Read DIOSPA QHELQACHISQ Quechua 2 CRÓNICAS 12 Bible Online

2 CRÓNICAS 12 - DIOSPA QHELQACHISQ Quechua bible

2 CRÓNICAS 12

¹Roboamqa kamachikuyninpi allin takyasqa atiyniyoq kaspanmi, llapan runankunapiwan Señor Diospa kamachikuy siminta saqepurqan.

²Chaymi Señor Diosta mana kasukuq kasqanku hawa, phisqakaq watapiña Roboamqa Judá suyupi kamachikushaqtin Egipto rey Sisacqa Jerusalén contra maqanakuq hamurqan.

³Paymi Egiptomanta hamurqan waranqa iskay pachak carretakunantin, soqta chunka waranqa caballopi sillakuq soldadokunantin, mana yupay atiy Libia runakunantin, Suqui runakunantin, Etiopía runakunantin ima.

⁴Hinan Judapi pukara llaqtakunata munaychakuspa Jerusalenkama chayarqan.

⁵Roboamtaq Judá umallikunapiwan Jerusalenpi huñukusharqanku Sisac contra maqanakunankupaq, hinan profeta Semaiasqa paykunaman rispa nirqan: — Señor Diosmi nin: Qankunaqa saqerpariwarqankichismi, chayraykun ñoqapas qankunata Sisacman hap'ichisqaykichis, nispa.

⁶Hinan reyqa Israel umallikunapiwan huch'uyyaykukuspa nirqanku: — ¡Chaninmi Señor Diosqa! nispa.

⁷Chaymi Señor Diosqa huch'uyyaykukusqankuta rikuspa profeta Semaiasta nirqan: — Rikunin huch'uyyaykukusqankuta, manan ch'usaqyachisaqchu aswanpas usqhayllan qespichisaq, hinaña k'arak phiñasqa kashaspaypas manan Jerusalenta Sisacwan muchuchisaqchu.

⁸Ichaqa Sisacpa kamachinmi kanqaku, ahinapi yachanqaku imaynachus ñoqa serviy kasqanta, imaynataqchus kay pacha reykuna serviypas kasqantawan, nispa.

⁹Egipto rey Sisactaq Jerusalén contra phawaykurqan, hinaspa hap'ikapurqan Señor Diospa wasinpi llapan qhapaq kaykunata, reypa wasinpi llapan qhapaq kaykunata, Salomonpa ruwachisqan qori escudokunatawan, llapan chaykunatan aparqan.

¹⁰Chaymi rey Roboamqa qori escudokunaq rantinpi ruwachirqan bronce escudokunata, hinaspa guardia umallikunaman qorqan. Paykunan reypa wasi punkunta qhawarqanku.

¹¹Señor Diospa wasinta Roboam sapa kuti riqtinmi, guardiakunaqa chay escudokuna apantin riysirqanku, kutipuqtintaq kaqta churaykapurqanku waqaychana wasiman.

¹²Roboampa huch'uyyaykukusqan hawan Señor Diospa phiñakuyninqa tiyaykurqan, chaymi mana hukpaqkamachu ch'usaqyachirqan, Judá suyupipas allillan imapas kasqanrayku.

¹³Roboamqa Jerusalenpi kamachikuyninta allinta takyachispanmi kamachishallarqan. Payqa kamachikuyta qallarishaspa tawa chunka hukniyoq watayoqmi karqan, kamachikurqantaq chunka qanchisniyoq watata Jerusalenmanta, chay llaqtatan Señor Diosqa Israelpi llapa llaqtakunamanta akllakurqan chaypi pay yupaychasqa kananpaq. Roboampa mamanqa Amón llaqtayoq Naama karqan.

¹⁴Roboamqa manan tukuy sonqochu Señor Diosta maskharqan, chaymi mana chaninta ruwarqan.

¹⁵Paypa lliw ruwasqankunaqa qelqasqan kashan Profeta Semaiaspa Qelqanpi, Profeta Iddoq Miray Qelqa qelqasqanpiwan.

¹⁶Roboamqa Jeroboamwan tukuy tiempon maqanakurqanku.

¹⁷Wañupuqtintaq Roboamtaqa Davidpa Llaqtan nisqapi p'ampapurqanku. Paypa rantinpitaq churin Abías kamachikurqan.