Read DIOSPA QHELQACHISQ Quechua 2 REYES 21 Bible Online

2 REYES 21 - DIOSPA QHELQACHISQ Quechua bible

2 REYES 21

¹Manasesqa chunka iskayniyoq watayoqmi karqan kamachikuyta qallarishaspa, kamachikurqantaq Jerusalenmanta phisqa chunka phisqayoq watata. Mamanpa sutinmi Hepsiba karqan.

²Manasesqa manapunin Señor Diospa munayninman hinachu ruwarqan, aswanpas Israelpa qayllanmanta Señor Diospa wikch'usqan wak suyukunaq mana chanin millay ruwasqankunatan ruwarqan.

³Taytan Ezequiaspa thunisqan wak'a dios yupaychana cheqaskunatan wakmanta sayarichirqan, Israel rey Ahab hinan Baal diospa altarnintapas Asera diosaq rikch'aynintapas ruwarqan. Hinataq hanaq pachapi kaq llapan ch'askakunatapas yupaycharqan.

⁴Manasesqa Señor Dios yupaychana wasipipas altarkunata sayarichillarqantaqmi, chay wasimantaqa Señor Diosmi nisqa: Jerusalén llaqtapin yupaychasqa kasaq, nispa.

⁵Iskaynin pationpipas hanaq pacha ch'askakunata yupaychananpaq altarkunata sayarichirqan.

⁶Churintan sacrificiopi ruphachirqan, watuymanpas layqakuymanpas haykullarqantaqmi, wañusqakunaq almanta rimachiqkunawanpas mana allin espiritukunata rimachiqkunawanpas tapuchillarqantaqmi. Ruwasqankunaqa sinchi mana chaninmi karqan, manan Señor Diospa munayninman hinachu karqan, ahinapin Señor Diosta phiñachirqan.

⁷Señor Dios yupaychana wasipin Asera diosaq rikch'aynin ruwasqanta churarqan, chay wasimantaqa Señor Diosmi Davidta churin Salomontawan nisqa: Israel llapan ayllukuna ukhupin akllakuni Jerusalenta kay wasitawan chaypi ñoqa yupaychasqallapuni kanaypaq.

⁸Kamachiy Moisespa Israel runakunaman qosqan kamachikuy simiykunata unanchayniykunatapas paykuna makilla hunt'anqaku chayqa, ñawpa taytaykichisman qosqay suyumantaqa manan maytapas tumaqayaqta purichisqaykichischu, nispa.

⁹Paykunan ichaqa mana kasukurqankuchu, aswanmi Manasesqa waqllichirqan, paykunataq sinchi mana chaninta ruwaspa paykunaq qayllanmanta Señor Diospa wikch'usqan runakunamantapas astawanraq huchallikurqanku.

¹⁰Chaymi Señor Diosqa profeta kamachinkunawan willachispa nirqan:

¹¹Judá rey Manasesmi sinchi millayta huchallikurqan, paymanta ñawpaq Amor runakunaq huchankunamantapas aswantaraqmi huchallikurqan, Judá suyutapas idolonkunawan huchallichirqan.

¹²Chayraykun ñoqa Israelpa Diosnin Señorqa nini: Judá suyumanpas Jerusalenmanpas ancha hatun llakitan chayachisaq, chaymi chayta uyariqkunaqa musphaspa utirayanqaku.

¹³Samariata tupusqay cordelwanmi Jerusalenta tupusaq, Ahabpa ayllunta qhawasqay plomadawanmi Jerusalenta qhawasaq. Imaynan huk p'ukuta qhellinta k'isuspa p'uktisqata churanku chay hinatan Jerusalenta ruwasaq.

¹⁴Llaqtaymanta puchuq runakunatapas wikch'upusaqmi, hinaspan awqankunaman hap'iykachisaq llat'ananankupaq qechunankupaq,

¹⁵manapuni ñoqaq munayniyman hina ruwasqankurayku, ñawpa taytankuq Egiptomanta lloqsimusqankumantapacha kunankama sinchita phiñachiwasqankurayku, nispa.

¹⁶Manasesmi Judá runakunata huchallichirqan Señor Diospa mana munayninta ruwachispa. Manan chayllatachu ruwarqan, aswanpas askhatan mana huchayoq runakunata Jerusalenpi wañuchispa hinantinpi yawarta hich'arqan.

¹⁷Manasesmanta wakin willakuykunapas tukuy ruwasqankunapas huchallikusqankunapas Judá Reykunaq Willakuynin Qelqapi qelqasqan kashan.

¹⁸Wañupuqtinqa p'ampapurqanku wasin huertapi, chaymi karqan Uza sutiyoq runaq huertan. Chay qhepatataq churin Amón rantinpi kamachikurqan.

¹⁹Amonqa iskay chunka iskayniyoq watayoqmi karqan kamachikuyta qallarishaspa, kamachikurqantaq Jerusalenmanta iskay watata. Mamanqa Jotbamanta Haruzpa ususin Mesulemetmi karqan.

²⁰Amonqa manapunin Señor Diospa munayninman hinachu ruwarqan, aswanpas taytan Manasés hinan ruwarqan.

²¹Payqa taytanpa kikin mana chanin ruwasqankunatan ruwarqan, chayraykun taytanpa yupaychasqan kikin idolokunaman k'umuykuspa yupaycharqan.

²²Ahinapin ñawpa taytankunaq Diosnin Señorta saqepurqan, manataq munayninman hinachu ruwarqan.

²³Amonpa kikin oficialninkunan pay contra rimanakurqanku, hinaspan payta wasinpi wañurqochirqanku.

²⁴Judá suyu runakunataq ichaqa rey Amón contra llapan rimanakuqkunata wañuchirqanku, hinaspa Amonpa churin Josiasta taytanpa rantinpi reyta churarqanku.

²⁵Amonmanta wakin willakuykunapas tukuy ruwasqankunapas Judá Reykunaq Willakuynin Qelqapi qelqasqan kashan.

²⁶P'ampapurqankutaq Uza sutiyoq runaq huertanpi, aya p'ampanapi. Chay qhepatataq churin Josías rantinpi kamachikurqan.