Read DIOSPA QHELQACHISQ Quechua 2 REYES 7 Bible Online

2 REYES 7 - DIOSPA QHELQACHISQ Quechua bible

2 REYES 7

¹Eliseotaq kutichirqan: — Uyariy Señor Diospa siminta, paymi nin: Paqarin kay horastan Samaria llaqta punkupi rantikunkichis media arroba trigo hak'uta huk qolqellawan, hinallataq huk arroba cebadatapas huk qolqellawan, nispa.

²Hinan reypa yanapaqnin oficialqa profetata nirqan: — Hanaq pachamantaña chaykunata Señor Dios hich'aykamuqtinpas, manan nisqayki hinaqa kanmanchu, nispa. Eliseotaq ichaqa kutichirqan: — Qan kikiykin chayta rikunki, ichaqa manan chayta mikhunkichu, nispa.

³Chaykamataq llaqta punkupi kashaq lepra onqoyniyoq tawa runakunaqa ninakurqanku: — ¿Hinallachu kaypi tiyasun wañunanchiskama?

⁴Llaqtaman haykusunchis chayqa, wañupusunmi, chaypi sinchi yarqay kasqanrayku. Kaypi qhepakusun chaypas, wañupullasuntaqmi. Haku Siria soldadokunaq karpankuta. Mana wañuchiwasunchu chayqa, kawsasunchis. Wañuchiwasun chayqa, wañupusun, nispa.

⁵Hinaspa paykunaqa rasphiyaykuyta puririspa, Siria soldadokunaq karpa-karpanman rirqanku. Chayaqtinkutaq karpakunaqa mana runayoq kapushasqa.

⁶Señor Diosmi Siria soldadokunaman uyarichisqa carretakunaq phawashasqanta hina, caballokunaq k'unrururusqanta hina, askha soldadokunaq hamushasqantawan hina. Chaymi Siria soldadokunaqa ninakurqanku: — ¡Israel reychá mink'akamun Het runakunaq reyninta, Egipto reykunatawan ñoqanchisman phawaykamunanpaq! nispa.

⁷Paykunataq mana wañuyta munaspa rasphiyaykuyta ayqesqaku caballonkutapas asnonkutapas karpankutapas kaqllata wikch'uspanku.

⁸Lepra onqoyniyoq runakunataq karpa-karpa haykunaman chayaspanku, huk karpaman haykurqanku. Hinaspa mikhurqanku ukyarqanku ima, qolqeta qorita, p'achakunata horqorqospataq pakamurqanku. Chay qhepatataq wakmanta kutiykuspanku huk karpamanñataq haykurqanku, hinaspa chaymantapas imachus kaqkunata horqospa pakallarqankutaq.

⁹Chaymantataq ichaqa ninakurqanku: — Manan allintachu ruwashanchis. Kunanpachan kay allin kaqtaqa willamunanchis, manan ch'inlla kashananchischu. Paqarinkama mana willasunchu chayqa, muchuchisqan kasun. Chay hinaqa, kunanpacha haku reypa wasinta, hinaspa willamusun, nispa.

¹⁰Rispankutaq llaqta punku qhawaqkunata waqyakuspa nirqanku: — Siria soldadokunaq karpa-karpantan rirqayku, manan pipas kasqachu, manan rimayllatapas uyariykuchu, caballokuna asnokunallan watasqa kashasqa, tiyananku karpakunapas mana tupaykusqa iman kaqllan kashasqa, nispa.

¹¹Hinan llaqta punku qhawaqkunaqa chay willakuyta waqyakurqanku, reypa wasinpi kaqkunamantaq willarqanku.

¹²Reytaq tutapacha hatarispa oficialninkunata nirqan: — Imatachus Siria runakunaq ruwawananchistan sut'inchasqaykichis. Paykunaqa yachankun yarqaymanta muchushasqanchista, karpankumanta lloqsispan campopi pakakushanku. Paykunaqa yuyaykushankun: Israel runakunaqa lloqsimunqakupunin, hinaspa presota hap'isunchis, llaqtamantaq haykusunchis, nispa.

¹³Hukkaq oficialnintaq nirqan: — Kay llaqtapi kashaqkunaqa wañupusunmi imaynan wakinkuna wañupunkuña hinata. Chay hinaqa, puchuwaqninchis phisqa caballokunapi runakunata qhawamunankupaq kachasun, nispa.

¹⁴Hinan wakichirqanku iskay carretakunata caballokunantinta, reytaq kacharqan Siria soldadokunaq qhepanta rinankupaq: — Phawaychis, allin-allinta qhawamuychis imaynachus kasqanta, nispa.

¹⁵Paykunataq Siria soldadokunaq yupinta qatispa Jordán mayukama rirqanku. Hinaspa tukuy ñannintinpi Siria soldadokunaq usqhaylla ayqespa wikch'usqanku p'achankunata armankunatawan tarirqanku. Chaymantataq kachasqakunaqa kutimurqanku, tukuy rikusqankutataq reyman willarqanku.

¹⁶Chaymi runakuna llaqtamanta lloqsispanku Siria soldadokunaq karpankunata llat'anarqanku. Hinan Señor Diospa willachisqanman hina media arroba trigo hak'utapas huk qolqepaq qhaturqanku, huk arroba cebadatapas huk qolqellapaqtaq qhaturqanku.

¹⁷Reyqa yanapaqnin oficialnintan kamachirqan llaqta punkuta qhawananpaq, ichaqa runakunan punkupi sarurqapurqanku, chaymi payqa wañupurqan profeta Eliseoq nisqanman hina. Eliseoman rey risqa chaypachan

¹⁸Eliseoqa payta nisqa: Paqarin kay horastan Samaria llaqta punkupi rantikunqaku, media arroba trigo hak'uta huk qolqewan, huk arroba cebadatapas huk qolqewan, nispa.

¹⁹Chaymi reypa yanapaqnin oficialqa payman kutichisqa: Hanaq pachamantaña chaykunata Señor Dios hich'aykamuqtinpas, manan nisqayki hinaqa kanmanchu, nispa. Eliseotaq kutichisqa: Qan kikiykin chayta rikunki, ichaqa manan chayta mikhunkichu, nispa.

²⁰Chay hinaqa, profetaq nisqan hinapunin karqan, runakunan llaqta punkupi sarurqapurqanku, hinan chay oficialqa wañupurqan.