Read DIOSPA QHELQACHISQ Quechua 1 REYES 22 Bible Online

1 REYES 22 - DIOSPA QHELQACHISQ Quechua bible

1 REYES 22

¹Kinsa watañan kapurqan Siria runakunawan Israel runakunawan mana maqanakusqanku.

²Kinsakaq watapitaq Judá rey Josafatqa Israel rey watukuq rirqan.

³Israel reyqa oficialninkunatan nisqa: Qankunaqa yachankichismi Galaadpi Ramotqa ñoqanchisman tupawasqanchista. Chay hinaqa, ¿imanaqtintaq mana imatapas ruwankichischu Siria reypa munaychakusqanmanta kutichikapunanchispaq? nispa.

⁴Chaymi Josafat-ta tapuykurqan: — ¿Galaadpi Ramot llaqtaman phawaykuqtiy riysiwankimanchu? nispa. Josafat-taq kutichirqan: — Ñoqapas, soldadoykunapas, caballoyoq soldadoykunapas, huk-nisqallan kashayku qanwanpas runaykikunawanpas.

⁵Ichaqa Señor Diospa munaynintaraq tapuchiy, nispa.

⁶Hinan Israel reyqa profetakunata huñurqan, paykunan yaqa tawa pachak hina karqanku, reytaq tapuykurqan: — ¿Galaadpi kashaq Ramotman phawaykuymanchu? Icha, ¿amachu? nispa. Paykunataq kutichirqanku: — Arí, phawaykuy, Señor Diosqa hap'ichisunkin, nispa.

⁷Josafat-taq tapuykurqan: — ¿Manachu kaypi kan Señor Diospa huk profetan? Tapurillasunmantaq paytapas, nispa.

⁸Ahabtaq Josafatman kutichirqan: — Arí, kashanmi huk profeta paywan Señor Diosta tapuchinanchispaq. Payqa Imlaq churin Micaiasmi, ichaqa paytaqa cheqnikunin, manan hayk'aqpas allinkunata willawanchu, aswanpas mana allinkunallatapunin, nispa. Josafat-taq nirqan: — Ama chay hinata rimaychu, nispa.

⁹Hinan Israel reyqa huk oficialninta waqyarispa kamachirqan: — Imlaq churin Micaiasta pusarqamuy, nispa.

¹⁰Israel rey Ahabpas Judá rey Josafatpas rey p'achayoqmi kasharqanku, Samaria llaqtaman haykuna erapitaq tiyasharqanku kamachikuy tiyanankupikama, llapan profetakunataq ñawpaqenkupi profetizarqan.

¹¹Quenaanaq churin Sedequiastaq fierro waqrakunata ruwakusqa, paymi qaparirqan: — Señor Diosmi nin: Kay waqrakunawanmi Siria runakunata waqranki llapanta wañuchinaykikama, nispa.

¹²Llapan profetakunapas kaqtakaman nirqanku: — Phawaykuy Galaadpi Ramot llaqtata atipankin, Señor Diosmi llaqtata hap'ichisunki, nispa.

¹³Micaías waqyamuqta kachasqa runataq Micaiasta nirqan: — Llapan profetakunan huk-nisqalla reypa allinnintakama rimanku. Qanpas paykuna hina reypa allinninta rimallaytaq, nispa.

¹⁴Micaiastaq nirqan: — ¡Señor Diospa sutinpin jurani, imatachus rimanaypaq Señor Dios kamachiwanqa chayllatapunin rimasaq! nispa.

¹⁵Chaymantataq reyman qayllaykurqan, hinan reyqa tapuykurqan: — Micaías, ¿Galaadpi Ramot llaqtaman phawaykuymanchu? Icha, ¿amachu? nispa. Micaiastaq nirqan: — Arí, phawaykuychis, atipankichismi, Señor Diosmi hap'ichisunkichis, nispa.

¹⁶Reytaq ichaqa kutichirqan: — ¿Hayk'a kutitan nisqayki, Señor Diospa sutinpi juraspan cheqaqkaqtaqa willawanki, nispa?

¹⁷Hinan Micaiasqa nirqan: — Orqo-orqopi ch'eqesqatan llapan Israel runakunata rikurqani, mana michiqniyoq ovejakunata hina. Señor Diosmi nirqan: Kay runakunaqa mana umalliyoqmi, sapanka wasinkuta ama llakisqalla kutipuchunku, nispa.

¹⁸Israel reytaq Josafat-ta nirqan: — Nishaykin riki, manan chay runaqa hayk'aqpas allinkaqta willawanmanchu, aswanpas mana allinkaqkunallatapunin, nispa.

¹⁹Micaiastaq rimashallarqan, chhaynaqa uyariy Señor Diospa rikuchiwasqanta: Señor Diostan rikurqani kamachikuy tiyananpi tiyashaqta, pañanpipas lloq'enpipas llapan hanaq pachapi kashaqkuna sayashaqta.

²⁰Hinan Señor Diosqa tapuykurqan: — ¿Pitaq rinman Ahabta tanqariq, Galaadpi kashaq Ramot-ta phawaykunanpaq, hinaspa chaypi wañunanpaq? nispa. Hinan nirqanku hukkuna hukta, wakinkunataq huk-hinata.

²¹Chayllamanmi huk espíritu Señor Diospa ñawpaqenman asuykuspa nirqan: — Ñoqa tanqamusaq, nispa. Hinan Señor Diosqa tapuykurqan: — ¿Imaynatataq ruwawaqri? nispa.

²²Espiritutaq kutichirqan: — Reypa llapan profetankunata llullakuyta rimachisaq, nispa. Chaymi Señor Diosqa nirqan: — Phaway q'otumuy, allinpunin kanqa, nispa.

²³Chay hinaqa yachay: Señor Diosmi llullakuy espirituta llapan kay profetaykikunaq siminman churan, hinallataq qanpa wañunaykita unanchan, nispa.

²⁴Hinan Quenaanaq churin Sedequiasqa qayllaykuspa Micaiasta uyanpi ch'aqlaspa nirqan: — ¿Maynintan Señor Diospa espiritun ñoqamanta lloqsirqorqan qanman rimaykunasuykipaq? nispa.

²⁵Micaiastaq kutichirqan: — Huk wasi ukhupi k'uchun-k'uchunta pakakuspa ayqekachakunki chay p'unchayñan yachanki, nispa.

²⁶Chaymi Israel reyqa kamachirqan: — ¡Hap'iychis Micaiasta, hinaspa llaqta kamachiq Amonman churiy Joasmanwan apaychis!

²⁷Niychis paykunata: Reymi kamachisunkichis carcelman wisq'anaykichispaq, hinaspa huch'uy t'antallata pisi unullatawan qonaykichispaq, allillan qhalilla rey kutimunankama, nispa.

²⁸Micaiastaq Ahabta nirqan: — Allinchus qhalitaqchus kutimunki chayqa, kay nisqayqa manan Señor Diospa siminchu, nispa. Yapaykuspataq nirqan: — Llapan runakuna, allinta chayta uyariychis, nispa.

²⁹Chaymantataq Israel reyqa Judá rey Josafatpiwan Galaadpi Ramot llaqtaman wicharqanku.

³⁰Hinan Israel reyqa Josafat-ta nirqan: — Huk-hina p'achayoq maqanakuyman risaq, qantaq rey p'achaykiwan churakunki, nispa. Chay hinaqa, Ahabqa huk-hina p'achayoqmi maqanakuyman rirqan.

³¹Siria reyqa carretakuna purichiq kinsa chunka iskayniyoq umallikunatan kamachirqan: — Aman piwanpas maqanakunkichischu, aswanpas Israel rey contrallan, nispa.

³²Carreta purichiqkunaq umallinkunataq Josafat-ta rikurqospanku Israel rey kananpaq yuyarqanku, chaymi payman kutirirqanku phawaykunankupaq. Josafat qapariqtintaq,

³³mana Israel reychu kasqanta rikuspa manaña qatipurqankuchu.

³⁴Chaywanpas huk soldadon wach'inanwan ch'usaqllaman wach'irqan, hinan chay wach'isqa Israel reypa coraza k'akllunta haykuspa k'irirqan, chaymi Ahabqa carretan purichiqta kamachirqan: — ¡Kutichimuy carretata! ¡Horqopuway maqanakuymanta! ¡K'irisqan kashani! nispa.

³⁵Chay p'unchayqa sinchitapunin maqanakurqanku, rey Ahabtataq Siria soldadokunaq chimpanpi carretanpi sayachishallarqankupuni. K'irinmantan yawar phawarqan carretanman, tardentaq wañurqapurqan.

³⁶Inti chinkaykushaqtintaq ejército karpakunapi kay simita willachirqanku: ¡Sapanka llaqtankuman ripuchunku! ¡Sapanka wasinkuman ripuchunku! nispa.

³⁷Ahinatan Israel reyqa wañupurqan, Samariaman payta apapuspataq chaypi p'ampapurqanku.

³⁸Chay qhepatataq rabonakunaq bañakunan Samaria estanquepi carretata mayllirqanku, hinan Ahabpa yawarninta alqokuna llaqwarqan Señor Diospa nisqanman hina.

³⁹Ahabmanta wakin willakuykunapas, tukuy ruwasqankunamanta willakuykunapas, marfilwan sumaqchasqa wasi sayarichisqanmanta willakuypas, llaqtakuna sayarichisqanmanta willakuypas Israel Reykunaq Willakuynin Qelqapi qelqasqan kashan.

⁴⁰Ahabpa wañupusqan qhepatataq rantinpi churin Ocozías kamachikurqan.

⁴¹Israel suyupi tawakaq watapi Ahab kamachikushaqtinmi, Asaq churin Josafatqa Judapi kamachikuyta qallarirqan.

⁴²Josafatqa chaypacha kinsa chunka phisqayoq watayoqmi karqan, Jerusalenmantan iskay chunka phisqayoq watata kamachikurqan. Mamanqa Silhiq ususinmi karqan Azuba sutiyoq.

⁴³Josafatqa taytan Asaq kawsasqan kikillantan kawsarqan, Señor Diospa munayninman hinataq chaninta ruwarqan. Chaywanpas orqo patapi yupaychana cheqaskunataqa manan thunirqanchu, chaypin runakunaqa sacrificiota haywashallarqan, inciensotapas q'apachishallarqan.

⁴⁴Josafatqa Israel reywanmi sumaqta rimanakurqan.

⁴⁵Josafatmanta wakin willakuykunapas, atiywan ruwasqanmanta willakuykunapas, maqanakuyta umallisqankunamanta willakuypas, Judá Reykunaq Willakuynin Qelqapi qelqasqan kashan.

⁴⁶Josafatqa wikch'urqanmi suyumanta yupaychana wasikunapi yupaychaq hamuqkunawan t'inkikuq qharikunata, paykunan taytan Asaq tiemponmantapacha qheparqanku.

⁴⁷Edom suyupiqa manan chaypacha rey karqanchu, aswanpas huk kamachiqllan karqan.

⁴⁸Josafatqa ruwallarqantaqmi lamar-qochanta puriq barcokunatapas, Ofirmanta qorita apamunanpaq, ichaqa Ezión-Geberpi barcokuna ñut'u p'akikusqan hawan mana ripurqankuchu.

⁴⁹Chaypachan Ahabpa churin Ocoziasqa Josafat-ta nirqan: — Qochanta puriq runaykikunata ñoqaq qochanta puriq runaykuna barcokunapi riysichun, nispa. Josafat-taq ichaqa mana munarqanchu.

⁵⁰Josafatmi wañukapurqan, hinan David ñawpa taytanpa llaqtanpi ñawpa taytakunaq aya p'ampananpi p'ampapurqanku. Chay qhepatataq churin Joram rantinpi kamachikurqan.

⁵¹Judapi Josafat chunka qanchisniyoqkaq watapi kamachikushaqtinmi Ahabpa churin Ocoziasqa Samariamanta Israelpi kamachikuyta qallarirqan, kamachirqantaq iskay watata.

⁵²Ichaqa manapunin Señor Diospa munayninman hinachu ruwarqan, tayta-mamanpa mana allin ruwasqantapas Israelta huchallichiq Nabatpa churin Jeroboampa ruwasqantapas ruwallarqantaq.

⁵³Hinallataq Baal diostapas servispa yupaycharqan, Israelpa Diosnin Señorta phiñachispa, imaynan taytanpas ruwaq kasqa hinata.