Read DIOSPA QHELQACHISQ Quechua 1 REYES 3 Bible Online

1 REYES 3 - DIOSPA QHELQACHISQ Quechua bible

1 REYES 3

¹Salomonmi Egipto suyu rey Faraonwan aylluchakurqan, chaymi rey Faraonpa ususinwan casarakurqan, hinaspa Davidpa Llaqtan nisqaman payta pusarqan. Chaypitaq tiyarqanku, reypa wasintapas, Dios yupaychana wasitapas, Jerusalén llaqta muyuriq perqatapas sayarichiyta tukunankukama.

²Chaykamaqa manan Señor Dios yupaychana wasita sayarichirqankuraqchu, chaymi orqo patakunapi yupaychana cheqaskunapi sacrificiota haywaqku.

³Salomonqa munakurqanmi Señor Diosta, hunt'arqantaq David taytanpa kamachisqan simikunata, ichaqa orqo patakunapin yupaychana cheqaskunapi sacrificiota haywaq inciensotapas ruphachiq.

⁴Gabaón llaqtapin karqan aswan mentasqa orqo patapi yupaychana cheqas. Hinan reyqa sacrificio haywaq Gabaonta rirqan, chay altarpin waranqa sacrificiota ruphachispa haywarqan.

⁵Gabaonpin chay tuta Señor Diosqa Salomonman mosqoypi rikhurispa nirqan: — Ima munasqaykita mañakuway, ñoqataq qosqayki, nispa.

⁶Hinan Salomonqa kutichirqan: — Taytay Davidmi qanpaq hunt'aq karqan, chanintaq allin runataq, chaymi qanqa tukuy tiempo khuyapayarqanki. Qanqa kaqllapunin chay hatun mana tukukuq khuyapayakuyniykiwan payta munakushanki, chayraykun qanqa kamachikunan tiyanapi churinta tiyaykuchinki.

⁷Chay hinaqa, Diosníy, Señor Dios, qanmi David taytaypa rantinpi kamachikuqta churawarqanki, ichaqa waynallaraqmi kani, manan imatapas yachaniraqchu.

⁸Chaywanpas akllakusqayki llaqtaykiwanmi kashani, paykunaqa ancha hatun mana yupay atina llaqtan.

⁹Allin yachayta qoykuway llaqtaykita kamachinaypaq, allinta mana allinta yachaspa chaninchanaypaq, mana chayqa manan pipas kay hatun llaqtaykita kamachiyta atinmanchu, nispa.

¹⁰Chay hinata mañakuqtinmi, Señor Diosqa Salomonta nirqan: — Allinmi.

¹¹Qanqa manan mañakuwankichu unay kawsaytapas qhapaq kaytapas awqaykikunaq wañunantapas, aswanpas allin yachayllata allin chaninchaywan kamachinaykipaq mañakuwanki.

¹²Chay hinaqa, qosqaykin mañakuwasqayki allin yachayta allin yuyaytawan. Qanmanta ñawpaqtaqa manan qan hina yachaysapa karqanchu, manataqmi qhepaykitapas kanqachu.

¹³Qollaykitaqmi qhapaq kaykunatapas atiytapas, chaykunataqa manan mañakuwarqankichu, tukuy kawsasqayki p'unchaypiqa manan qan hina reyqa kanqachu.

¹⁴Taytayki David hina munayniyta ruwanki, kasukunkitaq kamachikuyniykunata unanchayniykunatapas chayqa, unaytan kawsachisqayki, nispa.

¹⁵Salomontaq puñusqanmanta rikch'arispa mosqoy kasqanta repararqan. Jerusalenman kutipuspataq Señor Diospa rimanakuynin arcaman asuykurqan, hinaspa ruphachina sacrificiokunata, sumaq kawsay sacrificiokunatawan haywarqan. Chay qhepatataq llapan oficialninkunaman hatun mikhuyta haywarqan.

¹⁶Chay tiempopin iskay rabona warmikuna reyman rirqanku.

¹⁷Reyman asuykuspankutaq, huknin warmi nirqan: — ¡Ay! ¡Señor reyníy! Kay warmipiwanmi kuska huk wasillapi tiyayku, hinan ñoqa paypa qayllanpi tiyasqayku wasipi huk qhari wawata wachakurqani.

¹⁸Wachakusqaymanta kinsa p'unchayña kashaqtiytaq, kay warmipas huk qhari wawata wachakullarqantaq. Iskaynillaykun kasharqayku, manan pipas wak runa chay wasipi ñoqaykuwan karqanchu, aswanpas ñoqayku iskaynillaykupuni.

¹⁹Hinan huk tuta kay warmiqa wawan patapi puñurqakapusqa, chaymi wawanqa mukisqa wañupusqa.

²⁰Hinan kuska tutata hatarirqospa, ñoqa puñushaqtiy wawayta puñunaymanta aparqowaspa puñunanman siriykuchisqa, ñoqaq puñunaymantaq paypa wañusqa wawanta siriykuchimuwasqa.

²¹Pacha illarimuytataq ñuñunaypaq rikch'arispa wawayta qhawaykurqani, wañusqataq kapushasqa. Ichaqa tutamanta inti k'anchaypiña allinta qhawaykuspaymi repararqani mana wachakusqay wawaychu kasqanta, nispa.

²²Hukkaq warmitaq nirqan: — ¡Manan! Kawsashaqkaqmi ñoqaq wawayqa, wañusqakaqqa qanpan, nispa. Ñawpaq rimaq warmitaq kutichirqan: — ¡Manan hinachu! Wañusqakaqmi qanpa, kawsashaqkaqqa wawaypunin, nispa. Ahinatan reypa ñawpaqenpi ch'aqwarqanku.

²³Chaymi reyqa nirqan: — Huknin warmin nin: Kawsashaqkaqmi ñoqaq waway, wañusqakaqqa qanpan, nispa. Hukkaq warmitaq nin: Manan, kawsashaq wawaqa ñoqaqmi, wañusqa wawan qanpaqa, nispa.

²⁴Chaymi reyqa kamachikurqan: — ¡Apamuwaychis espadata! nispa. Espadata payman apamuqtinkutaq,

²⁵nirqan: — Kawsaqkaq wawata iskayman phasmiychis, hinaspa sapankaman kuskanta qoychis, nispa.

²⁶Kawsaq wawaq mamanpuni kaq warmitaq ichaqa wawanmanta sinchita ukhu sonqonmanta llakikuspa reyta valekurqan: — ¡Reyníy! ama hinachu kay, ama wawata wañuchiychu, aswanpas kay warmiman qopuy, nispa. Hukkaq warmitaq nirqan: — Manan ñoqamanpas qanmanpas qowasunmanchu. ¡Iskayman phasmikuchun! nispa.

²⁷Hinan reyqa chaninchaspa kamachikurqan: — Wawaq mana wañunanta munaq warmiman wawata qopuychis, ama wañuchiychischu. Paymi chay wawaq cheqaq mamanqa, nispa.

²⁸Llapan Israelmi yacharqan imaynatachus chay ch'aqwayta reypa chaninchasqanta, chaymi anchata reyta respetarqanku, yacharqankutaq chaninchaywan juzgananpaq Diospa yachay qosqanta.