Read DIOSPA QHELQACHISQ Quechua 2 REYES 17 Bible Online

2 REYES 17 - DIOSPA QHELQACHISQ Quechua bible

2 REYES 17

¹Chunka iskayniyoqkaq watapiña Judá suyupi Ahaz kamachikushaqtinmi, Elaq churin Oseasqa Israel suyupi kamachikuyta qallarirqan, kamachikurqantaq Samariamanta isqon watata.

²Payqa manan Señor Diospa munayninman hinachu ruwarqan, ichaqa manan paymanta ñawpaq kaq Israel reykuna hinapunichu huchallikurqan.

³Asiria suyu rey Salmanasarmi rey Oseaswan maqanakurqan, chaymantataq Oseasqa kamachin kapurqan, contribuciontataq pagarqan.

⁴Oseastaq ichaqa Salmanasar contra yuyaykusharqan, chaymi Egipto suyu rey “So” nisqa sutiyoqman willaqkunata kacharqan, sapa wata paganan contribuciontapas manañataq Salmanasarman pagarqanchu. Q'otushasqanta yachaspataq Salmanasarqa Oseasta hap'ispa carcelman wisq'arqan.

⁵Chaymantataq suyuntinta munaychakuq phawaykurqan, Samaria llaqtaman chayaspataq chay llaqtata kinsa wata muyuykurqan.

⁶Isqonkaq watapi Oseas kamachikushaqtintaq, Asiria suyu reyqa Samaria llaqtata hap'irqan, hinaspa Israel runakunata Asiriaman kamachipaq aparqan, hinallataq Halah llaqtapi, Habor mayu qaylla Gozán llaqtapi, Medo runakunaq llaqtankunapiwan tiyachirqan.

⁷Israel runakunan Diosninku Señor Dios contra huchallikurqanku, chayraykun paykunataqa chaykunawan muchuchirqan. Señor Diosqa unayñan paykunata Egipto rey Faraonpa atiyninmanta qespichispa Egiptomanta horqomurqan. Chaywanpas Israel runakunaqa wak dioskunatan yupaycharqanku,

⁸paykunaq qayllanmanta Señor Diospa wikch'usqan suyu runakunaq ruwayninkuman hinan ruwarqanku, hinallataq Israel reykunaq mana allin ruway kamarisqankunatapas ruwallarqankutaq.

⁹Israel runakunaqa millay qhelli simikunatan rimarqanku Señor Diosninku contra, hinataq wak'a dios yupaychana cheqaskunata ruwasqaku suyuntinpi qhawana torremanta qallarispa allin perqasqa llaqtakunakama.

¹⁰Moqo patakunapi llapan k'allmasapa sach'a chakikunapin Asera diosaq rikch'ayninkunata, yupaychana saywa rumikunata sayarichisqaku.

¹¹Hinaspataq paykunaq qayllanmanta Señor Diospa wikch'usqan runakunaq ruwayninkuman hina wak'a dios yupaychana cheqaskunapi inciensota q'apachirqanku. Hinallataq sinchi mana chaninta ruwaspa Señor Diosta phiñachisqaku.

¹²Señor Diosqa nirqanmi: Aman idolokunata yupaychankichischu, nispa. Paykunataq ichaqa yupaychashallarqanku.

¹³Señor Diosqa anyachisqan Israel runakunata, Judá runakunata llapan profetankunawan kamachinkunawanpas kay hinata: Mana allin ruwayniykichiskunata saqepuychis, hinaspa hunt'aychis unanchayniykunata, lliw kamachikuy simiykunata, ñawpa taytaykichiskunaman kasukunankupaq yachachisqay lliw simiykunatapas. Chaykunatan kamachiy profetakunawan willachirqaykichis, nispa.

¹⁴Paykunataq ichaqa mana kasukurqankuchu, aswanpas ñawpa taytanku hinallataq k'ulluchakurqanku, Diosninku Señor Diosman mana hap'ipakuspa.

¹⁵Kamachikuyninkunatapas ñawpa taytankuwan rimanakusqantapas anyasqan simikunatapas pisichaspankun, mana imapaq serviq idolokunata servirqanku, chaymi paykunapas mana serviq kapurqanku. Paykunaqa muyuriqninkupi kashaq runakunaq ruwayninkutan ruwarqanku: Paykuna hinaqa aman ruwankichischu, nispa Señor Dios nishaqtinpas manan kasukurqankuchu. Chay hinapin paykunaqa Señor Diospa hark'asqan kaqta ruwarqanku.

¹⁶Diosninku Señor Diospa tukuy kamachikuyninkunatan wikch'upusqaku, hinaspa unuyachispa iskay torokunata, Asera diosaq rikch'ayninta ruwakusqaku, yupaychallasqakutaq llapan ch'askakunatapas Baal dioskunatapas.

¹⁷Hinallataq qhari wawankutapas warmi wawankutapas ruphachina sacrificiopi haywasqaku, watuchikuykunata layqakuykunatapas ruwallasqakutaq. Señor Diospa ñawpaqenpi tukuy mana chanin ruwaykunamanmi k'askakurqanku, ahinapin Señor Diosta phiñachirqanku.

¹⁸Chayraykun Señor Diosqa Israel contra k'arakta phiñakuspa llapanta ñawpaqenmanta wikch'urqan. Judá ayllullatañan qhepachirqan,

¹⁹ichaqa Judá runakunapas manan hunt'allarqankutaqchu Diosninku Señor Diospa kamachikusqan simikunata, aswanpas Israel runakunaq ruway kamarisqanta hinallataq ruwarqanku.

²⁰Chaymi Señor Diosqa Israel runakunaq llapan mirayninkunata pisicharqan, k'umuykuchispataq llat'anaqkunaman hap'iykuchirqan qayllanmanta karuman wikch'unankama.

²¹Señor Diosmi Judá ayllumanta Israelta t'aqarqan, hinan Israel runakunaqa Nabatpa churin Jeroboamta reyta churakurqanku. Paymi Israel runakunata sinchita huchallichirqan Señor Diosmantapas t'aqarqan.

²²Chay hinapin Israel runakunaqa kikin Jeroboampa ruwasqan huchakunata ruwashallarqanku, manataq chaykunamanta t'aqakurqankuchu.

²³Chaymi Señor Diosqa ñawpaqenmanta Israelta wikch'upurqan, llapan profetankunawan willachisqanman hina, ahinapin Israel llaqtaqa Asiria suyuman kamachipaq apasqa karqanku, chaypin kunan p'unchaykama kashanku.

²⁴Asiria suyu reymi Babiloniamanta, Cutamanta, Avamanta, Hamatmanta, Sefarvaimmantawan runakunata kacharqan Samariapi kaq llaqtakunapi Israel runakunaq rantinpi tiyanankupaq. Ahinatan Samaria suyuta hap'ikapurqanku, hinaspa llaqtankunapi tiyarqanku.

²⁵Chay runakunaqa tiyayta qallarishaspankun Señor Diosta mana yupaycharqankuchu, chaymi payqa leonkunata kachamurqan, hinan leonkuna wakinninkuta wañuchirqan.

²⁶Hinaqtinmi Asiria reyman willamurqanku: — Samariapi kaq llaqtakunaman tiyanankupaq kachasqayki runakunaqa manan chay suyuq diosninpa kamachikuyninta yachankuchu, chay hawan chay diosqa leonkunata kachamurqan, hinan leonkuna runakunata wañuchishan, nispa.

²⁷Hinan Asiria reyqa kamachikurqan: — Kachaychis preso apamusqaykichis mayqen sacerdotetapas chaypi tiyananpaq, hinaspa chay suyu diospa kamachikuyninta yachachinanpaq, nispa.

²⁸Chaymi Samariamanta presota apasqanku sacerdotekunamanta hukninta kutichimurqanku, hinan chay sacerdoteqa Betelpi tiyarqan, yachachirqantaq runakunaman imaynatachus Señor Diosta yupaychayta.

²⁹Ichaqa sapanka suyun tiyasqanku llaqtapi dioskunata ruwakurqanku, hinaspa Samaria llaqtayoq runakunaq wak'a dios yupaychanan cheqaskunaman chaykunata churarqanku.

³⁰Babilonia runakunaqa diosninku Sucot-benotpa rikch'aynintan ruwakurqanku, Cuta runakunataq diosninku Nergalpa rikch'ayninta, Hamat runakunataq Asimaq diosninkuq rikch'ayninta,

³¹Ava runakunataq diosninkuna Nibhazpa rikch'ayninta, Tartacpa rikch'aynintawan ruwakurqanku. Sefarvaim runakunataq wawankuta ninapi ruphachirqanku huk sacrificiota haywanankupaq Adramelec diosninkuman Anamelec diosninkumanwan.

³²Señor Diostapas yupaychallarqankutaqmi, ichaqa paykuna ukhullamantan tukuy rikch'aq runakunata akllakurqanku sacerdote kanankupaq, wak'a dios yupaychana cheqaskunapi servinankupaq.

³³Chay hinaqa, Señor Diostaña yupaychashaspapas, diosninkutaqa yupaychashallarqankupunin hamusqanku llaqtankupi imaynatachus ruwayta yachasqankuman hina.

³⁴Paykunaqa chay ruwayninkuman hinan ruwashallankupuni. Manan Señor Diostaqa yupaychankuchu, manataq Israel sutichasqa Jacobpa mirayninman Señor Diospa qosqan kamachikuykunata, unanchaykunata, yachachikuykunatapas kasukunkuchu.

³⁵Jacobpa mirayninwan rimanakushaspanmi Señor Diosqa kamachisqa: Aman wak dioskunata yupaychankichischu, aman k'umuykunkichischu, aman servinkichischu, amataq sacrificiotapas haywankichischu.

³⁶Aswanpas ñoqa Señor Diosnillaykichista yupaychawaychis, ñoqan Egipto suyumanta hatun atiyniywan horqomurqaykichis. Ñoqallamanmi k'umuykuwanaykichis, sacrificiotapas haywawanaykichis.

³⁷Hinataq kasukuywan hunt'aychis qelqapi qosqay kamachikuy simiykunata, unanchayniykunata, yachachikuyniykunata, kamachikuyniykunatapas, amataq wak dioskunata yupaychaychischu.

³⁸Ama qonqaychischu qankunawan rimanakusqayta, amataq wak dioskunata yupaychaychischu,

³⁹aswanpas ñoqa Diosniykichis Señor Diosllata hatunchawaychis, hinan awqaykichispa atiyninmanta qespichisqaykichis, nispa.

⁴⁰Chaywanpas manan paykunaqa kasukurqankuchu, aswanpas ñawpa ruwayninkutaqa kaqllatapunin ruwasharqanku.

⁴¹Chay suyu runakunaqa Señor Diosta yupaycharqankutaq, idolokunatapas yupaychashallarqankutaq. Mirayninkupas ñawpa taytanku hinallataqmi ruwarqanku, kunan p'unchaykamapas ahinallatapunin ruwashanku.