Read DIOSPA QHELQACHISQ Quechua 2 REYES 4 Bible Online

2 REYES 4 - DIOSPA QHELQACHISQ Quechua bible

2 REYES 4

¹Profeta t'aqamanta huk profetaq warminmi Eliseoman rispa valekurqan: — Qosaymi wañukapun, yachankitaqmi payqa Señor Diosta manchakuq kasqanta. Kunanmi manuqnin runa hamuspa iskaynin churiykunata kamachinpaq apayta munashan, nispa.

²Hinan Eliseoqa tapuykurqan: — ¿Imatataq qanpaq ruwayman? ¿Imallapas wasiykipi kashanchu? nispa. Viudataq kutichirqan: — Huk p'uyñuchapi aceitellan wasiypi kashan, manan imaypas astawanqa kanchu, nispa.

³Eliseotaq nirqan: — Chay hinaqa, phaway wasi-masiykikunamanta ch'usaq p'uyñukunata mañakamuy. Hayk'an atisqaykita huñuspataq

⁴churiykikunapiwan wasiykiman haykuy, punkuta wisq'akuspataq llapan chay p'uyñukunaman aceiteta hunt'achinki, hunt'a kaqkunatataq sapaqman churanki, nispa.

⁵Hinan viudaqa Eliseoq qayllanmanta ripuspa churinkunapiwan wasiman wisq'akurqanku. Hinaspa churinkunaq p'uyñukunata haywasqanman hina aceiteta hich'aykurqan.

⁶Llapan p'uyñukuna hunt'a kaqtintaq, viudaqa churinta nirqan: — Huk p'uyñutawan haywarimuwaychis, nispa. Churintaq ichaqa kutichirqan: — Manan kanñachu, nispa. Chay ratotaq aceiteqa tukukapurqan.

⁷Chay qhepatataq warmiqa profetaman rispa chayta willarqan. Hinan profetaqa nirqan: — Phaway chay aceiteta vendemuy, hinaspa manukusqaykita pagampuy, puchuq qolqetaq qanpaqpas churiykikunapaqpas necesitasqaykichispaq kanqa, nispa.

⁸Huk p'unchaymi Eliseoqa Sunem llaqtata rirqan, hinan huk qhapaq warmi Eliseota anchata rimapayaspa wasinpi mikhunanpaq waqyarqan. Chaymi Eliseoqa sapa kuti chayninta purispa chaypi mikhuq qhepakurqan.

⁹Chay warmitaq qosanta nirqan: — Yachanin kayninta purillanpuni chay qhariqa Diospa ch'uya profetan kasqanta.

¹⁰Wasi patapi huk wasita paypaq ruwapusun. Chaymantaq churasun huk puñunata, huk tiyanata, huk mesata, huk k'anchanatawan, watukuq hamuwaqtinchis chaypi qorpachananchispaq, nispa.

¹¹Huk kutinmi Eliseoqa chayman chayaspa wasinman seqarqan samaykunanpaq.

¹²Hinaspa kamachin Giezita nirqan: — Wasiyoq warmita waqyamuy, nispa. Kamachin waqyamuqtintaq warmiqa payman qayllaykurqan.

¹³Hinan Eliseoqa kamachinta nirqan: — Kay warmita niy, anchatan ñoqaykuta khuyapayawankiku. ¿Imallatapas qanpaq ruwaykumanchu? ¿Munawaqchu reytapas ejército umallitapas qanpa allinniykipaq rimapayanaykuta? nispa. Warmitaq kutichirqan: — Allinmi kaypi llaqtamasiykunawan kashani, nispa.

¹⁴Eliseotaq nirqan: — Chay hinari, ¿imatataq paypaq ruwasunman? nispa. Kamachintaq kutichirqan: — Imaynachá kanmanpas, manan wawan kanchu, qosanpas yuyaqñataqmi, nispa.

¹⁵Chaymi Eliseoqa: — Waqyamuy, nirqan. Kamachintaq waqyamurqan, warmitaq punkullapi sayaykurqan.

¹⁶Hinan Eliseoqa warmita nirqan: — Q'aya wata kunan hinan huk qhari wawa oqllaykusqa kashanki, nispa. Warmitaq kutichirqan: — Diospa profetan, wiraqocháy, amapuni q'otuwaychu kay kamachiykita, nispa.

¹⁷Warmin ichaqa wiksallikurqan, watamanta hinataq qhari wawata wachakurqan, Eliseoq nisqanman hina.

¹⁸Wawaqa wiñasharqanmi, huk p'unchaytaq taytan qhawaq rirqan ichhuqninkunawan kashaqtin.

¹⁹Hinan taytanta qaparikuspa waqyakurqan: — ¡Ay, umalláy-uma! ¡Umaymi nanashawan! nispa. Hinaqtinmi taytanqa huk kamachinta nirqan: — Phaway mamanman aparqoy, nispa.

²⁰Kamachitaq erqeta mamanman aparqan, hinan mamanqa arphin patapi tiyachirqan chawpi p'unchaykama, chay qhepatataq erqeqa wañupurqan.

²¹Mamantaq payta profetaq puñunan wasiman aparqan, puñuna pataman churaykuspataq wasimanta lloqsispa punkuta wisq'aykurqan.

²²Chaymantataq qosanta waqyaspa nirqan: — Huk kamachita asnontinta kachamuway Diospa profetanman usqhaylla rinaypaq, chaymantaña kutimusaq, nispa.

²³Qosantaq tapuykurqan: — ¿Imanaqtintaq kunanri payman rinki? Manamá Mosoq Killa Fiestapaschu, samana p'unchaypaschu, nispa. Warmitaq ichaqa kutichirqan: — Manan imananpaschu, nispa.

²⁴Chaymantataq warmiqa asnota caronakurqan, hinaspa kamachinta nirqan: — Sillaykusqa asnoyta usqhaylla phawachinki. Amataq maypipas samachiwankichu, mana ñoqa niqtiyqa, nispa.

²⁵Chay hinatan warmiqa rirqan, hinaspa profetaq kashasqan Carmelo orqoman chayarqan. Eliseotaq karutaraq rishaqtin rikurqorqan, hinaspa kamachin Giezita nirqan: — ¡Qhawariy! ¡Sunem llaqtayoq warmin hamushan!

²⁶Phawariy chaskiq, hinaspa tapuykunki: ¿Allillanchu kashanki? ¿Qosaykipas allillanchu kashan? ¿Churichaykipas allillanchu kashan? nispa. Hinan kamachiqa chaskiq rirqan, warmitaq: — Allillanmi kashayku, nirqan.

²⁷Chaymantataq Eliseoq kashasqan orqoman chayaspa, chakinta oqllaykurqan. Giezitaq t'aqananpaq qayllaykurqan, Eliseotaq ichaqa nirqan: — Hinalla kachun, sonqo nanay llakisqan kashan, manataqmi Señor Diospas sut'inchawanraqchu imamantachus llakisqa kashasqanta, nispa.

²⁸Hinan warmiqa nirqan: — Wiraqocháy, ¿ñoqari wawatachu mañakurqayki? Ñoqaqa nirqaykin: Ama q'otuwaychu, nispa.

²⁹Eliseotaq Giezita nirqan: — P'achaykita allinta chumpiykukuy, hinaspa tawnayta aparikuspa phaway haqayta. Piwanpas tupaspaykiqa aman napaykunkichu, piña napaykusunki chaypas amataq uyarinkichu. Chayaspaykitaq tawnayta erqeq uyan pataman churaykunki, nispa.

³⁰Erqeq mamantaq ichaqa Eliseota nirqan: — Señor Diospa sutinpin qanpa sutiykipiwan jurani, manapunin ñoqallaqa kutiymanchu, nispa. Hinan Eliseoqa paywan rirqan.

³¹Chaykamataq Gieziqa ñawparqospa, erqeq uyan pataman tawnanta churaykurqan, ichaqa manan kawsarirqanchu samarqanpaschu. Chaymi payqa Eliseoman phawarispa nirqan: — Manan erqeqa kawsarinchu, nispa.

³²Wasiman Eliseo chayaqtintaq, erqeqa puñuna patapi wañusqaña chutarayapusharqan.

³³Hinan haykuykuspa punkuta wisq'aykurqan, hinaspa Señor Diosmanta mañakurqan. Eliseollan chaypiqa karqan wañusqapiwan.

³⁴Chaymantataq puñuna patapi erqe pataman thallaykurqan, hinan tuparqan siminpas siminwan, ñawinpas ñawinwan, makinpas makinwan. Erqeq cuerpontaq q'oñirirqan.

³⁵Eliseotaq sayarispa wasi ukhupi puriykacharqan, chaymantataq wakmanta puñuna patapi erqe pataman thallaykurqan. Chayllamanmi erqeqa qanchis kutita achhirqan, hinan ñawin qhawarirqan.

³⁶Chaymi Eliseoqa Giezita waqyaspa nirqan: — Wasiyoq warmita waqyarqamuy, nispa. Giezitaq waqyamurqan, chaymi warmiqa Eliseoman qayllaykurqan. Eliseotaq nirqan: — Kayqa churiyki, nispa.

³⁷Warmitaq qayllaykuspa Eliseoq ñawpaqenpi pampakama k'umuykukurqan, chaymantataq churinta marq'aykukuspa wasimanta lloqsipurqan.

³⁸Chay suyupi yarqay kashaqtinmi Eliseoqa Gilgalman kutimurqan. Huk p'unchaymi profetakuna Eliseoq muyuriqninpi tiyashaqtinku, Eliseoqa kamachinta nirqan: — Hatun mankapi profetakunapaq mikhunata wayk'uy, nispa.

³⁹Hukninkun rirqan campota ima qorallatapas pallakuq, hinan k'ita calabazaq rurunta tarirqan, chayta pallaspataqmi unkhuyninman hunt'achirqan. Kutimuspataq q'allarqan, hinaspa mikhuy mankaman churarqan, manataq yacharqanchu imachus kasqanta.

⁴⁰Chaymantataq mikhunata qararqanku mikhunankupaq, mikhuyta qallarishaspankutaq profetakunaqa qaparirqanku: — ¡Dios sonqo runa, venenoyoqmi kay mikhunaqa! nispa. Manataq mikhurqankuchu.

⁴¹Eliseotaq ichaqa kamachirqan: — Huk chhikan hak'uta aparimuwaychis, nispa. Hinaspa mankaman chay hak'uta hich'aykuspa kamachirqan: — ¡Kunanqa runakunaman mikhunata qaray! nispa. Paykunataq mikhurqanku, manañataq venenon kapurqanchu.

⁴²Chay qhepatataq Baal-salisa llaqtayoq qhari Eliseoman aparqan ñawpaqkaq cebada cosechamanta iskay chunka t'antata chayllaraq ichhusqa choqllontin trigotawan. Hinan Eliseoqa kamachinta nirqan: — Kaykunata qoy runakunaman mikhunankupaq, nispa.

⁴³Kamachintaq ichaqa kutichirqan: — ¿Imaynataq kayllatari pachak runakunaman qosaq? nispa. Hinan Eliseoqa nirqan: — Qoy runakunaman mikhunankupaq, Señor Diosmi nin: Chaymantan mikhunqaku, puchunqaraqtaqmi kanpas, nispa.

⁴⁴Chay hinatan kamachiqa ruwarqan, paykunataq mikhurqanku puchurqanraqtaq, Señor Diospa nisqanman hina.