspa, kamachikuyninta, chaninchayninta, unanchaynintapas hunt'anki, imaynan Moisespa kamachikuynin qelqapi kashan chayman hina, ahinapin tukuy ruwasqaykipipas purisqaykipipas Señor Diosqa saminchasunki.

⁴Hinallataq Señor Diosqa prometewasqan simita hunt'anqa, paymi niwarqan: — Wawaykikuna chaninta purispa tukuy sonqotaq ch'ulla yuyayllataq kasuwanqaku chayqa, mirayniykiqa Israelpi kamachikushallanqakupunin, nispa.

⁵Qanqa yachankiñan Sarviaq churin Joab imatachus ruwawasqanta, Israelpa ejerciton iskay umallikunatan wañuchirqan, Nerpa churin Abnerta, Jeterpa churin Amasatawan. Paykunatan wañuchirqan thak-kay tiempopi maqanakuypi wañuqmanta vengakuspa, ahinapin huchachachiwarqan chay runakunaq wañusqanmanta.

⁶Chayrayku allin yuyaywan payta ruway, amataq suyaychu machuyaspa thak-kaypi wañunantaqa.

⁷Galaadmanta Barzilaipa churinkunatan ichaqa allinta rikunki, wasiykipitaq mikhuchinki, paykunan allinta rikuwaspanku mikhunawan yanapaykuwarqanku, wawqeyki Absalonmanta ayqeshaqtiy.

⁸Kashallantaqmi Bahurimmanta Benjamín ayllu Geraq churin Simei. Paymi sinchi millayta qaparkachaspa ñakawarqan Mahanaimman rishasqay p'unchay. Chaymantataq ichaqa Jordán mayuman hamurqan chaskiwaqniy, hinan chaypi Señor Diospa sutinpi jurarqani mana wañuchinaypaq.

⁹Chaywanpas ama pampachaychu. Qanqa yuyaysapan kanki, chay hinaqa qanmi yachakunki imatachus paywan ruwanaykita, paytaqa wañuchinkipunin, nispa.

¹⁰Davidmi wañukapurqan, hinan Davidpa Llaqtan nisqapi p'ampapurqanku.

¹¹Payqa tawa chunka watantinmi Israelpi rey karqan. Hebronmantan kamachikurqan qanchis watata, Jerusalenmantataq kinsa chunka kinsayoq watata.

¹²Chay qhepatataq Davidpa rantinpi churin Salomón kamachikurqan, kamachikuynintaq allin takyasqa karqan.

¹³Haguitpa churin Adoniasmi Salomonpa maman Betsabeman rirqan. Hinan Betsabeqa tapuykurqan: — ¿Sumaqpichu hamushanki? nispa. Paytaq kutichirqan: — Arí, sumaqpin hamushani, nispa.

¹⁴Nillarqantaq: — Ama hinachu kay, hukta valekusqayki, nispa. Betsabetaq: — Niway, nirqan. Chaymi Adoniasqa nirqan:

¹⁵— Allintan qanqa yachanki suyu kamachina ñoqaman tupawasqanta, llapan Israel runakunapas ñoqaq rey kanaytan yuyasharqanku. Chaywanpas wawqeytan reyta churarqanku, Señor Diosmi chay hina kananta unancharqan.

¹⁶Chhaynaqa, valekuytan munashayki, amayá, “manan”, niwankichu, nispa. Betsabetaq kutichirqan: — Valekuway, nispa.

¹⁷Hinan Adoniasqa nirqan: — Rey Salomonta rimaykapuway Sunem llaqtayoq Abisagta warmiypaq qopuwananpaq. Manachá qantaqa, “manan”, nisunkimanchu, nispa.

¹⁸Betsabetaq kutichirqan: — Allinmi, ñoqaña reyta rimaykapusqayki, nispa.

¹⁹Hinan Betsabeqa rey Salomonman rirqan Adoniaspa valekusqan hawa. Rey Salomontaq mamanta chaskinanpaq sayarirqan, hinaspan mamanpa ñawpaqenpi k'umuykukurqan. Chaymantataq tiyananpi tiyaykapurqan, kamachirqantaq mamanpaq huk tiyanata apamunankupaq, hinan Betsabeqa reypa paña ladonpi tiyaykuspa nirqan:

²⁰— Ama hinachu kay, hukllata valekuyta munashayki, amayá, “manan”, nirqowankichu, nispa. Reytaq kutichirqan: — Mañakuway ima munasqaykita mamitáy, manan, negasqaykichu, nispa.

²¹Betsabetaq nirqan: — Sunem llaqtayoq Abisagta Adonías wawqeykiman warminpaq qopuy, nispa.

²²Reytaq mamanta tapuykurqan: — ¿Imanaqtintaq Sunem llaqtayoq Abisagta Adoniaspaq mañakunki? ¡Suyu kamachikuyta qoykapunallaytaña mana mañakuwankichu! ¿Manachu payqa kurak wawqey? Paywanmi kashanku sacerdote Abiatarpas, Sarviaq churin Joabpas, nispa.

²³Chaymi rey Salomonqa Señor Diospa sutinpi jurarqan: — ¡Dios wañurqachiwachun chay rimasqanmanta Adoniasta mana wañuchisaqchu chayqa!

²⁴Señor Diosmi taytay Davidpa kamachikunan tiyananpi tiyachiwaspa takyachiwarqan, prometekusqanman hinataq suyu kamachikuyta qowan ñoqaman mirayniymanwan. Chaymi Señor Diospa sutinpi jurani kunanpacha Adoniaspa wañunanta, nispa.

²⁵Chay qhepatataq Joiadaq churin Benaiata kamachirqan Adoniasta wañuchimunanpaq. Paytaq rispa Adoniasta wañuchimurqan.

²⁶Sacerdote Abiatartataq reyqa nirqan: — Anatot llaqtaykita ripuy, hallp'aykiman. Wañuchisqan kanayki, ichaqa manan wañuchisqaykichu Señor Diospa rimanakuynin arcata David taytaypa ñawpaqenta apasqaykirayku, taytaywan kuska tukuy llakikunata muchusqaykiraykupiwan, nispa.

²⁷Ahinatan Salomonqa Señor Diospa sacerdoten kayninmanta Abiatarta wikch'upurqan, chay hinapin hunt'akurqan Elipa ayllunmanta Silopi Señor Diospa nisqan.

²⁸Joabqa manan Absalonpa t'aqanchu karqan, aswanpas Adoniaspa t'aqanmi, chaymi Abiatarmanta yachaspa payqa Dios yupaychana karpaman phawarqan, chaypitaq altar waqrakunaman hap'ipasqa kasharqan.

²⁹Hinan rey Salomonman willarqanku: — Joabmi Señor Dios yupaychana karpaman ayqen, altarman hap'ipaykukuspataq sayashan, nispa. Salomontaq Joiadaq churin Benaiata kamachirqan wañuchiq rinanpaq,

³⁰hinan Benaiaqa Señor Dios yupaychana karpaman rispa Joabta nirqan: — Reymi kamachisunki lloqsinaykipaq, nispa. Joabtaq kutichirqan: — ¡Manan! ¡Kaypin wañusaq! nispa. Hinan Benaiaqa reyman rispa Joabpa nisqanta willarqan.

³¹Reytaq nirqan: — Munasqanta hina ruway, payta wañuchiy hinaspa p'ampaykapuy. Ahinapi taytaypa ayllunmanta ñoqamantapas mana huchayoq runakunata Joabpa wañuchisqan huchata wikch'unki.

³²Señor Diosmi runa wañuchisqan huchanmanta pay kikinta wañuchinapaq huchachan. Joabqa taytaypa mana yachasqallanmi paymanta aswan allin iskay chanin runakunata wañuchirqan: Israelpa ejerciton umalli Nerpa churin Abnerta, Judapa ejerciton umalli Jeterpa churin Amasatawan.

³³Chay runakunata wañuchisqan huchamantaqa Joabpas mirayninpas wiñaypaqmi muchunqaku. Señor Diosmi ichaqa Davidta, mirayninta, kamachikuynintapas allinyachinqapuni, nispa.

³⁴Hinan Benaiaqa rispa Joabta wañuchirqan, ch'inneq wasinpitaq payta p'ampapurqanku.

³⁵Chaymantataq reyqa Benaiata ejerciton umallita churarqan Joabpa rantinpi, sacerdote Sadoctataq Abiatarpa rantinpi.

³⁶Chay qhepatataq Salomonqa Simei sutiyoq runata waqyachispa kamachirqan: — Jerusalenpi wasita ruwakuy chaypi tiyanaykipaq, hinaspa ama maytapas llaqtamanta lloqsinkichu.

³⁷Lloqsispachus Cedrón mayuta pasanki chayqa, wañunkipunin, qan kikiykin wañunaykipaq huchachakunki, nispa.

³⁸Simeitaq reyman kutichirqan: — Allinmi niwasqayki, señor reyníy, kamachiwasqaykita hinan ruwasaq, nispa. Simeiqa unaymi Jerusalenpi tiyarqan,

³⁹ichaqa kinsa wata qhepatan Simeipa iskay kamachinkuna chinkakuspanku Gat llaqta rey Maacaq churin Aquispata pasakurqanku. Gatpin iskaynin kamachiykikuna kashan, nispa, willaqtinkutaq,

⁴⁰Simeiqa asnonta caronaspan Aquispa kasqan Gat llaqtata rirqan, kamachinkunata maskhaspa. Chaymantataq kamachinkunapiwan Jerusalenman kutimpurqanku.

⁴¹Chaytan rey Salomonman willarqanku Gat llaqtata rispa Jerusalenman kutipusqanta.

⁴²Hinan reyqa payta waqyachirqan, hamuqtintaq nirqan: — Ñoqan Señor Diospa sutinpi jurachirqayki, ama Jerusalenmanta lloqsinaykipaq, nirqaykitaq: Kay llaqtamanta lloqsinki chayqa, wañunkipunin, nispa. Qantaq kutichiwarqanki: Allinmi, kasukusaqmi niwasqaykita, nispa.

⁴³Chay hinaqa, ¿imanaqtintaq Señor Diosman jurasqaykita ñoqaq kamachisqaytapas mana kasukunkichu?

⁴⁴Qanqa allintan yachashanki David taytayta tukuy mana allinkunata ruwasqaykita. Chayraykun Señor Diosqa chay mana allin ruwasqaykita qan kikiykiman kutichisunki.

⁴⁵Ñoqatataq ichaqa Señor Dios saminchawanqa, David taytaypa kamachikuynintapas paymi wiñaypaq takyachinqa, nispa.

⁴⁶Chaymi reyqa Joiadaq churin Benaiata kamachirqan Simeita wañuchinanpaq, paytaq rispa wañurqachirqan. Ahinapin Salomonqa atiyninwan lliwta kamachipusharqan.