Read DIOSPA QHELQACHISQ Quechua 2 REYES 20 Bible Online

2 REYES 20 - DIOSPA QHELQACHISQ Quechua bible

2 REYES 20

¹Chay p'unchaykunapin Ezequiastaqa wañuy onqoy hap'irqan, hinan Amozpa churin profeta Isaiasqa watukuq rispa nirqan, Señor Diosmi nin: Testamentota ruwakuy, wañukapunkin, manan qhaliyankichu, nispa.

²Hinan Ezequiasqa perqa ladoman uyanta kutirispa mañakurqan:

³Señor Diosníy, valekuykin imaynatachus servisqayta yuyarinaykipaq. Ñoqaqa tukuy sonqon servirqayki, mana waqllispa munayniykiman hina chaninta ruwaspa, nispa. Hinaspa sonqo nanayta waqaykurqan.

⁴Reypa wasin chawpi patiomanta manaraq lloqsishaqtintaq Señor Diosqa Isaiasta nirqan:

⁵— Kutiy, hinaspa llaqtaypa umallin Ezequiasta nimuy, ñawpa taytaykiq Davidpa Diosnin Señormi nin: Uyarinin mañakuwasqaykita, rikunin waqasqaykitapas. Qhaliyachisqaykin, hinan kinsa p'unchaymanta ñoqa yupaychana wasita rinki, nispa.

⁶Chunka phisqayoq watatawanraqmi kawsachisqayki. Qantapas Jerusalén llaqtatapas Asiria reymanta qespichisqaykichismi. Kay llaqtataqa waqaychasaqmi David kamachiyrayku ñoqaq sutiyrayku, nispa.

⁷Chaymantataq Isaiasqa nirqan: — Higosta kutaychis, nispa. Hinan chayta ruwaspa rey Ezequiaspa nanaqnin cheqasman laq'arqanku, chaymi reyqa qhaliyapurqan.

⁸Ezequiasmi Isaiasta tapuykurqan: — ¿Imaynapitaq yachasaq Señor Dios qhaliyachiwananta, kinsa p'unchaymanta yupaychana wasita rinaytapas? nispa.

⁹Isaiastaq kutichirqan: — Kay señaltan Señor Dios qosunki prometesqasuyki hunt'akunanta yachanaykipaq. ¿Chunka gradasta inti llanthu ñawpanantachu munanki? Icha, ¿qhepaman kutinantachu munanki? nispa.

¹⁰Hinan Ezequiasqa kutichirqan: — Manan sasachu llanthuq ñawpaqman wikch'unanqa, qhepaman kutinanmi ichaqa sasa, nispa.

¹¹Chaymi profeta Isaiasqa Señor Diosmanta mañakurqan, hinan Señor Diosqa Ahazpa ruwasqan inti tupunan llanthuta qhepaman kutichirqan, chunka gradasta.

¹²Chay p'unchaykunapin Babilonia suyu rey Baladanpa churin Merodac-Baladanqa Ezequiaspa onqosqanta yacharqan, hinaspan willaqkunata kacharqan, apachirqantaq cartakunata huk sumaq sonqotawan.

¹³Ezequiastaq sumaqta chaskirqan chay willaqkunata, hinaspa qhawachirqan kawsaynin waqaychana wasikunapi kashaq qorita, qolqeta, q'apaq hawinakunata, sumaq aceitekunatawan, armakuna waqaychana wasitapas. Wasinpi kaqkunatapas suyuntinpi kaqkunatapas llapallantan qhawachirqan.

¹⁴Hinan profeta Isaiasqa Ezequiasman watukuq rispa tapuykurqan: — ¿Maymantan chay qharikuna hamusqaku? ¿Ima nisunkitaq? nispa. Ezequiastaq kutichirqan: — Karu llaqtamantan hamusqaku, Babiloniamantapacha, nispa.

¹⁵Isaiasqa tapuykullarqantaq: — ¿Imakunatataq wasiykipi qhawarqanku? nispa. Hinan Ezequiasqa kutichirqan: — Tukuy chaypi kaqkunatan rikurqanku. Mana pakaykuspan llapallanta kaqniykunata qhawachirqani, nispa.

¹⁶Chaymi Isaiasqa payta nirqan: — Uyariy Diospa siminta:

¹⁷Hamuq p'unchaykunapin Babiloniaman apanqaku wasiykipi hayk'an kaq llapan kaqniykikunata, ñawpa taytaykikunaq kunankama huñusqan llapan kaqniykikunatapas. Manan imallapas kaypi qhepanqachu, nispa.

¹⁸Qan kikiykiq wakin mirayniykitapas Babiloniamanmi apallanqakutaq, hinan kapaspanku reypa wasinpi kamachipaq churanqaku, nispa.

¹⁹Ezequiastaq kutichirqan: — Allinmi willawasqayki Señor Diospa siminqa, nispa. Payqa yuyaykurqanmi: Kawsanaykamaqa manan ima llakipas sasachaypas kanqachu, nispa.

²⁰Ezequiasmanta wakin willakuykunapas atiyninmantapas, imaynatachus estanqueta llaqtaman pampa ukhunta riq yarqhatawan ruwasqanmantapas Judá Reykunaq Willakuynin Qelqapi qelqasqan kashan.

²¹Ezequías wañukapuqtinqa, churin Manasesmi rantinpi kamachikurqan.