Read DIOSPA QHELQACHISQ Quechua 2 CRÓNICAS 10 Bible Online

2 CRÓNICAS 10 - DIOSPA QHELQACHISQ Quechua bible

2 CRÓNICAS 10

¹Llapa Israel runakunan Shehemta rirqanku Roboamta reyta churanankupaq, chaymi Roboamqa Shehemta rirqan.

²Nabatpa churin Jeroboammi chayta yachaspa kutimpurqan. Payqa rey Salomonmantan Egiptoman ayqekapusqa, hinaspan chaypi tiyasharqan.

³Israel runakuna waqyachiqtinmi Jeroboamqa kutipurqan. Hinan llapan Israel runakunapiwan Roboamta rimaykuq rispa nirqanku:

⁴— Taytaykiqa sinchitan llank'achiwarqanku, chay hinaqa pisiyarichiyyá kay sasa llank'ayniykuta, sinchi sasa llank'ay churawasqankuta qechuriwayku, hinan ñoqayku servisqaykiku, nispa.

⁵Roboamtaq kutichirqan: — Ripuychis, minchha p'unchayña kutimunkichis, nispa. Chaymi runakunaqa kutipurqanku.

⁶Chaykamataq rey Roboamqa taytan Salomonpa yuyaychaqnin kurak runakunata tapukurqan: — Qankuna yuyaychawaychis, ¿ima nispan kutichisaq chay runakunaman? nispa.

⁷Hinan paykunaqa nirqanku: — Kay llaqtata serviyta munanki chayqa, allinta kutichiy sumaq simikunawan, hinan paykunaqa servishallasunkipuni, nispa.

⁸Roboamtaq ichaqa mana kasukurqanchu kurak runakunaq yuyaychasqanta, aswanpas payta serviq wiñaymasin waynakunata tapukurqan:

⁹— Qankuna yuyaychawaychis, ¿ima nispan kutichisaq chay runakunaman? Paykunan mañakuwarqanku taytaypa sasa llank'ay churasqanta pisiyachinaypaq, nispa.

¹⁰Hinan chay waynakunaqa kutichirqan: — Taytaykiq churasqan llank'ayta pisiyachinaykita mañakuq runakunamanqa kay hinata kutichiy: ¡Maki uña dedoymi aswan rakhu taytaypa wasanmantaqa!

¹¹Payqa sasa llank'aytan kamachirqasunkichis, ñoqaqa aswan sasataraqmi llank'achisqaykichis. Payqa hasut'iwanmi soq'arqasunkichis, ñoqataq fierro khiskayoq hasut'iwanña soq'asqaykichis, nispa.

¹²Kinsa p'unchaymantataq rey Roboampa nisqanman hina Jeroboamqa llapan Israel runakunapiwan Roboamman asuykurqanku.

¹³Reytaq ichaqa kurak runakunaq yuyaychasqanta mana kasukuspa, k'arak simikunawan runakunaman kutichirqan.

¹⁴Chay waynakunaq yuyaychasqanta hap'ikuspan nirqan: — Taytaychus sinchi sasa llank'anata qorqasunkichis chayqa, ñoqaqa aswan sasataraqmi llank'achisqaykichis. Paychus hasut'iwan soq'arqasunkichis chayqa, ñoqaqa fierro khiskayoq hasut'iwanñan soq'asqaykichis, nispa.

¹⁵Señor Diosmi hunt'akunanta munarqan Silomanta profeta Ahiaswan Nabatpa churin Jeroboamman willachisqan simita, chaymi reyqa llaqtata mana uyarirqanchu.

¹⁶Llapan Israel runakunataq reypa paykunata mana uyarisqanta reparaspa nirqanku: — ¡Manan imapas Davidwan ruwananchischu! ¡Manan Isaipa churinwan ima herenciapas phasminakunanchis kanchu! ¡Israel runakuna wasinchista ripusunchis! ¡Davidqa ayllullanpi kamachikuchun! nispa. Hinan Israel runakunaqa kaq rato wasinkuta ripurqanku.

¹⁷Judá suyu llaqtakunapi tiyaq Israel runakunatataq Roboamqa kamachishallarqanpuni.

¹⁸Chaymantataq Roboamqa mit'ani runakunaq umallin Adoramta Israel runakunaman kacharqan, paykunataq ichaqa rumiwan ch'aqespa Adoramta wañuchirqanku. Chaymi rey Roboamqa usqhaylla carretanman seqarqospa Jerusalenman ayqerqan.

¹⁹Chay p'unchaymantan Israel runakunaqa Davidpa ayllunwan churanakuqku.