Read DIOSPA QHELQACHISQ Quechua 1 CRÓNICAS 23 Bible Online

1 CRÓNICAS 23 - DIOSPA QHELQACHISQ Quechua bible

1 CRÓNICAS 23

¹Davidqa sinchi yuyaq runaña kaspanmi churin Salomonta Israel suyuq reyninta churarqan.

²Davidqa Israel suyupi llapan umallikunata, sacerdotekunata, Leví runakunatawanmi huñuykurqan,

³hinaspan Leví runakunata kinsa chunka watayoqmanta wichayman yupachirqan. Chaymi yupaqtinku kinsa chunka pusaqniyoq waranqa qharikuna karqanku.

⁴Chaykunamantan iskay chunka tawayoq waranqa qharikunata Señor Diospa wasinta sayarichiypi llank'achiqta churarqanku, soqta waranqatataq oficialkunata juezkunata ima churarqan.

⁵Hinallataq churarqan tawa waranqata punku qhawaqkunata, huk tawa waranqatataq Davidpa qosqan tocanakunawan Señor Diosta yupaychanankupaq.

⁶Davidmi Leví runakunata t'aqarqan mirayninkuman hina kinsa t'aqata: Gersonpa mirayninta, Cohatpa mirayninta, Merariq miraynintawan.

⁷Gersonpa mirayninmantan karqan: Laadanpiwan Simeipiwan.

⁸Laadanpa kinsantin churinkunan karqan: phiwin Jehiel, qatiqnin Zetam, Joelpiwan.

⁹Simeipa kinsantin churinkunan karqan: Selomit, Haziel, Haranpiwan. Paykunan Laadanpa ayllun umallikuna karqan.

¹⁰Simeipa churinkunan karqan: Jahat, Zina, Jeús, Beriapiwan.

¹¹Jahatmi phiwin karqan, chayman qatiqtaq Zina, Jeuswan Beriawanqa manan askha wawayoqchu karqanku, chaymi huk ayllumanña yupachikapurqanku.

¹²Cohatpa churinkunan tawa karqan: Amram, Izhar, Hebrón, Uzielpiwan.

¹³Amrampa churinkunan karqan Aaronpiwan Moisespiwan. Aaronqa churinkunapiwanmi Diospaq t'aqasqa karqanku, aswan ch'uya kaqkunata wiñay waqaychanankupaq, Señor Diosman sacrificiota haywanankupaq, Señor Diospa ñawpaqenpi servinankupaq, Señor Diospa sutinpi runakunata saminchanankupaqwan.

¹⁴Dios sonqo runa Moisespa churinkunan Leví ayllupi yupasqa karqanku.

¹⁵Moisespa churinkunan karqan: Gersonpiwan Eliezerpiwan.

¹⁶Sebuelqa Gersonpa miraynin umallin karqan.

¹⁷Rehabiaspas Eliezerpa mirayninpi umallin karqan. Eliezerpa churinqa ch'ullallan karqan, Rehabiaspa churinmi ichaqa askha karqan.

¹⁸Selomitqa Izharpa miraynin umallin karqan.

¹⁹Hebronpa churinkunan karqan: phiwin Jerías, iskaykaq Amarías, kinsakaq Jahaziel, tawakaqtaq Jecamán.

²⁰Uzielpa churinkunan karqan: phiwin Micaía, sullk'akaqtaq Isías.

²¹Merariq churinkunan karqan: Mahli Musipiwan. Mahliq churinkunan karqan: Eleazar Cispiwan.

²²Eleazarpaqa manan churin karqanchu wañukapunankama, ususinkunallan karqan, paykunawanmi Cispa churin primonkunaqa casarakurqanku.

²³Musiq churinkunan kinsa karqan: Mahli, Edar, Jeremotpiwan.

²⁴Chaykunan Levipa mirayninmanta karqan, sapanka sutinmantakama yupasqa, taytankuq ayllunpi umalli kasqankuman hina. Iskay chunka watayoqmanta wichaymantaq Señor Diospa wasinpi llank'arqanku.

²⁵Davidqa nirqanmi: Israelpa Diosnin Señormi llaqtanman thak-kawsayta qorqan, pay kikintaq wiñaypaq Jerusalenpi tiyanqa.

²⁶Chaymi Leví runakunaqa Señor Dioswan Tupana Karpata, yupaychanapaq tukuy serviciokunatapas manaña huk cheqasmanta huk cheqasman apanqakuñachu, nispa.

²⁷Chay hinaqa, Davidpa p'uchukay unanchasqanman hinan, Leví runakunaqa iskay chunka watayoqmanta wichayman yupasqa karqanku.

²⁸Paykunaqa Aaronpa mirayninkunatan Señor Diospa wasinpi llank'aysinanku karqan. Paykunan waqaychananku karqan patiokunata, cuartokunatawan, hinallataq Señor Diospaq t'aqasqa serviciokunatapas ch'uyanchananku karqan, wak llank'aykunatapas ruwananku karqan.

²⁹Kaqllataq wakichinanku karqan Diospa ñawpaqenpi churana t'antata, ruru ofrendapaq sumaq hak'uta, mana qonchuyoq llaphllallaña t'antata, hak'uta chapuspa wak t'antatapas, tukuy t'aqa tupuykunatapas yupaykunatapas qhawananku karqan.

³⁰Sapa p'unchaytaq ch'isin-paqar yupaychana wasipi sayaykuspanku Señor Diosta yupaychananku, graciasta qonanku karqan.

³¹Chay hinallatataq ruwananku karqan ruphachina sacrificiota sapa kuti Señor Diosman haywaspanku samana p'unchaypi, Mosoq Killa Fiestapi, hatun fiestakunapi ima, kamachikuyman hina hayk'achus llank'ananku karqan chayman hina. Chaytan Señor Diospa ñawpaqenpi tukuy tiempo ruwarqanku.

³²Chay hinaqa, waqaychanankun karqan Señor Dioswan Tupana Karpata, Ch'uya Cheqastawan, Señor Diospa wasinpipas ayllunku Aaronpa mirayninkunatan llank'aysinanku karqan.