Read DIOSPA QHELQACHISQ Quechua 2 REYES 3 Bible Online

2 REYES 3 - DIOSPA QHELQACHISQ Quechua bible

2 REYES 3

¹Rey Josafat Judapi chunka pusaqniyoqkaq watapi kamachikushaqtinmi, Ahabpa churin Joramqa Samariamanta Israel suyupi kamachikuyta qallarirqan, chunka iskayniyoq watataq kamachikurqan.

²Payqa manapunin Señor Diospa munayninman hinachu ruwarqan, ichaqa manan tayta-mamankuna hinapunichu, aswanpas wikch'urqanmi taytanpa ruwachisqan Baal dios yupaychana saywa rumita.

³Chaywanpas Israelta huchallichiq Nabatpa churin Jeroboampa ruwasqantan ruwarqan, manataq chaymanta t'aqakurqanchu.

⁴Moab rey Mesaqa oveja haciendayoqmi karqan. Paymi Israel reyman sapa wata pagaq pachak waranqa borregokunata, pachak waranqa anejoq millmantawan.

⁵Ahab wañupuqtintaq ichaqa Moab reyqa Israel rey contra hatarirqan.

⁶Hinan rey Joramqa Samariamanta lloqsispa Israelpi kaq llapan soldadonkunata wakichirqan.

⁷Hinallataq Judá rey Josafatman kacharqan: — Moab reymi ñoqa contra hatarin. ¿Payman phawaykuqtiy yanapawankimanchu? nispa. Josafat-taq kutichirqan: — Arí, riysisqaykin. Ñoqapas ejercitoypas caballería soldadoykunapas huk-nisqan kashayku qanwanpas runaykikunawanpas.

⁸¿Mayqen ñannintataq phawaykuq risun? nispa. Joramtaq kutichirqan: — Edompa ch'inneq ñannintan risun, nispa.

⁹Hinan Israel reypas Judá reypas Edom reypas rirqanku. Qanchis p'unchay ch'inneqninta muyuykuspa purishaqtinkutaq unu pisirqan soldadokunapaqpas carga uywakunapaqpas.

¹⁰Chaymi Israel reyqa nirqan: — ¡Ay! ¡Señor Diosqa kinsantinchistan pusamuwasqanchis Moab runakunaman hap'ichiwananchispaq! nispa.

¹¹Josafat-taq ichaqa nirqan: — ¿Manachu kaypi Señor Diospa profetan kan paywan Señor Diosta tapuchinanchispaq? nispa. Chaymi Israel reypa huk oficialnin nirqan: — Kashanmi Safatpa churin Eliseo, paymi Eliaspa kamachin karqan, nispa.

¹²Josafat-taq nirqan: — Payqa Señor Diospa simintapunin willan, nispa. Hinan kinsantin reykunaqa Eliseoqta rirqanku.

¹³Eliseotaq Israel reyta nirqan: — ¿Imataq qanri ñoqawan ruwanayki? Phaway, taytaykiq mamaykiq profetankunata tapukamuy, nispa. Israel reytaq kutichirqan: — ¡Manan! Señor Diosmi kinsantiykuta huñuykuwanku, Moab runakunaman hap'ichiwanankupaq, nispa.

¹⁴Hinan Eliseoqa nirqan: — Tukuy-atiyniyoq Señor Diospa kamachinmi kani, paypa sutinpin jurani, manachus Judá rey Josafat kaypi kashanman chayqa, manan qantaqa uyariykimanchu karqan, nitaq qhawarillaykimanpaschu.

¹⁵Chay hinaqa, pusamuwaychis arpa tocaqta, nispa. Arpa tocaq tocashanankamataq Señor Diospa atiynin Eliseota hunt'aykurqan,

¹⁶hinan payqa nirqan, Señor Diosmi nin: Askha yarqhakunata kay wayq'opi hasp'iychis.

¹⁷Manan kanqachu wayrapas parapas, kay wayq'opin ichaqa askha unu phawanqa, hinan qankuna, soldadoykichiskuna, carga uywaykichiskuna, wak uywaykichiskunapas ukyankichis, nispa.

¹⁸Chaywanpas chaykunaqa pisiraqmi Señor Diospaqqa, payqa Moab runakunatan qankunaman hap'ichisunkichis.

¹⁹Alto perqayoq llapan llaqtankunatan sumaq llaqtankunatan thuninkichis, llapan allin ruruq sach'ankunatapas wit'unkichis, llapan unu pukyunkunatapas ch'akichinkichis, llapan allin ruruq chakrankunatapas rumiwanmi hunt'achinkichis, nispa.

²⁰Qhepantin paqartaq sacrificio haywana horasta Edom ladomanta unu phawamurqan, hinantinmantaq hunt'aykurqan.

²¹Moab runakunataq paykunawan maqanakuq reykuna hamushasqanta yachaspa, huñurqanku maqanakuy armakuna hap'iy atiq llapan qharikunata waynamanta machukama, paykunatan churarqanku qorpanku waqaychaqta.

²²Qhepantin paqartaq Moab runakuna hatarishaqtinku unuta inti k'anchaykurqan, hinan paykunaqa karumanta puka unuta yawarta hina rikurqanku.

²³Chaymi ninakurqanku: — ¡Qhawariy haqayqa yawarmi! Reykunachá paykunapura maqanakuspanku wañurqachinakunku. ¡Chay hinaqa, Moab runakuna, haku llat'anamusun! nispa.

²⁴Paykuna Israel runakunaq karpankuman chayaqtinkutaq, Israel runakunaqa paykunaman phawaykurqanku hinaspa qatirirqanku, chaymi aypaspanku wañuchirqanku.

²⁵Hinallataq llaqtankunatapas thunirqanku, llapan allin ruruq chakrakunamanpas rumitan sapanka qhari wikch'uykurqan hunt'anankama, unu pukyukunatapas llapantan ch'akichirqanku, allin ruruyoq sach'akunatapas llapantan wit'urqanku. Kir-hareset llaqtallan mana thunisqa qheparqan, ichaqa warak'aqkunan muyuykuspa atiparqanku.

²⁶Hinan Moab reyqa atipasqa kasqanta rikukuspa, espadawan maqanakuq qanchis pachak qharikunata akllarqan, Siria reyman ayqenanpaq, ichaqa manan atirqankuchu.

²⁷Chaymi phiwi churinta hap'ispa perqa patapi ruphachina sacrificiota haywarqan, chay churinmi rantinpi kamachikunanpaq kasharqan. Israel runakuna contrataq sinchita phiñakurqanku, chaymi Israel runakunaqa chaymanta ripuspanku llaqtankuman kutipurqanku.