Read DIOSPA QHELQACHISQ Quechua 1 CRÓNICAS 26 Bible Online

1 CRÓNICAS 26 - DIOSPA QHELQACHISQ Quechua bible

1 CRÓNICAS 26

¹Punku qhawaqkunapas rakisqallataqmi karqanku: Corepa mirayninmanta: Ebiasafpa churin Meselemías.

²Meselemiaspa churinkunan karqan: phiwin Zacarías, iskaykaqtaq Jediael, kinsakaqtaq Sebadías, tawakaqtaq Jatniel,

³phisqakaqtaq Elam, soqtakaqtaq Johanán, qanchiskaqtaq Elihoenai.

⁴Obed-edompa churinkunan karqan: phiwin Semaías, iskaykaqtaq Jozabad, kinsakaqtaq Joa, tawakaqtaq Sacar, phisqakaqtaq Natanael,

⁵soqtakaqtaq Amiel, qanchiskaqtaq Isacar, pusaqkaqtaq Peultai. Obed-edomtaqa Diosmi anchata samincharqan.

⁶Obed-edompa phiwi churin Semaiaspa churinkunan nacellarqantaq. Paykunan allin qhari karqanku, chaymi ayllunkupi umalli karqanku.

⁷Semaiaspa churinkunan karqan: Otni, Rafael, Obed, Elzabadpiwan. Hinallataq wawqenku Eliupas Samaquiaspas allin qhari karqanku.

⁸Llapan chaykunan Obed-edompa miraynin karqan, paykunapas churinkupas wawqenkupas allin kallpasapa imaymana atiq, Señor Diospa wasinpi llank'ay yachaq karqanku, llapanku soqta chunka iskayniyoq.

⁹Meselemiaspa churinkunan wawqenkunapiwan chunka pusaqniyoq allin imaymana atiq qharikuna karqanku.

¹⁰Merariq mirayninmanta Hosaq churinkunan karqan umalli Simri (payqa manan phiwi churichu karqan, chaywanpas taytan Hosanmi umallita churarqan),

¹¹iskaykaqtaq Hilcías, kinsakaqtaq Tebalías, tawakaqtaq Zacarías. Hosaq llapan churinkunan wawqenkunapiwan chunka iskayniyoq karqanku.

¹²Chay punku qhawaqkunan umallinkuman hina rakisqa karqanku, paykunapas wawqenku hinallataqmi Señor Diospa wasinpi llank'ananku karqan.

¹³Sapanka punku qhawaqpaqtaq sorteopi akllarqanku ayllunkuman hina, kuraktapas sullk'atapas llapanta.

¹⁴Hinan Selemiasman tuparqan inti lloqsimuy lado punku. Churin Zacariasmantaq tuparqan wichay lado punku, payqa allin yachaysapa yuyaychaqmi karqan.

¹⁵Obed-edommantaq tuparqan uray lado punku, paypa churinkunamantaq tuparqan imaymana waqaychana wasikuna.

¹⁶Shupimpaq Hosapaqwantaq tuparqan inti haykuy lado punku, patakaq ñanpi Salequet punkupiwan. Punku qhawaqkunaqa qati-qatin llank'arqanku tupaqninkuman hina.

¹⁷Sapa p'unchaypaq inti lloqsimuy ladopi Leví runakuna soqta karqan, wichay lado punkupipas tawa runakuna, uray lado punkupipas tawa runakuna, imaymana waqaychana wasikunapipas tawa runakuna iskaykama tupachinakunankupaq.

¹⁸Inti haykuy lado patio qaylla ñanpi tawa runakuna karqan, kikin patiopitaq iskay runakuna.

¹⁹Chay hinatan punku qhawaqkunata rakirqanku, paykunan karqan Corepa mirayninmanta, Merariq mirayninmantawan.

²⁰Leví runakunamanta Ahiastaq Diospa wasinpi qhapaq kaykunata waqaycharqan, Diospaq t'aqasqa qokuykunata churana wasikunatapas.

²¹Gersonpa mirayninmanta Laadanpa churinkunaq ayllun umallikunan karqan: Jehiel,

²²Zetam, wawqenku Joelpiwan. Paykunan Señor Diospa wasinpi qhapaq kaykunata waqaycharqanku.

²³Amrampa mirayninmanta, Izharpa mirayninmanta, Hebronpa mirayninmanta, Uzielpa mirayninmantawan karqan,

²⁴Moisespa churin Gersonpa miraynin Sebuelmi qolqe waqaychaqkunaq umallin, karqan.

²⁵Gersonpa wawqen Eliezerpa mirayninmi karqan Rehabías, Rehabiaspa churintaq Jesaías, Jesaiaspa churintaq Joram, Jorampa churintaq Zicri, Zicriq churintaq Selomit. Paykunan Sebuelpa ayllumasin karqanku.

²⁶Selomitmi wawqenkunapiwan Señor Diospaq tukuy t'aqasqa qokuykunata waqaycharqanku. Chaykunatan qorqanku rey David, ayllu umallikuna, waranqa runaq umallinkuna, pachak runaq umallinkuna, ejército wakin oficialkuna ima.

²⁷Paykunaqa maqanakuypi wakin llat'anasqankutan Señor Diospa wasinpaq t'aqarqanku.

²⁸Selomitqa wawqenkunapiwan waqaychallarqantaqmi profeta Samuelpa, Cispa churin Saulpa, Nerpa churin Abnerpa, Sarviaq churin Joabpa t'aqasqankuta, hinallataq wakin runakunaq llapan t'aqasqankutapas.

²⁹Izharpa mirayninmanta Quenaniastaq churinkunapiwan Señor Dios yupaychana wasimanta sapaq cheqaskunapi Israel runakunapaq oficialkuna juezkuna karqanku.

³⁰Hebronpa mirayninmanta Hasabiasmi wawqenkunapiwan waranqa qanchis pachak allin imaymana atiq qharikuna karqanku. Paykunan Jordán mayu inti haykuy suyupi kamachirqanku Señor Diospaq tukuy llank'aykunata, reypaq tukuy ruwaykunatapas.

³¹Hebronpa miraynin ayllukunaq umallinqa Jeriasmi karqan. Tawa chunkakaq watapi rey David kamachikushaqtinmi Hebronpa miraynin ayllukuna qelqata qhawarqanku, hinan Galaadpi Jazer llaqtapi tiyaq allin imaymana atiq qharikunata tarirqanku.

³²Jeriaspa wawqenkunan iskay waranqa qanchis pachak ayllu umalli allin imaymana atiq qharikuna karqanku, chaymi rey Davidqa paykunata churarqan Rubén aylluta, Gad aylluta, Manasespa kuskan aylluntawan kamachinanpaq, Diospaq tukuy llank'aykunapi, reypaq tukuy ruwaykunapipas.