Read DIOSPA QHELQACHISQ Quechua 2 REYES 12 Bible Online

2 REYES 12 - DIOSPA QHELQACHISQ Quechua bible

2 REYES 12

¹Qanchiskaq watapi Jehú kamachikushaqtintaq, Joasqa Jerusalenmanta kamachikuyta qallarirqan, tawa chunka watataq kamachikurqan. Joaspa maman Sibiaqa Beersebamantan karqan.

²Tukuy kawsasqan p'unchaymi Joasqa Señor Diospa munayninman hina chaninta ruwarqan sacerdote Joiadaq yachachisqan kasqanrayku.

³Chaywanpas wak'a dios yupaychana cheqaskunaqa manan thunisqachu karqan, chaymi runakunaqa sacrificiota chaypi haywashallarqanku, inciensotapas q'apachishallarqanku.

⁴Huk p'unchaymi Joasqa sacerdotekunata nirqan: — Qankuna huñuychis Señor Diosta yupaychana wasiman apamusqanku Señor Diospaq t'aqasqa llapan qolqekunata, sapanka runakunaq contribución pagasqanta, hayk'an sumaq sonqo ofrendakunatawan.

⁵Hinaspa sapankaykichis qolqe waqaychaqkunamanta chaskinkichis yupaychana wasita tukuy allichana cheqaskunata allichanaykichispaq, nispa.

⁶Joaspa kamachikusqanqa iskay chunka kinsayoq watañan karqan, sacerdotekunataq ichaqa yupaychana wasita manaraq allicharqankuchu.

⁷Hinan rey Joasqa sacerdote Joiadata hukkaq sacerdotekunatawan waqyachirqan, hinaspa nirqan: — ¿Imanaqtintaq Dios yupaychana wasita mana allichankichischu? Kunanmantaqa manañan qolqe waqaychaqkunamanta qolqeta chaskinkichisñachu, aswanpas chaskisqaykichis qolqeta qopuychis yupaychana wasita allichanankupaq, nispa.

⁸Chaymi sacerdotekunaqa: — Allinmi, nirqanku, manaña runakunamanta qolqeta chaskinankupaq, manaña yupaychana wasita allichanankupaq.

⁹Hinan sacerdote Joiadaqa huk cajonta wisq'anan patata t'oqorqan, hinaspa altar qayllaman churarqan, Señor Dios yupaychana wasiman haykuna paña lado cheqasman. Yupaychana wasiman haykuna qhawaq sacerdotekunataq chay cajonman Señor Diospaq apamusqanku llapan qolqekunata churarqanku.

¹⁰Askha qolqeyoqña cajón kashasqanta reparaqtinkutaq, hamuqku reypa qelqaqnin uma sacerdotepiwan, hinaspa Señor Dios yupaychana wasiman apamusqanku qolqeta yuparqanku, chaymantataq wayaqakunaman hich'aykurqanku.

¹¹Hayk'achus kasqan yupasqaña kaqtintaq, Dios yupaychana wasita allichachiqpaq churasqa umallikunaman qorqanku. Paykunataq chay qolqemanta pagarqanku k'ullu llaqllaqkunaman, llank'aqkunaman,

¹²wasi perqaqkunaman, rumi thupaqkunamanwan. Hinallataq yupaychana wasita allichanankupaq rantirqanku kurkukunata, thupasqa rumikunatawan, pagallarqankutaq tukuy imakunapichus gastakusqantapas.

¹³Chay qolqemantaqa manan Señor Dios yupaychana wasipaq ruwarqankuchu qolqe vasokunatapas, pábilo allichanakunatapas, puruñakunatapas, cornetakunatapas, qorimanta qolqemanta serviciokunatapas,

¹⁴aswanpas llank'achiqpaq churasqa umallikunamanmi qorqanku Señor Dios yupaychana wasita allichaqkunaman paganankupaq.

¹⁵Manataqmi chay umallikunataqa qolqe qosqankumanta tapupayarqankuchu, hunt'asqata ruwashasqankurayku.

¹⁶Aswanpas huchallikusqankumanta pampachaq qolqetapas, hucha pampachachiq qolqetapas manan yupaychana wasimanchu aparqanku, aswanpas sacerdotekunamanmi qorqanku paykunapaq kasqanrayku.

¹⁷Haqay p'unchaykunapin Siria rey Hazaelqa Gat llaqta contra phawaykurqan, hinaspa atiparqan, chaymantataq Jerusalén contra maqanakuq puririrqan.

¹⁸Chaymi Judá rey Joasqa ñawpa reykunaq Josafatpa Jorampa Ocoziaspa Señor Diospaq t'aqasqan kaqkunata, pay kikinpa t'aqasqan kaqkunata, yupaychana wasipi waqaychasqa llapa qorita, paypa wasinpi qoritawan lliwta huñurqospa, Hazaelman apachirqan. Chaymi Hazaelqa Jerusalenmanta ripurqan.

¹⁹Joasmanta wakin willakuykunapas tukuy ruwasqankunamantapas Judá Reykunaq Willakuynin Qelqapi qelqasqan kashan.

²⁰Joaspa oficialninkunan pay contra yuyaykurqanku, hinaspan Jerusalenpa inti lloqsimuy ladon Milo[4] wasi qayllapi wañuchirqanku, Silaman uraykushaq ñanpi.

²¹Wañuchiq oficialkunaqa karqan Simeatpa churin Josacar, Somerpa churin Jozabad. Wañupuqtintaq Davidpa Llaqtan nisqapi ayllunpa aya p'ampananpi p'ampapurqanku. Chay qhepatataq churin Amasías rantinpi kamachikurqan.