Read DIOSPA QHELQACHISQ Quechua 1 REYES 9 Bible Online

1 REYES 9 - DIOSPA QHELQACHISQ Quechua bible

1 REYES 9

¹Rey Salomón Señor Dios yupaychana wasitapas kamachikunan wasintapas tukuy munasqankunatapas sayarichiyta tukuqtinmi,

²Señor Diosqa iskaykaq kutipi payman rikhurirqan, imaynan Gabaonpi rikhurirqan hinata.

³Hinaspan nirqan: — Uyarinin mañakuwasqaykita, valekuwasqaykitapas, sapaqchanitaqmi sayarichipuwasqayki wasitapas, chaymi ñoqa kashallasaqpuni yupaychawanaykichispaq. Chay wasitaqa qhawashallasaqmi manataq qonqasaqchu.

⁴Chay hinaqa, ñawpaqeypi chaninta kawsanki taytayki David hina allin yuyaywan, tukuy sonqo, qanta kamachirqayki chaykunata lliwta kasukuspa unanchayniykunatapas chaninchayniykunatapas hunt'anki chayqa,

⁵wiñaypaqmi Israelpi kamachikuyniykita takyachisaq, imaynan Davidman prometerqani: Mirayniykiqa Israel suyuta kamachishallanqapunin, nispa chayman hina.

⁶Ichaqa qankunapas churiykichiskunapas ñoqamanta t'aqarikunkichis, manataq hunt'ankichischu kamachikuyniykunatapas unanchayniykunatapas, aswanpas wak dioskunata yupaychaspa servinkichis chayqa,

⁷qosqay suyumantan Israel llaqtata ch'eqechisaq, yupaychawanaykichispaq sapaqchakusqay wasitapas wikch'usaqmi, chaymi Israel runakunata llapan suyukuna pisichanqa, asipayanqataq.

⁸Hinataq chay wasipas raqay-raqay kanqa, tukuy chayninta puriqkunataq sinchita llaksakuspa, ninqaku: ¡Achacháw! ¿Imanaqtintaq Señor Diosqa kay suyutapas kay wasitapas kay hinata ruwarqan? nispa.

⁹Chaymi kutichinqaku: Egipto suyumanta ñawpa taytanku horqomuq Diosninku Señor Diostan saqerparisqaku, wak dioskunatataq yupaychaspa servisqaku, chaymi Señor Diosqa chay hatun llakiwan paykunata muchuchisqa, nispa.

¹⁰Salomonqa iskay chunka watapin sayarichirqan Señor Dios yupaychana wasita, kamachikunan wasitawan.

¹¹Tukuy chay tiempopin Tiro llaqta rey Hiramqa Salomonman apachishallarqan cedro kurkuta, pino kurkuta, qorita, hayk'an munasqanta. Chay qhepatataq Salomonqa Hiramman qorqan Galilea hap'iypi iskay chunka llaqtakunata.

¹²Hiramtaq chay qosqan llaqtakunata qhawaq rirqan, ichaqa manan payman gustarqanchu.

¹³Hinan Salomonta nirqan: — Wawqelláy, ¿imayna llaqtakunatataq kaykunatari qowanki? nispa. Chayraykun chay hap'iypi llaqtakunaqa “Cabul”[2] nisqa sutiyoq kapurqan.

¹⁴Hirampa rey Salomonman apachimusqan qoriqa kinsa waranqa isqon pachak soqta chunka kilon kasqa.

¹⁵Rey Salomonqa mit'ani llank'aytan kamachikurqan, hinan chay mit'ani runakunawan sayarichirqan Señor Dios yupaychana wasita, kamachikunan wasita, Jerusalén muyuriq perqatawan, hinallataq llaqtaq inti lloqsimuy cheqasnin p'ukruta hunt'achirqan. Sayarichillarqantaq Hazor llaqtata, Meguido llaqtata, Gezer llaqtatawan.

¹⁶(Egipto rey Faraonmi Gezer llaqtata maqanakuypi atipaspa ninawan kanaykusqa, llapan chay llaqtapi tiyaq Canaán runakunatataq wañuchisqa. Chaymantataq ususinman qopusqa Salomonwan casarakuqtin.

¹⁷Chay Gezertan Salomonqa wakmanta sayarichirqan). Hinallataq sayarichirqan Uray Bet-horonta,

¹⁸Baalat-ta, ch'inneqpi kashaq Tamartawan.

¹⁹Sayarichillarqantaq mikhuy taqena llaqtakunata, maqanakuypaq carreta waqaychana llaqtakunata, caballo uywana llaqtakunatawan, hinallataq Jerusalenpi Libanopi, kamachisqan suyuntinpi hayk'an munasqantapas.

²⁰Canaán runakunaq mirayninmanta qhepaqkunan karqan: Amor runakuna, Het runakuna, Ferez runakuna, Hev runakuna, Jebus runakunapiwan. Paykunaqa manan Israel runakunachu karqanku.

²¹Chaykunatan Israel runakunaqa mana wañuchisqakuchu, chaymi Salomonqa mit'anipi llank'achirqan, hinan Israel runakunaq kamachin kapurqanku.

²²Ichaqa manan ch'ullallapas Israel runaqa kamachi karqanchu, aswanpas paykunaqa karqanku soldadokuna, oficialkuna, umallikuna, qollanakuna, hinallataq maqanakuy carretakunata kamachiqkuna, caballopi maqanakuq soldadokuna ima.

²³Llank'aqkunata kamachiq umallikunan karqan phisqa pachak phisqa chunka, paykunan Salomonpa llank'achisqanpi kamachikurqanku.

²⁴Rey Faraonpa ususinqa Davidpa Llaqtanmanta Salomonpa paypaq wasi sayarichipusqanmanmi astakurqan. Hinan Salomonqa llaqtaq inti lloqsimuy cheqasnin p'ukruta hunt'achirqan.

²⁵Salomonqa watapi kinsa kutitan ruphachina sacrificiota, sumaq kawsay sacrificiotapas Señor Diospaq sayarichisqan altar patapi haywaq, hinallataq inciensota Señor Diospa qayllanpi q'apachiq. Ahinatan Dios yupaychana wasi sayarichiyta tukurqan.

²⁶Rey Salomonqa ruwallarqantaq barcokunata Puka Qocha patapi, Edom suyu Elat qaylla Ezión-geberpi.

²⁷Hinan rey Hiramqa lamar-qocha allin reqsiq wakin runakunata kacharqan. Salomonpa runankunawan chay barcokunapi llank'anankupaq.

²⁸Paykunataq Ofirman chayaspanku, yaqa chunka phisqayoq waranqa kilo qorita cargamurqanku, hinaspa rey Salomonman aparqanku.