Read DIOSPA QHELQACHISQ Quechua 1 REYES 20 Bible Online

1 REYES 20 - DIOSPA QHELQACHISQ Quechua bible

1 REYES 20

¹Siria suyu rey Ben-Hadadmi llapan ejercitonta huñuykurqan Samaria llaqtata phawaykunanpaq. Riysirqantaq yanapanakunankupaq rimanakusqan kinsa chunka iskayniyoq reykuna caballokunantin carretakunantin ima. Hinaspa Samaria llaqtata muyuykuspa phawaykurqanku.

²Hinaspan chay llaqtaman willaqkunata kacharqan Israel rey Ahabman willamunankupaq,

³Ben-Hadadmi nin: Qoriykipas qolqeykipas, warmiykikunapas, allinninkaq wawaykikunapas ñoqaqmi, nispa nimunankupaq.

⁴Israel reytaq kutichirqan: — Arí, señor reyníy, nisqayki hinapunin, ñoqapas tukuy kaqniykunapas qanpapunin, nispa.

⁵Willaqkunataq wakmanta Ahabman kutispa nirqanku: — Ben-Hadadmi nin: Willachiykiñan qoriykitapas, qolqeykitapas, warmiykikunatapas, wawaykikunatapas qonawaykipaq.

⁶Chaywanpas paqarin kay horastan oficialniykunata kachamusaq wasiykitapas oficialniykikunaq wasintapas maskhakunankupaq, hinaspa tukuy munasqayki kaqkunata paykunapaq apakunqaku, nispa.

⁷Hinan Israel reyqa suyupi llapan kurak runakunata waqyachimurqan, hinaspa nirqan: — Warmiykunatapas wawaykunatapas qoriytapas qolqeytapas qopusqaykin nishaqtiypachan chay reyqa mana allinta ruwayta munawanchis, reparaychis kayta, nispa.

⁸Kurak runakunataq llapan runakunapiwan kutichirqanku: — Ama uyariychu, amallataq kasuychu, nispa.

⁹Hinan Ahabqa Ben-Hadadpa kachamusqankunata nirqan: — Wiraqochay reyta niychis: Ñawpaqkaq kamachiwasqantaqa tukuytan ruwasaq, kunan mañakusqantan ichaqa mana atiymanchu, nispa. Kachasqakunataq Ben-Hadadman rirqanku chayta willanankupaq.

¹⁰Hinan Ben-Hadadqa juraspa Ahabman willaqkunata kachallarqantaq: ¡Samariapichus hallp'a ñut'ullapas qhepanman runaykunaman huk hach'iyta sapankaman qonaypaq chayqa, dioskuna sinchita muchuchiwachun! nispa.

¹¹Israel reytaq kachasqakunaman kutichirqan: — Ama hatunchakuychu manaraq atipashaspaqa, nispa.

¹²Ben-Hadadqa rimanakusqan reykunapiwanmi karpakunapi machasharqanku kachasqakuna willakuyta kutichimuqtin. Chaymi oficialninkunata nirqan: — ¡Phawaykuychis! nispa. Hinan llapanku wakichikurqanku llaqtata phawaykunankupaq.

¹³Chaykamataq Israel rey Ahabman huk profeta qayllaykuspa nirqan, Señor Diosmi nin: ¿Rikunkichu ancha askha ejercitota? Kunanmi paykunata hap'ichisqayki, ahinapin yachanki ñoqa Señor Dios kasqayta, nispa.

¹⁴Hinan Ahabqa tapuykurqan: — ¿Piwantaq atipachinqari? nispa. Profetataq kutichirqan, Señor Diosmi nin: Provinciakunapi kamachikuqkunaq yanapaqnin waynakunawanmi, nispa. Chaymi Ahabqa tapuykullarqantaq: — ¿Pitaq phawaykunqa ñawpaqtari? nispa. Profetataq kutichirqan: — Qanmi, nispa.

¹⁵Hinan Ahabqa provinciakunapi kamachikuqkunaq yanapaqnin waynakunata wakichirqan, chaykunan karqan iskay pachak kinsa chunka iskayniyoq, hinallataq llapan Israel soldadokunatapas wakichirqan, chaykunataq karqan qanchis waranqa.

¹⁶Hinaspa chawpi p'unchayta lloqsirqanku, chaykamataq Ben-Hadadqa yanapanakunankupaq rimanakusqan kinsa chunka iskayniyoq reykunapiwan karpakunapi machashallarqanku.

¹⁷Kamachikuqkunaq yanapaqninkunataq ñawpaqta lloqsirqanku. Ben-Hadadpa qhawaq kachasqankunataq payman willarqanku: — Samariamantan wakin qharikuna hamushanku, nispa.

¹⁸Hinan Ben-Hadadqa kamachikurqan: — ¡Maqanakuqña sumaqpiña hamushaqtinkupas, kawsashaqta pusamuwaychis! nispa.

¹⁹Provinciakunapi kamachikuqkunaq yanapaqninkunataq Samaria llaqtamanta lloqsirqanku, qhepankutataq ejército rirqan.

²⁰Yanapaqkunataq huk awqankuta sapanka wañuchirqanku, chaymi usqhaylla Siria runakunaqa ayqekapurqanku. Israel runakunataq paykunata qatirqanku, Siria rey Ben-Hadadtaq ichaqa caballopi ayqerqan wakin caballería soldadokunapiwan.

²¹Chaykamataq Israel reyqa chayamurqan, hinaspan caballonkuta carretankuta munaychakuspa Siria runakunata sinchitapuni atiparqan.

²²Chay qhepatataq Israel reyman profetaqa qayllaykuspa nirqan: — Phaway, ejercitoykita astawan kallpachamuy, hinaspa allinta yuyaykuy imaynata ruwanaykita, Siria reyqa huk watamantan wakmanta phawaykusunki, nispa.

²³Siria reypa oficialninkunataq payta nirqanku: — Israel runakunaq diosninkunaqa orqo-orqo dioskunan kanku, chaymi atipawarqanchis. Ichaqa pampapi paykunawan maqanakusun chayqa, atipasunchismi.

²⁴Chay hinaqa, señor reyniyku, allinmi kanman yanapaqniyki reykunata horqospa rantinkupi ejército oficialkunata churawaq.

²⁵Chaymantataq huk ejercitota wakichikuwaq atipachikuqkuna hayk'achus karqan chay chhikata, hinallataq caballokunatapas, carretakunatapas hayk'achus karqan chay chhikata. Paykunawantaq pampapi maqanakusunchis, hinaspaqa atiparqosunpunin, nispa. Ben-Hadadtaq yuyaychasqankuta chaskirqan, hinaspan nisqankuman hina ruwarqan.

²⁶Ben-Hadadqa huk wata qhepatan Siria ejercitota wakichirqan, hinaspa Afec llaqtaman rirqanku Israel runakunawan maqanakuq.

²⁷Hinallataq Israel runakunapas wakichikurqan, hinaspa mikhunata chaskispanku Siria runakunawan maqanakuq puririrqanku. Siria runakunaq ñawpaqenpi huñuykukuspankuqa ñak'aymi iskay majada cabrakuna hinalla karqanku, Siria runakunataq ichaqa llapan pampata llimp'arqanku.

²⁸Chay raton Israel reyman huk profeta qayllaykuspa nirqan, Señor Diosmi nin: Siria runakunan ñoqamanta ninku: “Payqa orqo-orqo diosllan, manan pampakunaq diosninchu”, nispa, chayraykun qanman hap'ichisqayki llapan chay ancha askha runakunata. Ahinapin yachanki ñoqa Señor Diosqa kasqayta, nispa.

²⁹Qanchis p'unchaymi chimpapurantin Israel soldadokunawan Siria soldadokunawan huñusqa kasharqanku, qanchiskaq p'unchaypitaq maqanakurqanku. Hinan Israel soldadokunaqa chay p'unchay pachak waranqa chakipi puriq Siria soldadokunata wañuchirqanku.

³⁰Wakin soldadokunataq Afec llaqtaman ayqekurqanku, chay llaqtaq muyuriq perqantaq thuniykukurqan iskay chunka qanchisniyoq waranqa soldadokuna pataman. Ben-Hadadpas chay llaqtaman ayqellarqantaq, huk wasi ukhupitaq allinta pakakurqan.

³¹Hinan oficialkuna nirqan: — Yachaykun Israel reykunaqa khuyapayakuq kasqankuta, chay hinaqa, qhasqa p'achawan phalikakusun, kunkanchismantaq huk waskhawan watuchakusun, hinaspa Israel reyman risun, ichapaschá mana wañuchisunkichu, nispa.

³²Hinan churakurqanku qhasqa p'achawan, kunkankumantaq waskhata, Israel reyman qayllaykuspataq nirqanku: — Ben-Hadad kamachiykin valekusunki ama wañuchinaykipaq, nispa. Ahabtaq kutichirqan: — ¿Kawsashanraqchu? ¡Payqa wawqey hinan! nispa.

³³Qharikunataq chay nisqanta allinpaq hap'irqanku, hinaspa manaraq chay simi rimayta tukushaqtin kaq rato kutichirqanku: — ¡Arí! ¡Ben-Hadadqa wawqeykin! nispa. Ahabtaq nirqan: — ¡Phawaychis pusamuychis! nispa. Hinan Ben-Hadadqa Ahabman qayllaykurqan, Ahabtaq carretanman seqachirqan.

³⁴Ben-Hadadtaq nirqan: — Taytaypa taytaykimanta qechusqan llaqtakunata kutichipusqayki, hinaspa Damascopi qhatuna wasikunata ruwawaq imaynan Samariapi taytay ruwarqan ahinata, nispa. Ahabtaq kutichirqan: — Chay hinata rimanakuspanchisqa kacharipusqaykin, nispa. Ahabqa Ben-Hadadwan rimanakuspanmi payta kacharipurqan.

³⁵Profeta t'aqamanta kaq huk qharin Señor Diospa kamachisqan kaspa, profetamasinta nirqan: — K'irirqoway, nispa. Paytaq ichaqa mana chayta ruwayta munarqanchu.

³⁶Chaymi profetaqa nirqan: — Señor Diospa kamachisqanta mana kasusqaykimantan kunan ñoqamanta t'aqarikuqtiyki, huk león wañuchisunki, nispa. Cheqaqtapunin profetamanta t'aqarikuqtin hina, huk leonqa payman phawaykuspa wañuchirqan.

³⁷Chay qhepatataq profetaqa wak qhariwan tupaspa nirqan: — K'irirqoway, nispa. Hinan chay qhariqa payta maqaspa k'irirqan.

³⁸Chaymantataq profetaqa ñan patata rispa reyta suyarqan. Mana reqsinanpaqtaq mat'inta t'eqekurqan.

³⁹Rey pasashaqtintaq profetaqa kunkayoqta nirqan: — Señor reyníy, ñoqa kamachiykin maqanakuypi kasharqani, hinan huk soldado qayllaykamuwaspa huk presota apamuwarqan. Niwarqantaq: Kay qharita allinta waqaychay, ayqekunqa chayqa, qanmi paymanta wañuchisqa kanki, mana chaytaq kinsa waranqa qolqeta paganki, nispa.

⁴⁰Ichaqa ñoqa kamachiyki imaymanata ruwashanaykamataq chay presoqa chinkarqowan, nispa. Israel reytaq kutichirqan: — Qan kikiykin imatachus ruwanata rimarinki, rimarisqaykiman hina huchachasqan kanki, nispa.

⁴¹Hinan profetaqa mat'in t'eqekusqanta usqhaylla paskarqokurqan, chaymi reyqa reqsirqan profetamanta huknin kasqanta.

⁴²Chaymi profetaqa nirqan, Señor Diosmi nin: Wañuchinapaq huchachasqa qharitan qanqa kacharparinki, chayrayku paymanta kawsayniykiwan paganki, aylluykiwantaq paypa ayllunmanta paganki, nispa.

⁴³Hinan Israel reyqa Samariaman ripurqan llakisqataq phiñasqataq, hinaspa wasinman haykupurqan.