Read DIOSPA QHELQACHISQ Quechua 2 CRÓNICAS 17 Bible Online

2 CRÓNICAS 17 - DIOSPA QHELQACHISQ Quechua bible

2 CRÓNICAS 17

¹Asaq rantinpiqa churin Josafatmi Judapi kamachikurqan, paymi Israel suyu contra allinta wakichikurqan.

²Judá suyuq llapan pukara llaqtankunapin soldadokunata churarqan, churallarqantaq t'aqa-t'aqa soldadokunata Judá campokunapi, taytan Asaq hap'ikapusqan Efraín llaqtakunapi ima.

³Josafatqa David ñawpa taytanpa qallariypi kawsasqanta hinan kawsarqan, chaymi Señor Diosqa paywan kasharqan. Payqa manan Baal dioskunatachu servirqan,

⁴aswanpas ñawpa taytanpa Diosnintan yupaycharqan, paypa kamachikuyninkunatataq kasukurqanpas, manan Israel suyu runakunaq ruwasqanta hinachu ruwarqan.

⁵Chaymi Señor Diosqa suyu kamachisqanpi atiyniyoqta takyachirqan, llapan Judá runakunataq payman sumaq sonqota aparqanku, chaymi ancha mentasqa askha qhapaq kayniyoq karqan.

⁶Hinan Josafatqa sonqopas-sonqo Señor Diosta servirqan, hinaspa Judá suyumanta orqokunapi yupaychana cheqaskunata ch'usaqyachirqan, Asera diosaq rikch'ayninkunatapas wikch'urqan.

⁷Kinsakaq watapi kamachikushaspataq Josafatqa oficialninkunata kacharqan Judá llaqtakunapi runakunaman kamachikuy simita yachachimunankupaq, chaykunan karqan: Ben-hail, Abdías, Zacarías, Natanael, Micaiaspiwan.

⁸Paykunawanmi rirqanku Leví runakunamanta: Semaías, Netanías, Zebadías, Asael, Semiramot, Jonatán, Adonías, Tobías, Tobadoniaspiwan, hinallataq sacerdote Elisamawan Jorampiwan rirqanku.

⁹Paykunan Judá suyupi llapan llaqtakunata puririrqanku chaypi tiyaq runakunaman Señor Diospa kamachikuy siminta yachachispa.

¹⁰Señor Diosmi Judá suyu muyuriq qorpa llapan suyukunataqa manchachirqan, chaymi mana Josafatwan maqanakuyta munarqankuchu.

¹¹Filistea suyu runakunan Josafatman sumaq sonqota aparqanku, qolqetataq contribucionta hina qorqanku. Arabe runakunapas aparqanku qanchis waranqa qanchis pachak anejokunata, qanchis waranqa qanchis pachak orqo cabrakunata.

¹²Ahinapin Josafatqa aswan-aswan atiyniyoq kasharqan, hinaspan Judá suyupi pukarakunata mikhuy taqena llaqtakunata ima sayarichirqan.

¹³Judá suyu llaqtakunapipas askhan llank'anankuna karqan. Jerusalenpipas kallarqantaqmi allin awqa-tinkuq akllasqa soldadokuna.

¹⁴Paykunan mirayninkuman hina qelqasqa karqanku. Judá ayllumanta waranqa soldadoq umallinkunaq qollananmi Adnasqa karqan. Paymi umallirqan kinsa pachak waranqa allin qhari soldadokunata.

¹⁵Qatiqnintataq Johanán umallirqan, iskay pachak pusaq chunka waranqa soldadokunata.

¹⁶Chayman qatiqtataq Amasiaspa churin Zicri umallirqan iskay pachak waranqa soldadokunata, paymi pay kikillanmanta Señor Diospaq llank'ayta yuyaykukurqan.

¹⁷Benjamín ayllumanta qollanan allin qhari Eliada karqan. Paymi umallirqan p'eqtayoq escudoyoq iskay pachak waranqa soldadokunata.

¹⁸Qatiqnintataq Jozabad umallirqan pachak pusaq chunka waranqa awqa-tinkuypaq allin wakichisqa soldadokunata.

¹⁹Chaykunan rey Josafat-ta serviq soldadokuna karqan, Judá suyuntin pukarakunapi churasqan soldadokunaqa sapaqmi karqan.