Read DIOSPA QHELQACHISQ Quechua 2 CRÓNICAS 19 Bible Online

2 CRÓNICAS 19 - DIOSPA QHELQACHISQ Quechua bible

2 CRÓNICAS 19

¹Judá rey Josafatqa Jerusalén llaqtapi wasinman allillan kutipushaqtinmi,

²Hananiq churin profeta Jehuqa payman qayllaykuspa nirqan: — ¿Imanaqtinmi mana chanin runakunata yanapanki? ¿Señor Diosta cheqniqkunatachu munakunki? Chay ruwasqaykimantan Señor Diosqa qanpaq phiñakun.

³Chaywanpas wakintaqa allintan ruwarqanki, Judá suyuntinmanta Asera diosaq rikch'ayninkunata wikch'uspayki, tukuy sonqo Señor Diosta servinaykipaq yuyaykukurqanki, nispa.

⁴Josafatqa Jerusalenpin tiyarqan, hinaspa suyupi llaqtakunata watukuq puririrqan Beersebamanta Efraín orqo-orqokama, runakunata ñawpa taytankuq Diosnin Señorman kutirikunankupaq kallpachaspa.

⁵Judá suyuntinpi llapan pukara llaqtakunapitaq juezkunata churarqan.

⁶Hinaspa chay juezkunata nirqan: — Allinta yuyaykuychis ruwanaykichispaq. Manan runakunaq sutinpichu chaninchankichis, aswanpas Señor Diospa sutinpin, payqa qankunawanmi kashan chaninchashaqtiykichis.

⁷Chhaynaqa, Señor Diosta manchakuspapuni lliwta ruwaychis. Allinta yuyaykuspapuni kuskachaychis, Diosninchis Señor Diosqa chaninmi, payqa manan pimanpas sayapakunchu, manataq lluk'iykusqa chaskinatapas munanchu, nispa.

⁸Jerusalenpipas Josafatqa churallarqantaqmi juezkunata Señor Diospa kamachikuy simin p'akiqkunata Jerusalenpi tiyaq runakunaq ch'aqwayninkunatapas chaninchanankupaq. Chaykunan karqan wakin Leví runakuna, sacerdotekuna, Israel ayllu umallikuna ima.

⁹Hinan Josafatqa paykunata kamachirqan: — Señor Diosta manchakuywanmi lliwta ruwankichis, hunt'aq-kay chanin-kay sonqowan.

¹⁰Llaqtakunapi tiyaq wawqeykichiskuna hamusunkichis, sasachakuyninkunata quejakuspanku, runa wañuchisqamantapas kamachikuy simimantapas, unanchaymantapas, chaninchaymantapas chayqa, paykunata anyaychis Señor Dios contra ama huchallikunankupaq, mana chayqa Señor Diosmi phiñakunqa qankunapaqpas wawqeykichispaqpas. Chhaynata ruwaspaykichisqa, manan huchallikunkichischu.

¹¹Sacerdote Amariasmi Señor Diospa tukuy unanchayninkunapi umalliykichis kanqa, Judá ayllu umalli Ismaelpa churin Zebadiastaq reypa tukuy kamachikuyninkunapi umalliykichis kanqa. Leví runakunataq oficialniykichis kanqa. ¡Kallpachakuychis, ahinata ruwanaykichispaq! Señor Diosqa allin ruwaqta yanapachun, nispa.