Read DIOSPA QHELQACHISQ Quechua 2 REYES 9 Bible Online

2 REYES 9 - DIOSPA QHELQACHISQ Quechua bible

2 REYES 9

¹Profeta Eliseon profetakuna t'aqamanta hukninta waqyarispa nirqan: — Wakichikuy purinaykipaq. Kay p'uyñuchapi aceiteta aparikuy, hinaspa Galaadpi Ramot llaqtata riy.

²Chayman chayaspataq Nimsiq nieton Josafatpa churin Jehuta maskhanki. Maypichus kashanqa pay chayman haykunki, hinataq paywan kashaqkuna qayllamanta sapaq wasiman pusaspayki,

³p'uyñuchapi apasqayki aceitewan umanta hawinki hinaspa ninki, Señor Diosmi nin: Ñoqan hawiyki Israel rey kanaykipaq, nispa. Chaymantataq punkuta kicharqospayki, usqhaylla pasapunki ama sayaykuspa, nispa.

⁴Hinan wayna profetaqa Galaadpi Ramot llaqtata rirqan,

⁵chayman chayaspataq ejército umallikunata huñuykusqata tarirqan. Hinaspa nirqan: — Wiraqocháy, hukta willaykusqayki, nispa. Jehutaq kutichirqan: — ¿Mayqenniykupaqmi? nispa. Profetataq nirqan: — Qanpaqmi, wiraqocháy, nispa.

⁶Chaymi Jehuqa sayarispa wasiman haykurqan. Hinan profetaqa aceitewan umanta hawispa nirqan: — Israelpa Diosnin Señormi nin: Ñoqan hawiyki Israel llaqtaypi rey kanaykipaq.

⁷Qanmi ch'usaqyachinki wiraqochayki Ahabpa mirayninkunata, ahinapin Jezabelman aynita kutichinki profetaykunatapas wakin kamachiykunatapas wañuchisqanmanta.

⁸Ahabpa llapa aylluntan ch'usaqyachisaq, hinallataq Israelpi paypa ayllun llapan qharikunatapas tukuchisaq manataq hukllapas qhepanqachu.

⁹Imaynatachus ruwarqani Nabatpa churin Jeroboampa miraynintapas, Ahiaspa churin Baasaq miraynintapas, ahinallatataqmi Ahabpa aylluntapas ruwasaq.

¹⁰Jezreel chakrapitaq alqokuna Jezabelta mikhunqa, manataq pipas p'ampaykunqachu, nispa. Chaykunata nispanmi profetaqa punkuta kicharqokuspa usqhaylla pasakapurqan.

¹¹Jehutaq reypa oficialnin-masinkunawan huñukusqanman kutipurqan, hinan paykunaqa Jehuta tapurqanku: — ¿Iman kasqa? ¿Imapaqtaq chay waq'ari waqyasqasunki? nispa. Jehutaq kutichirqan: — Qankunaqa reqsinkichismi chay runata, imatachus rimasqantapas yachankichismi, nispa.

¹²Paykunataq ichaqa kutichirqanku: — ¡Manan imatapas yachaykuchu! ¡Willawayku! nispa. Hinan Jehuqa nirqan: — Ahinatan niwan, Señor Diosmi nin: Ñoqan hawiyki Israelpi rey kanaykipaq, nispa.

¹³Paykunataq kaq rato capankuta gradas pataman ch'utikuspanku chaki sarunanman mast'arqanku, chaymantataq putututa tocaspa qaparirqanku: ¡Jehuqa reymi! nispa.

¹⁴Josafatpa churin Nimsiq nieton Jehuqa Joram contran sayarirqan, Joramqa Galaadpi Ramot llaqtata Siria rey Hazaelpa phawaykunanmantan hark'asharqanku llapan Israel soldadokunapiwan.

¹⁵Joramtaqa maqanakuypin Siria soldadokuna k'irisqaku, hinan payqa k'irin hampikuq Jezreelman kutipusqa. Chaymi Jehuqa oficialmasinkunata nirqan: — Cheqaqtapuni munankichis ñoqa rey kanayta chayqa, ama kay llaqtamanta pitapas kachariychischu, mana chayqa Jezreelta rispan willarqamunqa, nispa.

¹⁶Hinaspataq payqa maqanakuypaq carretanman seqaspa Jezreelta rirqan, chaypin Joramqa onqosqa kasharqan. Hinallataq Judá rey Ocoziaspas chaypi kasharqan, Joram watukuq risqanrayku.

¹⁷Jezreel llaqta torremanta qhawaqtaq rikurqan Jehuta soldadokunantin qayllaykushaqta, chaymi qaparirqan: — ¡Soldadokunan hamushan! nispa. Hinan Joramqa kamachirqan: — Huk caballo sillata kachaychis, maqanakuqchu icha sumaqpichu hamushasqanta tapuqta.

¹⁸Caballo sillaqa Jehuman tupaq rispataq nirqan: — Reymi kachamuwan maqanakuqchu icha sumaqpichu hamushasqaykita tapuqta, nispa. Jehutaq kutichirqan: — Manan chayqa qanman tupasunkichu. ¡Qhepayta hamuy! nispa. Hinan llaqta qhawaqqa willakurqan: — Tapuq kachasqa runaqa taripanmi chay hamuqkunaman, ichaqa manan kutimunchu, nispa.

¹⁹Chaymi reyqa kaq rato huk caballo sillata kachallarqantaq. Hinan paypas taripaspa nillarqantaq: — Reymi kachamuwan maqanakuqchu icha sumaqpichu hamushasqaykita tapuqta, nispa. Jehutaq kutichirqan: — Manan chayqa qanman tupasunkichu. ¡Qhepayta hamuy! nispa.

²⁰Hinan llaqta qhawaqqa willallarqantaq: — Chay tapuq kachasqapas taripanmi chay hamuqkunaman, ichaqa manan kutimunchu. Carreta purichimuqqa Nimsiq nieton Jehú kasqallanmi hamushan, payqa waq'a hinan phawaylla purichin, nispa.

²¹Chaymi Joramqa kamachirqan: — ¡Maqanakuypaq carretayta wakichiychis! nispa. Hinan carretanta wakichirqanku, Israel rey Joramtaq Judá rey Ocoziaspiwan sapanka carretankupikama llaqtamanta lloqsirqanku Jehuwan tupanankupaq. Jezreelmanta Nabotpa chakranpi tupaspankutaq,

²²Jehuta rikurqorqan, hinaspa payqa nirqan: — ¡Jehú! ¿Maqanakuqchu icha sumaqpichu hamushanki? nispa. Jehutaq kutichirqan: — ¿Imaynan sumaqpi hamushayman mamayki Jezabel idolokunata yupaychachishaqtin, layqakuykunatapas ruwashallaqtin? nispa.

²³Chaymi Joramqa carretanta kutirichispa ayqekapurqan, Ocoziastataq waqyarqan: — ¡Ocozías, q'otukuymi! nispa.

²⁴Jehutaq ichaqa wach'inanwan Joramta wach'irqan, chaymi wasanta haykuspa sonqonta t'urpurqan, hinan carretanpi qonqorpanmanta urmarqan.

²⁵Jehutaq oficialnin Bidcarta kamachirqan: — Carretamanta ayata horqoy, hinaspa Nabotpa chakranman wikch'umuy. Yuyariy iskayninchis taytan Ahabpa qhepanta maqanakuypaq carretakunata purichishaqtinchis, Señor Diospa Ahab contra kay hina nisqanta:

²⁶“Qayna p'unchaymi Nabot-tapas churinkunatapas wañuchisqaykita rikurqani, chaymi ñoqa Señor Diosqa niyki chay ruwasqaykimantaqa muchuchisqaykipunin”, nispa huchachasqanta. Chayrayku payta hap'iy, hinaspa Nabotpa chakranman wikch'umuy, Señor Diospa nisqanman hina, nispa.

²⁷Judá rey Ocoziastaq chaykunata rikuspa Bet-hagán llaqtaman riq ñanninta ayqekapurqan. Jehutaq ichaqa qhepanta phawaspa kamachirqan: — ¡Paytapas wañuchillaychistaq! nispa. Ibleam qaylla Gur qhatata carretanpi wichashaqtintaq, sinchitapuni Ocoziasta k'irirqanku, chaywanpas Meguidokamaraqmi ayqekurqan, chaypitaq ichaqa wañupurqan.

²⁸Chay qhepatataq kamachinkuna Jerusalenman huk carretapi apapurqanku, hinaspa Davidpa Llaqtan nisqapi ayllunpa aya p'ampananpi p'ampapurqanku.

²⁹Ocoziasqa Judapi kamachikuyta qallarisqa, Ahabpa churin Joram chunka hukniyoq wata kamachikushaqtinmi.

³⁰Chaymantataq Jehuqa Jezreelta rirqan. Jezabeltaq chayta yachaspa, ñawinta pintakurqan, chukchantapas sumaqchakurqan, hinaspan wasi ventanamanta qhawarqan.

³¹Llaqta punkuman Jehú chayaqtintaq, Jezabelqa nirqan: — Yaw, wiraqochayki wañuchiq, ¿imaynataq kashanki? Qanpa sutiykiqa Zimrin kanan, nispa.

³²Hinan Jehuqa wasi ventana cheqasta qhawarispa waqyakurqan: — ¿Pitaq ñoqaq t'aqaypi kashan? nispa. Iskay kinsa oficialkunan wasi ventanamanta Jehuta qhawarirqanku,

³³hinan paykunata kamachirqan: — ¡Jezabelta wikch'uykamuychis! nispa. Jezabelta pampaman wikch'uykamuqtintaq, caballokuna saruqtin yawarnin perqaman ch'iwkarqan wakin caballokunaq chakinmanwan.

³⁴Chaymantataq Jehuqa mikhuq ukyaq rirqan. Chay qhepatataq payqa kamachirqan: — Chay ñakasqa warmita qhawamuychis, hinaspa p'ampamuychis, imaynaña karqan chaypas payqa reypa ususinmi, nispa.

³⁵P'ampaq riqkunataq ichaqa tarirqanku uma tullunta, chakinkunata, maki qochallantawan.

³⁶Hinan paykunaqa kutimurqanku Jehuman willaq, chaymi Jehuqa nirqan: — Tisbe llaqtayoq Elías kamachinwanmi Señor Diosqa kaykunamanta willachirqanña. Jezabelpa aychantaqa alqokunan mikhunqa Jezreel chakra-chakrapi.

³⁷Ayanpas wanu hina wisñisqan kanqa Jezreel chakra-chakrapi, manataqmi pipas ayantaqa ninqachu: Kayqa Jezabelmi, nispaqa.